Моңғолияның көші-қон агенттігі ықтиярхат сұраған ресейліктердің өтінішін орындауға әзір екенін мәлімдеді. Бұл жөнінде агенттік жетекшісі Нэргуйн Ууганбаяр хабарлады.

Оның айтуынша, Моңғолияда ықтиярхаттар 56 категорияға жіктеледі. Өтініш түсірген Ресей азаматтарына сәйкес құжат беріледі.

21 қыркүйекте Ресей басшысы Владимир Путин Украинадағы соғысқа арнап мобилизация жүргізетінін жариялағаннан кейін ресейліктер өзге елдермен қатар Моңғолияға да ағылған. Содан бері елге алты мыңнан астам Ресей азаматы кірген деп айтылады. 750 адамның елде болу мерзімі ұзартылған. Мыңнан астамы ықтиярхат алу мәселесі бойынша кеңес алған.

Мобилизациядан қашқандардың басым бөлігі Қазақстанға кіріп жатыр. Қазақстан ІІМ мәліметінше, 21-27 қыркүйек аралығында 100 мың ресейлік елге кірген. 1 қазан күнгі үкімет отырысында ішкі істер министрі Марат Ахметжанов 29 қыркүйекте Қазақстанға – 22,5 мың, 30 қыркүйекте 14,9 мың Ресей азаматы кіргенін мәлімдеді. Биліктің тұжырымдауынша, келгендердің басым бөлігі үшінші елге кетіп жатыр.

Ресейліктердің кейбірі Орталық Азияның өзге елдерін таңдап жатыр. Көптеген мигрант соғысып, адам өлтіргісі келмейтінін және опат болғысы келмейтінін айтады.

АҚШ президенті Дональд Трамп Украинада уақытша емес, тұрақты бітім орнағанын қалайды. Ақ үйдің баспасөз хатшысы Кэролайн Левитт Ресей билігінің 8-10 мамыр аралығында Украинадағы атысты тоқтату жоспарына қатысты пікір білдіргенде осылай деп мәлімдеді.

Левиттің сөзінше, Ресей мен Украина басшыларынан Трамптың "көңілі қалып отыр", алайда ол әлі де оптимистік көзқарасынан айнымай, бейбіт келісімге қол жеткізуге болады деп сенеді.

"Президент қақтығыстарды ұзақ мерзімге тоқтатуға ұмтылатынын айқын білдірген. Ең алдымен — адам өлтіруді тоқтатып, қантөгісті доғаруды көздейді", — деді Левитт.

ОҚИ ОТЫРЫҢЫЗ

Путин 8-11 мамырда атысты тоқтату режимін жариялады

Бұған қоса ол "президенттің Владимир Зеленскиймен жақында болған кездесуі оның бұл процеске қаншалықты мән беріп отырғанын және соған қол жеткізу үшін қаншама уақыты мен күш-жігерін жұмсауға дайын екенін көрсетті. Өйткені Трамп өзінің алғашқы мерзімінде сәті түспеген бейбітшілік орнатушы президент болғысы келеді. Қазір ол сол мақсатқа жетуге бел байлап отыр" деді.

27 сәуір күні Трамп Ресей президенті Владимир Путинді бейбітшілікті қалайтынын іспен дәлелдеп Украинадағы әскери қимылдарды тоқтатуға шақырған.

"Мен оның атқылауды тоқтатып, келісімге қол қойғанын қалаймын" деген Трамп журналистерге берген сұхбатында.

Трамптың айтуынша, Путин шынымен бейбітшілікті қалай ма, жоқ па, АҚШ президенті ол жөнінде алдағы екі апта ішінде түпкілікті қорытынды жасайтын болады.

ОҚИ ОТЫРЫҢЫЗ

Трамп Римде Зеленскиймен кездесіп, ізінше Путинді сынады

Қырғызстанда Ресейдің Украинаға қарсы соғысына жалдамалы адам жинау ісі бойынша қамауға алынғандар тергеу изоляторынан үйқамаққа ауыстырылды. Бұлтартпау шарасын өзгерту туралы шешімді Бішкектегі Бірінші мамыр аудандық соты шығарған.

