Энергетика министрі Болат Ақшолақов президент Қасым-Жомарт Тоқаевтың Алматыдағы бұрынғы коттеджінде жұмыс істеп тұрған "заңсыз сұр майнинг белгісі бар" құрылғы туралы сұрақтарға жауап берді. Алматының қымбат ауданынан бой көтерген құны 1,9 млрд теңге тұратын коттеджде "майнинг-ферманың заңсыз жұмыс істеп тұрғанын" Азаттық тілшісі президентке тиесілі жылжымайтын мүліктерді зерттеу кезінде анықтаған.
"Президенттің бұрынғы коттеджінде заңсыз істеп тұрған майнинг құрылғысы туралы естіп пе едіңіз? Министрлік бұл ақпаратты тексере ме? " деген Азаттық тілшісінің сұрағына сәрсенбі күні министр "Жоқ, әзірге көрген жоқпын. Бүгін ғана келіп тұрмын. Зерттеп көрейік" деп жауап берді.
– Заңсыз майнинг фермаларын анықтаумен Қаржы мониторинг агенттігіндегі әріптестеріміз айналысып жатыр. Ал министрлік энергетика тұрғысынан жауап береді. Өкінішке қарай, қазір Энергетика министрлігі бақылау комитетінің [заңсыз айналысқан мекемелерді тексеру үшін ғимараттар ішіне] ішке кіретін құқықтары жоқ. Тиісті өзгерістерді заңға енгізуді көздеп отырмыз. Заңсыз жұмыс істеп жатқан мекемелер болса, оларды тексеруге құзыретіміз жетпейді, – деді Болат Ақшолақов Азаттық тілшісіне.
"Министрлік бұл жөнінде Қаржы мониторинг агенттігіне хабарлама жібере ме?" деген сұраққа министр нақты жауап бермеді.
Бір күн бұрын жарияланған Азаттық зерттеуінде бұрын президент Қасым-Жомарт Тоқаевқа тиесілі болған зәулім үйдің бірінші қабатында "майнинг-ферма жұмыс істеп тұрғаны" айтылған.
Құрылғының жасырын жұмыс істеп тұруы – сұр майнерлердің белгісі. Бұлай жұмыс істеу заңға қайшы. Азаттық Алматыдағы Керей-Жәнібек хандар көшесінде жұмыс істеп жатқан майнинг ферма жөнінде Энергетика министрлігіне және өзге де құзыретті мекемелерге сауал жолдаған, жауабы әлі келмеген болатын.
Былтыр Қазақстанда энергия тапшылығы туындаған шақта билік те, тасымалдаушы оператор да елдегі электр қуаты тапшылығын криптовалюта өндірісімен айналысатын майнерлердің күрт көбеюімен байланыстырған еді. Кейін Энергетика министрлігі "криптовалюта өндірісімен заңсыз айналысқан" оннан астам нысанды анықтағанын хабарлаған.
Ақпаратқа қарағанда, майнингке тоқтың көп керегі сонша – Қазақстандағы ірі "майнинг" фермаларының бірі тұтынатын электр энергиясы Қарағанды қаласын тұтас қамтуға жетеді.
Наурыздың ортасында Қаржы мониторинг агенттігі Қазақстанның бұрынғы президенті Нұрсұлтан Назарбаевтың інісі Болат Назарбаев пен күйеу баласы Қайрат Шәріпбаевқа қатысы бар заңсыз майнинг фермалары табылғанын хабарлаған.
ПІКІРЛЕР