Accessibility links

Байден: АҚШ Ауғанстандағы операциясын 31 тамызда аяқтайды


Джо Байден
Джо Байден

Құрама Штаттар Ауғанстандағы барлық әскери операциясын, соның ішінде шетел азаматтары мен ауғандарды эвакуациялауды да тамыздың 31-іне аяқтауды көздеп отыр. Операция жалғасып жатыр, бірақ белгіленген мерзімде бітер-бітпесі тәліптерге де байланысты. Бұл туралы сейсенбіде АҚШ президенті Джо Байден айтты.

24 тамызда Байден "Талибан" қозғалысы билікке келгеннен кейінгі Ауғанстандағы жағдайды "Жетілік топ" жетекшілерімен талқылап, тілеулес одақтастарына ықылас білдірді. G7 жетекшілері барлық мәселе бойынша ынтымақпен жұмыс істеуге мақұлдасты.

Джо Байден АҚШ Қорғаныс министрі мен Мемлекеттік департамент басшысына Ауғанстаннан АҚШ әскері шығарылар қарсаңда түрлі жағдайға дайын болуды тапсырғанын айтты. "Біз Ауғанстанда неғұрлым ұзағырақ болған сайын террор қаупі де күшейе түседі", - деді ол.

Бұған дейін Ұлыбритания премьер-министрі Борис Джонсон да АҚШ әскерінің Ауғанстаннан шығып кету мерзімі ұзартылмайтыны, тамыздың 31-іне аяқталатыны жөнінде сөз еткен еді.

Ақ үйдің хабарлауына қарағанда 24 тамызда өткен "жетілік" жетекшілерінің жиынында Байден "Кабулдағы АҚШ миссиясы алға қойған мақсаттарына жетуіне орай аяқталды" деген және аяқталар күн ретінде тамыздың 31-ін атаған.

Джонсон Британия мен АҚШ және тағы да басқа одақтас елдер тамыздың 31-інен кейін де Ауғанстаннан кеткісі келетіндерге кедергі келтірмеуді тәліптерден талап ете беретінін мәлімдеді. Алайда бұл талапты қалай тәліптерге орындатары белгісіз. Сейсенбі күні "Талибан" өкілі мұнан әрі әуежайға шетел азаматтары ғана жіберілетінін, ауғандарға рұқсат берілмейтінін мәлімдеген.

15 тамызда тәліптер Кабулды алған соңы Ауғанстаннан ондаған мың адам эвакуацияланды. Тағы да қанша адам эвакуациялануға тиістігі белгісіз. Тәліптер эвакуация рейстеріне кедергі келтірмеді, бірақ шетелдің барша әскери қызметкері 31 тамыздан қалмай Кабул әуежайынан шығып кетеді деп күтіп отырғанын бірнеше рет қайталады.

ПІКІРЛЕР

XS
SM
MD
LG