Accessibility links

Қазақстанда төрт айда 22 адам "саяси белсенділігі үшін қудаланған"


Астана алаңында белсенділерді ұстап жатқан полиция. Алматы, 23 қазан 2021 жыл.
Астана алаңында белсенділерді ұстап жатқан полиция. Алматы, 23 қазан 2021 жыл.

Қазақстанда 2021 жылдың тамыз бен қараша айы аралығында 22 адам саяси белсенділігі үшін қудаланған. Үш "саяси тұтқын" бостандыққа шықты.

"Ар.Рух.Хақ" қоғамдық қорының жетекшісі, құқық қорғаушы Бақытжан Төреғожина 2 желтоқсанда Facebook'тағы "Қазақстандағы саяси қудалау бойынша ақпарат" атты жазбасында осындай мәлімет келтіреді.

Онда Қазақстанның түрлі өңірінде тұратын 22 адамның аты-жөні жазылған. Арасында қазір түрмеде отырған белсенділер: Ербол Есхожин, Асхат Жексебаев, Абай Бегімбетов, Қайрат Қылышев, Ноян Рахымжанов бар. Белсенділердің басым бөлігі 405-бап ("Тыйым салынған ұйымның ісіне араласу немесе қатысу") бойынша айыпталған. Бұл айыптар Нұр-Сұлтан соты "экстремистік ұйымдар" деп таныған, бірақ Еуропарламент "бейбіт оппозициялық ұйым" деп атаған "Қазақстанның демократиялық таңдауы" және "Көше қозғалысымен" байланысты. Қазір белсенділердің кейбірі түрмеде, кейбірінің бостандығы шектелген. Оларға саяси-қоғамдық жұмыспен айналысуына тыйым салынған.

"2018 жылдың наурыз айынан бері түрлі қылмыстық, азаматтық және әкімшілік баптармен 542 белсенді қудаланып жатыр. ҚР Қылмыстық кодекстің 405-бабы бойынша 75 адам сотталған, 3 адам тергеу амалдары жалғасқанша қамауда отыр (Сапиев М. - үйқамақта, Б. Меңдіғазиев тергеу изоляторында, Ерұлан Әміровке сот психиатриялық сараптама жүргізіліп жатыр). 7 қазақстандықтың соты өтіп жатыр: А.Қаналиев, А.Ісмақова., А.Акишева, А.Сыздықов, Н.Тастаев, М.Жыланбаев және А.Мүбәраков, А.Үмбетова. 91 белсенді қылмыстық іс бойынша тергеліп жатыр" деп жазды құқық қорғаушы.

Бақытжан Төреғожина тамыз бен қараша аралығында үш саяси тұтқын: Алмат Жұмағұлов, Кенжебек Әбішев пен Арон Атабектің түрмеден шыққанын жазады. "Шаңырақ оқиғасы" бойынша 15 жыл түрмеде отырған диссидент, ақын Арон Атабек 1 қазанда денсаулығына байланысты босатылып, көп ұзамай ауруханада көз жұмған. Халықаралық ұйымдар оның өліміне билікті кінәлаған, ал билік 2 желтоқсанда өзін Арон Атабектің өліміне кінәлі санамайтынын айтқан.

Халықаралық және жергілікті құқық қорғаушылар Нұр-Сұлтанды билікті қатаң сынаған белсенділерді қудалайды, ізіне түсіп, аңдиды, түрмеге қамайды деп жиі сынайды. Билік саяси қудалау барын мойындамайды.

ПІКІРЛЕР

XS
SM
MD
LG