Биыл ақпанда Беларусь шекарасының батысы мен оңтүстігінде, яғни Польша мен Украина шекарасында, Ресей мен Беларусь әскери күштерінің бірлескен оқу-жаттығулары өтеді. Бұл туралы дүйсенбі күні Александр Лукашенко хабарлады.
Оның мәлімдеуінше, Украина Беларусь шекарасына жақын маңда күш жинап жатыр.
Лукашенко мен Ресей президенті Владимир Путин бірлескен әскери жаттығу өткізу туралы шешімді былтыр желтоқсанда қабылдаған. Дүйсенбі күні оның мазмұны мақұлданды. Лукашенконың айтуынша, жаттығудың мақсаты - Батыс ("Балтық елдері мен Польша") күштері мен "оңтүстік" (Украина) күштерге қарсы тұру. Бұл туралы БелТА агенттігі хабарлады.
Бірлескен жаттығудың нақты қай күні өтетіні әзірге белгісіз. Әскери оқулар "Союзная решимость – 2022" деп аталады.
Батыс елдері барлауының мәліметінше, Украина шекарасына жақын маңда Ресейдің шамамен 100 мың жауынгері шоғырланған. Кремль баспасөз хатшысы Дмитрий Песков әскери күштердің шоғырланғанын жоққа шығармады, бірақ көрші елге шабуылдау ниеті жоқ екенін мәлімдеді.
ПІКІРЛЕР