Ресейдің мемлекеттік ТАСС агенттігі барлық төрт күдікті үйқамаққа жіберілді деп хабарласа, Азаттыктың Қырғыз қызметі сотқа сілтеме жасай отырып, қамаудағы төртеудің тек екеуінің — Ош қаласындағы Орыс үйінің қызметкері Наталья Секерина мен ныспысы С.В.Т. деп көрсетілген тағы бір күдіктінің бұлтартпау шарасы өзгертілген деп жазды.

Бұл іс бойынша Ош қалалық әкімшілігінің баспасөз қызметкері Сергей Лапушкин мен ресейлік азамат Виктор Васильев те қамауға алынған еді. Виктор Васильев өзін "саясаттанушымын" әрі "африканистпін" деп атайды, ал журналистік зерттеулер мәліметінше, оның Ресейдің әскери барлау қызметімен (ГРУ) және Евгений Пригожиннің құрылымдарымен байланысы болған.

Бұған дейін ТАСС өз дереккөздеріне сүйеніп, күдіктілерді Қырғызстанның ұлттық қауіпсіздік жөніндегі мемлекеттік комитетінің басшысы Камчыбек Ташиев пен Ресейдің Қырғызстандағы елшісі Сергей Вакуновтың кездесуінен кейін үйқамаққа шығармақ деп жазған болатын. Мұндай кездесу 25 сәуір күні шынымен өткен. Одан кейін жарияланған хабарда ресейлік "Россотрудничество" ұйымының штаттан тыс қызметкерлерінің құқық бұзу іс-әрекеті жазасыз қалмайды, алайда тергеу орындары олардың істеген қылығының заң бойынша ауырлық дәрежесін ескере отырып, ["Россотрудничество" ұйымының] штаттан тыс қызметкері болып істейтін Қырғыз Республикасының азаматтарына қатысты бұлтартпау шарасын үйқамаққа ауыстыруды мүмкін деп тапты" деп жазылған.

Биыл сәуір айының басында Қырғызстанда шетелге жалдамалы адам жинау ісі бойынша төрт адам ұсталғаны белгілі болды. Журналистердің мәліметінше, олардың бірі — Ош қаласындағы Орыс үйінің (ресейлік "Россотрудничество" ұйымының өкілдігі) қызметкері Наталья Секерина. Азаттықтың дерегіне сүйенсек, екіншісі — Ош қаласы әкімшілігі баспасөз қызметінің өкілі Сергей Лапушкин. Бұл іс бойынша және екі адам —ресейлік блогер Виктор Васильев пен аты-жөні жарияланбаған тағы бір адам ұсталды. "Настоящее Время" басылымының хабарлауынша, төртеуі басқа мемлекеттердің қарулы қақтығысына жіберуге жалдамалы адам жинауға қатысы бар деген күдікке ілініп, оларға Қылмыстық кодекстің тиісті баптары бойынша айып тағылған.

Бұған дейін "Досье" орталығы Виктор Васильев Ресейдің бас барлау басқармасының (ГРУ) полковнигі Денис Смоляниновтың басшылығымен Украинада жұмыс істеген және Ресеймен ынтымақтастық орнатуға бейіл белсенділерді, соның ішінде неонацистік ортадағы адамдарды жалдауға тырысқан деп хабарлаған еді. Ал The Insider өз зерттеуінде Васильевтің Африкада жұмыс істегенін, атап айтқанда, "Вагнер" жеке меншік жалдамалы әскер тобы Африка құрлығында белсенді іс-қимыл жасаған кезеңде құрылған "Пригожин желісіне" қатысқанын жазған.

• Қырғызстанда бұған дейін бірнеше азамат Ресейдің Украинаға қарсы соғысына жалдамалы жауынгер ретінде қатысты деген айыппен сотталған. Мысалы, 2023 жылдың қаңтар айының ортасында Аскар Кубанычбек уулу ұсталып, сол жылғы мамыр айында 10 жылға бостандығынан айырылған. 2024 жылдың қаңтарында Бішкек соты оның ісін қайта қарап, жаза мерзімін жеті жылға қысқартып, үш жылға пробациялық бақылау тағайындап, оны бостандыққа шығарған. 2025 жылдың сәуір айының аяғында Аскар Кубанычбек уулы Қырғызстаннан Ресейге қашып кеткені белгілі болды.

