Accessibility links

БҰҰ: Ауғанстан үшін алдағы қыс "Жердегі тозаққа" айналады


Күннің суықтығы мен қуаңшылық Ауғанстандағы азық-түлік дағдарысын одан сайын тереңдете түседі, – деп ескертті БҰҰ сарапшылары британдық BBC телеарнасына.

"Ауған халқының 95 пайызы тамақ таппай отыр, ал біз ашыққан жұрттың ажалға қарай бет алғанын бақылап қана отырмыз. Алдағы алты ай Ауғанстан үшін Жердегі тозаққа айналады", – деді Дүниежүзілік азық-түлік бағдарламасының атқарушы директоры Дэвид Бисли. Ол жақында ғана Кабулдан оралды.

Биыл тамызда батыс елдері Ауғанстанға азық-түлік пен дәрі-дәрмек беруін тоқтатты, өйткені олар "Талибан" қозғалысымен байланыс орнатқысы келмейді.

Кабулдан 50 шақырым жердегі Вардак провинциясында бірнеше жүз адам ұн кезегінде тұр. БҰҰ Дүниежүзілік азық-түлік бағдарламасы ұсынған көмектен ұн ғана қалған.

"Қыс жақындап қалды. Нан пісіретін ештеңе болмаса, қыстан қалай шығарымызды білмеймін", – дейді кезекте тұрған қарт.

Тұрғындардың кейбірі ақша табу үшін қыздарын сатқан.

Дэвид Бисли халықаралық қауымдастықты бейкүнә адамдардың қырылуына жол бермеуге үндеді. "Біз балалардың аштықтан қырылуына жол бердік. Масқара. Ол балалардың қай елде тұратынына мән бермеуіміз керек", - дейді Бисли.

Биыл тамызда "Талибан" қозғалысының содырлары елдегі билікті басып алды. Бұның алдында халықаралық күштер Ауғанстаннан шығарылған. Билікке жеткен тәліптер қыздардың білім алуын тоқтатып, ұрлық жасағандардың қол-аяғын кесуді, халық алдында өлім жазасын орындауды қайта жаңартты. Тәліптер үкіметін әлемдегі ешбір мемлекет ресми түрде мойындаған жоқ.

ПІКІРЛЕР

XS
SM
MD
LG