Қырғыз-тәжік шекарасындағы қақтығыс. Не болды?

Путин Қырғызстан және Тәжікстан президенттерімен телефон арқылы сөйлесті

Ресей президенті Владимир Путин Қырғызстан басшысы Садыр Жапаров және Тәжікстан президенті Эмомали Рахмонмен телефон арқылы сөйлесті. Олар қырғыз-тәжік шекарасындағы ахуалды талқылады, деп жазды Кремль сайты.

Ақпаратқа қарағанда, Путин тараптарды "жағдайды ушықтырмауға және мәселені бейбіт, саяси-дипломатиялық жолдармен тезірек шешу үшін шара қолдануға" үндеген.

Қырғызстан президенті 19 қыркүйекті жалпыұлттық аза тұту күні деп жариялады

Қырғызстан президенті Садыр Жапаров 19 қыркүйекті жалпыұлттық аза тұту күні деп жариялау туралы жарлыққа қол қойды. Бұл жөнінде мемлекет басшысының баспасөз қызметі хабарлады.

Жарлықта "14-17 қыркүйек аралығында қырғыз-тәжік шекарасында болған қақтығыстың салдарынан қырғыз азаматтары опат болғаны", соған орай аза тұту күні жарияланғаны жазылған.

"Жалпыұлттық аза тұту күні елдің барлық аумағында, сонымен бірге шетелдегі дипломатиялық және консулдық мекемелер ғимаратында ҚР мемлекеттік туы түсірілсін, мәдениет мекемелері мен телерадиокомпанияларға ойын-сауық шаралары мен бағдарламаларын өткізбеуге кеңес берілсін" деп жазылған жарлықта.

Қырғыз шенеуніктері Тәжікстанмен шекарадағы қақтығыстан қаза болғандар артқанын хабарлады

Тәжікстанмен шекарадағы қақтығыстан қаза болғандар 36-ға жетті, деп хабарлады қырғыз билігі. Қырғызстан денсаулық сақтау министрлігі 18 қыркүйекте Баткен облысында 12 мәйіттің табылғанын хабарлады.

Тәжік билігі қаза болғандар туралы әлі ресми мәлімет таратпады. Бірақ Азаттықтың Тәжік қызметі – Озоди радиосы аты-жөнін атамаған шенеуніктерге сүйеніп, шекарадағы қақтығыстан кемінде 39 тәжік азаматы қаза болғанын айтты.

Былтыр көктемде екі көрші ел арасында қақтығыс болып, ондаған адам қаза болған, кемінде 150 адам жараланған. Бұл содан бергі ең ірі қақтығыс.

Соңғы қақтығысқа не түрткі болғаны белгісіз.

Қазақстандықтар қақтығыстың салдарынан баспанасыз қалған қырғыздарға жылу жинап жатыр

Қазақстандық журналист Назгүл Жарболова қырғыз-тәжік шекарасындағы атыстан босқан қырғызстандықтарға жылу жинап жатыр. Ол бір тәулікте жиналған алғашқы 1 миллион теңгені (2100 доллардан асады) азық-түлік пен дәрі-дәрмек алуға аударған.

— Көрші елде болып жатқан трагедияға жайбарақат қарап отыру қиын болды. [Қырғызстанда] 130 мыңнан аса адам босқынға айналды. Адамдар үйсіз қалғанда көмекке мұқтаж болады. Киім, тамақ пен дәрі-дәрмек керек. Қолымнан келгенше көмектескім келді, — дейді Назгүл.

Оның сөзінше, қазірге дейін Назгүлдің шотына 1 миллион 656 мың теңге жиналған. Банктің бір тәулікте аударға болатын сома шегіне байланысты алғашқы траншты — 1 миллион теңгені журналист қырғызстандық еріктінің шотына аударған.

— Қазір Исмаил есімді досым мен жіберген ақшаға азық-түлік пен гигена заттарын алуға кетті. Оларды еріктілер штабына апарып береді, — дейді журналист.

Жылу жинауға жүздеген қазақстандық ақша жіберген. Назгүлдің сөзінше, Түркия, Армения, Бурятиядан да ақша аударғандар бар. «Бастамамды мұнша адам қолдайды деп күтпедім» дейді ол.

— Бәрі ақша аударып, хат та қалдырады. «Қырғызстанға қолдау», «Бауырларымызға», «Қазақ, қырғыз — бір туған» деп жазып жатыр. Бәрі бейбітшілік, тыныштық тілейді.