Ресей президенті Владимир Путин 8 мамырдан бастап, 11 мамырға дейін атысты уақытша тоқтату режимін жариялады. Путин үш күндік режимді Екінші дүниежүзілік соғыстағы жеңістің 80 жылдығына орай ұсынған. Бұл туралы Кремль хабарлады.

Кремльдің хабарлауынша, Ресей әскері 8-11 мамырда барлық әскери әрекетті тоқтатады.

Мәскеу Украина тарабы да "бұл режимді сақтауы тиіс" дейді. Ал режим сақталмаса Ресей қарулы күштері тиісті жауап қатады деп мәлімдеді.

Егер үш күндік режим жүзеге асса, бұл Ресейдің Украинаға басып кірген уақытынан бергі (2022 жылдың 24 ақпаны) атыс тоқтаған ең ұзақ сәт болмақ.

Украина тарабы Путин ұсынған режимге қатысты әзірге жауап берген жоқ.

Ресми Пхеньян өз әскері Ресей жағында Украинаға қарсы соғысқа қатысып жатқанын алғаш рет растады. Бұл туралы Ресей қарулы күштері бас штабының бастығы Валерий Герасимов Курск облысындағы шайқастарға солтүстіккореялық әскери қызметкерлер қатысқанын мәлімдегеннен кейін белгілі болды.

Солтүстік Кореяның орталық телеграф агенттігі жариялаған ақпаратта ел басшысы Ким Чен Ын "Ресей тарапын" екі мемлекет арасындағы стратегиялық әріптестік туралы шарттың 4-бабында көрсетілген ахуал туындағанынан "хабардар еткені" жазылған. Ол бапта агрессия болған жағдайда әскери көмек көрсету туралы айтылған. Солтүстік Корея өз сарбаздарын Ресейге жіберетінін мәлімдеген. Хабарламада Курск облысын өңірге басып кірген украин әскерінен "азат ету операциясы" сәтті аяқталғаны, ал Пхеньянда жақын арада "Солтүстік Кореяның даңқты ұлдарының ерлігін мәңгі есте сақтау үшін" ескерткіш орнатылатыны және қаза тапқан жауынгерлердің қабіріне Отан мен халық атынан гүл қойылатыны" айтылған. Хабарламада Солтүстік Корея әскерінің шығындары жайлы мәлімет жоқ.

Сенбі күні Герасимов Путинге Курск облысындағы жағдай жайлы баяндап, "солтүстіккореялық сарбаздар аймақты азат ету ісінде айтарлықтай көмек көрсеткенін" мәлімдеді.

Герасимовтың бұл мәлімдемесі Солтүстік Кореяның Ресейге әскер жібергенін алғаш рет ресми растау болды. Былтырғы күзден бері Оңтүстік Корея, АҚШ және басқа да Батыс елдері, сондай-ақ Украина Солтүстік Корея әскерін Ресейге Украинамен соғысуға көмекке жібергені жөнінде бірнеше рет хабарлаған болатын. Мәскеу мен Пхеньян бұл ақпаратты растамағанымен, оны тікелей жоққа да шығармаған еді.

Дүйсенбі күні Путин Курск облысында шайқасқан Солтүстік Корея армиясының әскери бөлімшелеріне алғыс білдірді. "Біз Отанымызды өз Отанындай ресейлік жауынгерлермен иық тірестіре қорғап соғысқан кореялық жауынгерлердің ерлігін, жоғары деңгейдегі арнайы дайындығын және жанкештілігін жоғары бағалаймыз", — делінген Кремльдің баспасөз қызметі таратқан мәлімдемеде. Путин Ресейде "Ресей үшін өмірін қиған кореялық қаһармандарды... ресейлік қарулас бауырларымен бірге" құрмет тұта еске алатынын мәлімдеді.

Солтүстік Корея мен Ресей арасындағы бір-біріне әскери көмек көрсету туралы шартқа былтыр маусым айында Путин Пхеньянға барғанда қол қойылған. Тамыз айында украин әскері Ресейдің Курск облысында операция бастап, едәуір аумақты басып алды. Қазан айында Ресей мен Солтүстік Корея арасындағы шарт ратификацияланды және сонымен бір мезгілде алдымен Солтүстік Корея Ресейге әскер жібергені, кейін олардың шайқастарға қатысқаны туралы хабарлар тарай бастады.

