АҚШ Орталық барлау басқармасы (ЦРУ) "Қытай жөнінде операциялар орталығы" деп аталатын жаңа бөлім құрады. Бұл туралы мекеме басшысы Уильям Бернс хабарлады.
Оның сөзінше, жаңа бөлім Қытай үкіметі тарабынан келетін қауіпке тойтарыс беру міндетін атқарады.
Бернс баяндамасында Қытайды АҚШ-қа геосаяси тұрғыдан ең қауіпті ел деп атаған. Ол жаңа орталықтың іс-қимылдары қытай халқына емес, үкіметіне қарсы бағытталатынын айтқан.
Биыл қаңтар айында бұрынғы президент Дональд Трамптың әкімшілігі Қытайдағы ұйғырлардың қуғындалуын геноцид деп атаған.
"2017 жылдан бері Қытай үкіметі Коммунистік партияның бақылауымен адамзатқа қарсы қылмыстар жасап келеді",- деген сол кезде мемлекеттік хатшы Майк Помпео.
Вашингтон Пекиннің демократияға шабуыл жасауын айыптап келеді.
Уильям Бернс Орталық барлау басқармасы басқа да маңызды қауіптерге, оның ішінде "Ресей агрессиясына, Солтүстік Корея мен Иран, сонымен бірге терроризмге қарсы" аса көңіл бөлуді жалғастыра беретінін жеткізді.
ПІКІРЛЕР