Accessibility links

Қазақстанда вакцина алмағандар 6 қыркүйектен бастап жұмысқа жіберілмейді


Екпе пункті.

Қазақстанда COVID-19 вирусына қарсы вакцина алмағандар дүйсенбі, 6 қыркүйектен бастап жұмысқа жіберілмейді. Бірнеше күн бұрын бас санитар дәрігер сондай қаулыға қол қойған болатын.

Қаулыға сәйкес, вакцинаға қарсы көрсетілімі бар және соңғы үш ай ішінде коронавируспен ауырған азаматтар екпе алмауына болады. Қалған вакцина салдырмаған азаматтар бір апта сайын ПТР тест тапсыруға (15 доллар тұрады) міндетті.

Қаулы талабын әсіресе қызмет көрсету және сауда орындарында жұмыс істейтіндер орындауы тиіс. Оған халыққа қызмет көрсету орталықтары, пошта қызметі, банк, сақтандыру ұйымдары, валюта айырбастау қызметі, жылжымайтын мүлік агенттіктері, фитнес-орталықтар, сауна, бассейндер, сұлулық салондары, киім және аяқкиім жөндеу қызметі, нотариалдық конторлар, базар, сауда үйі, ойын-сауық кешені, музей, кітапхана, театр, кинотеатр, галерея, цирк, автостанциялар, вокзал, әуежай, қонақүй, демалыс орындары, дәріхана және қоғамдық тамақтану орындары кіреді.

Денсаулық сақтау министрлігі қыркүйек айына дейін шамамен 10 миллион адамға вакцина салынады деп мәлімдеген еді. 4 қыркүйектегі мәлімет бойынша, 19 миллион халықтың тек 5,6 миллионы екпе алған. Бір компонентін 6,7 миллион адам алған.

Халық арасында вакцинаға қарсылар бар. Аймақтарда міндетті вакциналауға қарсы акциялар ара-тұра өтіп жатыр.

ПІКІРЛЕР

XS
SM
MD
LG