Оңтүстік Кореяның барлау қызметі Солтүстік Кореяның Ресейге жіберген әскери контингентінің саны 10 мыңнан асып кетті және олар зор шығынға ұшыраған деп хабарлаған. Алайда шығын көлемі жөнінде тәуелсіз дереккөздерден анықтау мүмкін болмай отыр, Ресей де, Солтүстік Корея да ресми түрде шығын жайлы ешқандай мәлімет жарияламаған. Қаңтар айының басында украин әскері қолға түсірген солтүстіккореялық екі сарбаз Солтүстік Кореяның тұрақты армиясының жауынгерлері екенін растаған.

Солтүстік Корея әскері Украинаның Ресей басып алған аймақтарда соғысқаны жайлы мәлімет жоқ. Мәскеу мен Пхеньянның кейінгі мәлімдемелерінде тек Курск облысы, яғни халықаралық құқық бойынша Ресейге тиесілі аумақ туралы сөз болып отыр.

Хабарламаларда Курск облысындағы операция аяқталғаннан кейін Солтүстік Корея әскерінің Ресей аумағында қалары я қалмасы жөнінде нақты айтылмаған. Ал ресми Киев болса, ол өңірде шайқас әлі жалғасып жатыр деп отыр.

АҚШ президенті Дональд Трамп Ресей президенті Владимир Путинді Украинадағы соғысты тоқтатуға, Украинаның аумағына соққы жасауды доғаруға тағы да шақырды.

"Ол ауылдарды атуды тоқтатып, келісімге қол қойғанын қалаймын" деді Трамп журналистерге.

Трамп алдағы екі аптада Путин бейбітшілікті қалай ма, қаламай ма белгілі болады деп санайды. АҚШ президентінің сөзінше, Ресей бейбітшілікті қаламаса Вашингтон басқа шаралар қабылдайды.

Трамп 26 сәуірде Римде өткен Украина президенті Владимир Зеленскиймен кездесуді "сәтті" деп бағалаған. "Зеленский бейбітшілік үшін Қырымнан бас тартуға дайын ба?" деген сұраққа Трамп "солай деп ойлаймын" деп жауап қатты.

Бұған дейін Зеленский Украина "Қырым Ресейдің жері" деп заңды түрде мойындамайтынын айтқан еді.

АҚШ мемлекеттік хатшысы Марко Рубио 28 сәуір – 4 мамыр арасындағы апта Украина бойынша келіссөз үшін шешуші деп атаған.

ОҚИ ОТЫРЫҢЫЗ

Трамп Римде Зеленскиймен кездесіп, ізінше Путинді сынады

"Бейбіт келісімге жақынбыз, бірақ өте жақынбыз деп айту қиын" деді ол.

Бүгін, 28 сәуір таңертең Рубио мен Ресей сыртқы істер министрі Сергей Лавров телефон арқылы сөйлескені хабарланды. Ресей сыртқы істер министрлігінің ақпаратынша, екі тарап 27 сәуір кешке сөйлесіп, "Украинадағы дағдарысты" талқылаған.

АҚШ-тың мемлекеттік департаменті бұл телефон әңгімесі жайлы ешқандай ақпарат таратқан жоқ.

ОҚИ ОТЫРЫҢЫЗ

Украина-Ресей келіссөзі: Еуропа елдерінің қандай жоспары бар?

Биыл 1 маусымнан бастап №614/613 "Орал – Маңғыстау" бағытындағы жолаушы пойызына әйелдерге арналған жеке вагон қосылады. Бұл жаңалықты "Қазақстан темір жолы" ұлттық компаниясы "Жолаушы тасымалы" еншілес кәсіпорнының баспасөз қызметі хабарлады.

Осылайша елде құрамында әйелдер вагоны бар жолаушы пойыздарының саны 12-ге жетпек, олар мыналар:

• №77/78 "Алматы – Маңғыстау";
• №351/352 "Алматы – Өскемен";
• №45/46 "Павлодар – Түркістан";
• №37/38 "Маңғыстау – Семей";
• №47/48 "Атырау – Астана";
• №33/34 "Ақтөбе – Алматы";
• №4/3 "Астана – Алматы";
• №71/72 "Астана – Шымкент";
• №354/353 "Астана – Семей";
• №24/23 "Ақтөбе – Алматы";
• №25/26 "Алматы – Шымкент";
• №614/613 "Орал – Маңғыстау".

Қазақстанда жолаушы әйелдерге арналған жеке вагондар алғаш рет 2021 жылы пайда болды. Ондай бөлек вагон енгізуге 2018 жылы қоғамда резонанс туғызған қылмыс оқиғасы – "Тұлпар-Тальго" жолаушы пойызында екі жолсеріктің 35 жастағы жолаушы әйелді купеде зорлағаны түрткі болған. 2019 жылы сот әлгі екі жолсерікті "зорлау" қылмысына айыпты деп танып, әрқайсын бес жылға бостандығынан айыруға үкім шығарған. Үкім тым жеңіл деп наразы болған қоғам белсенділері судьяның отставкаға кетуін талап еткен.

Әйелдерге арналған вагондарға жасы жетіден асқан ер жолаушының кіруіне тыйым салынады. Ондай вагонда тек әйел жолсеріктер жұмыс істейді.

Жолаушы пойызының әйелдерге арналған вагонына билетті онлайн сатып алған кезде "ЖН" (әйелдер вагоны) деген аббревиатура болуына назар аудару қажет деп еске салады "Жолаушы тасымалы" компаниясы.

Украина президенті Владимир Зеленский украин әскері Ресейдің Курск және Белгород облыстарының "белгілі аудандарында" "белсенді қорғаныс іс-әрекетін" жалғастырып жатыр деп мәлімдеді. Бұл туралы ол 27 сәуір күні Украина қарулы күштері бас қолбасшысы Александр Сырскийдің баяндамасының қорытындысы бойынша әлеуметтік желідегі ресми парағына жазды.

Ол "кейбір бағытта күрделі күйінде қалып отырған" майдандағы жағдай Ресейді соғысты аяқтауға мәжбүрлейтін халықаралық қысым әзірге жеткіліксіз екенін көрсетеді деген.

Бұған дейін Ресей армиясы бас штабының бастығы Валерий Герасимов Ресей президенті Владимир Путинге Курск облысындағы украин әскерінің қолындағы соңғы елді мекен Горналь елді мекенін Ресей әскері бақылауға алды деп баяндаған. Ол Курск облысы "толық азат етілді" деп мәлімдеді. Былтыр тамыз айында украин әскері дендей енгелі бері ол облыста шайқастар жүріп жатқан еді. Герасимовтың баяндамасына орай Путин "Киев режимінің авантюрасы күйреді" және Украина қарулы күштері "орасан зор шығынға ұшырады" деп мәлімдеді.

Осының қарсаңында Украина қарулы күштерінің бас штабы "Курск облысының кейбір аудандарында" қорғаныс операциясы жалғасып жатқанын хабарлаған.

Майдандағы жағдайды бақылап отырған бірқатар ресейлік әскери блогерлер мен телеграм-арналардың мәлімдеуінше, Курск облысының кейбір шекаралас аумақтарында украин әскері әлі де бар. Алайда, блогерлердің барлығы дерлік бұл өңірдегі елді мекендердің бәрі Ресейдің бақылауында деп отыр. Бұл шекара маңындағы Горналь ауылында Ресей туын тіккен сәт көрсетілген видео да растайды.

Украиналық DeepState жобасы Герасимовтың Курск облысы аумағы түгелдей бақылауға алынғаны туралы мәлімдемесі шындыққа сай келмейтінін, өңірде шайқастар жалғасып жатқанын атап өткен. DeepState картасында облыстың шекаралас аудандарының бір бөлігі әлі де Украина бақылауындағы аумақ ретінде көрсетілген. Алайда украин әскерінің жағдайы онша емес деп жазды жоба.

Америкалық соғысты зерттеу институты (ISW) қақтығысқа қатысып жатқан екі тараптың да деректерін келтіргенімен, Ресей облыс аумағын толық қайтарып алғаны жөнінде кесімді қорытынды жасамаған. ISW картасында шекара маңындағы кейбір аумақтар тұрақты бақылаусыз аймақ ретінде белгіленген, бірақ олар Украина қарулы күштерінің бақылауындағы аумақ ретінде көрсетілмеген.

ISW мәліметінше, украин әскері 18 наурызда шабуыл бастаған Белгород облысында бірқатар позицияны әлі ұстап тұр. Герасимов Путинге баяндамасында Белгород облысындағы жағдай туралы айтқан жоқ. DeepState картасында Белгород облысының шекаралас аумақтарының бір бөлігі "сұр аймақ" ретінде, яғни тұрақты бақылаусыз аумақ деп көрсетілген. Мұндай мәртебе Украинаның Сумы облысының бір бөлігінде де бар. ISW деректері бойынша, кейінгі кезде Ресей әскері Сумы облысында төрт елді мекен мен шамамен 50 шаршы шақырым аумақты басып алған. Герасимов одан да үлкен аумақ жайлы айтып, ол жерде "қауіпсіздік аймағы" құрылып жатқанын мәлімдеді.

Украин әскері Курск облысындағы операциясын былтыр 6 тамызда бастаған еді. Олар айтарлықтай аумақты, соның ішінде Суджа ауданы орталығын басып алған болатын. Ресей әскері ол жерді қайтарып алуға жарты жылдан астам уақыт жұмсады.

Иранның оңтүстігіндегі Шахид-Раджаи портында болған жарылыстан қаза болғандар 25 адамға жетті, 1139 адам жараланды деп жазды IRNA агенттігі. Порт орналасқан Хормозган провинциясында үш күндік қаралы күн жарияланды.

Қуатты жарылыс сенбі күні болған, сол аумақтағы аудандар мен кейбір өнеркәсіп кәсіпорындары зардап шеккен. Иранның ақпарат құралдарының жазуынша, жарылыстың нәтижесінде бірнеше шақырым жердегі ғимараттардың терезелері шағылған.

Дағдарыс жағдайын басқару бойынша ұйым өкілі Хоссейн Зафаридің сөзінше, жарылысқа контейнерлерде химикаттардың дұрыс сақталмауы себеп болған. Алайда иран үкіметінің өкілі жарылысқа химиялық заттар себеп болғанмен әзірге нақты себебін анықтау мүмкін болмай тұр деп айтқан.

Бұған дейін порттың кеден өкілдері жүкшілерді осы аумақтан эвакуациялайтынын және жарылыс болған контейнер аумағында "қауіпті жүк пен химикаттар" болғанын айтқан.

Жексенбі күні Tasnim агенттігі портта жанып жатқан контейнерлерден кадрлар жариялады.

• Стратегиялық Ормуз бұғазына жақын орналасқан Шахид-Раджаи порты Ирандағы ең ірі контейнерлер тораптарының бірі және елге келетін жүк контейнерлерінің көбін реттейді.

Украина президенті Владимир Зеленский және АҚШ президенті Дональд Трамп Римде қысқа кездесу өткізді. Олар Италияға Рим папасы Францискімен қоштасу рәсіміне барған еді. Келіссөз әулие Петр соборында болды. Бұл жөнінде Зеленскийдің баспасөз хатшысы Сергей Никифоров хабарлады.

Украина президенті кеңсесінің жетекшісі Андрей Ермак кездесуден бір сурет жариялап "конструктивті" деп жазып қойған. Екі басшы 28 ақпанда Ақ үйде дауласқаннан кейін алғаш рет бетпе-бет кездесіп отыр. Сол кезде Киев пен Вашингтон сирек металл туралы келісімге қол қоюды жоспарлаған, алайда бұл болған жоқ.

Ақ үйдің өкілі Стивен Чунг келіссөздің өнімді өткенін айтқанмен жай-жапсарына тоқталған жоқ.

Бастапқыда екі басшы азалы жиын өткеннен кейін тағы бір рет кездесу өткізетіні хабарланған, кейін Зеленскийдің кеңсесі "басшылардың тығыз кестесіне байланысты" кездесу өтпейтінін айтты.

Зеленский келіссөзді "тарихи деп атау мүмкіндігіне лайық" әңгіме деп атады. Украина президенті азаматтарды қорғау және атысты тұтас тоқтату мәселесі талқыланғанын атап өтті. Ол Трампқа алғыс айтқан.

Бұған дейін Трамп Украина мен Ресей арасында бейбітшілік келісіміне жақын арада қол қойылатындығына сенімді екенін мәлімдеген. Жуырда оның арнайы уәкілі Стивен Уиткофф Мәскеуге барып, Ресей басшысы Владимир Путинмен кездескен.

Зеленскиймен келіссөзден кейін Трамп Ресей президентін тағы сынады. Truth Social желісінде ол өзі жөнінде Ресейге тиімді саясат жүргізіп отыр деп жазған The New York Times мақаласына шүйлікті.

Трамп жазбасының соңында "Путиннің соңғы күндері бейбіт аудандар, қалалар мен ауылдарды зымыранмен атқылауына еш негіз жоқ еді. Бұл бәлкім, ол соғысты аяқтағысы келмей, әншейін мені алдаусыратқысы келе ме деген ойға жетелейді. Мүмкін, онымен басқаша сөйлесу керек шығар? "Банктік шаралар" немесе "жанама санкция" енгізу арқылы. Тым көп адам өліп жатыр" деп жазды Трамп.

Кейінгі күндері Трамп осымен Путинді сынап екінші жазба жариялап отыр. 24 сәуірде Ресей әскерінің Киевке жаппай соққысынан кейін АҚШ президенті Ресей басшысын атысты тоқтатуға шақырған.

Ал Кремльдің өкілі Дмитрий Песков Уиткоффпен кездесу кезінде Путин Украинамен ешқандай шартсыз атысты тоқтатуға дайын екенін мәлімдегенін айтты. Песковтің сөзінше Путин мұны "талай айтқан".

Журналист Айбар Олжаев бас прокуратурадан тараздық белсенді Жанна Папинаның президент Қасым-Жомарт Тоқаевтың сөзінен кейін жариялаған жазбасында ұлтаралық алауыздық қоздыру белгілері бар-жоғын тексеруді сұрады. Бұл мәселеге бірінші болып ҚазТАГ агенттігі назар аударды.

"ҚР бас прокуратурасына Қылмыстық кодексі 174 бабы бойынша алдын-ала тергеу жұмыстарын өткізу бойынша арыз берілді" деп жазды Айбар Олжаев сенбі күні Threads желісінде.

Скриншотқа қарағанда арыз тіркелген.

Бұған дейін Папина Facebook-тағы парақшасында "нацики, идите, поплачьте в степи" (нацистер, барып далада жылап алыңыздар...) деп пост жариялаған еді. Ол өзінің жазбасына Тоқаевтың "ешкім ешкімді мына тілде сөйле деп міндеттей алмайды" деген сөзінен үзінді келтіріп, президенттің суретін де жариялап қойған.

"Біз заң мен құқықтық тәртіп қағидасы үстемдік ететін ел мен қоғам құрып жатырмыз. Еліміздегі ұлтаралық келісім мен бейбітшілікке нұқсан келтіруге бағытталған кез келген арандатушылық қазір ерекше қауіпті. Мұндай арандатушылықтармен бүкіл қоғам болып күресу керек" деп жазды Айбар Олжаев. Оның жазбасынан ҚазТАГ үзінді келтіреді.

24 сәуірде президент Қасым-Жомарт Тоқаевтың Қазақстан халқы ассамблеясында «Ешкім ешкімді мына тілде сөйле деп міндеттей алмайды, тілді ту еткен арандатушылар бар» деген сөзі әлеуметтік желіде қызу талқыланған еді. Ол қоғамды жікшілдікке апаратын кез келген арандату әрекеті жазаланатынын айтқан. Тоқаев "шетелде отырып әлдебір ұйымдардың ақшасы мен тапсырмасына деструктивті әрекетпен айналысатын арандатушылар" туралы да айтқан.

Үндістан мен Пәкістан әскері Джамму мен Кашмирдегі бақылау шекара сызығында атысып жатқанына екі күн болды деп жазды Reuters агенттігі.

Үндістан әскерінің хабарлауынша, сарбаздар пәкістандық әскердің жарым түнде атқан оғына жауап берген. Зардап шеккендер жөнінде ақпарат хабарланбады.

22 сәуірде Үндістан бақылауындағы Кашмирдің бір бөлігінде туристерге қарулы шабуыл жасалғаннан кейін Үндістан мен Пәкістан арасы күрт ушыққан. Жауапкершілікті аса танымал емес сепаратистік топ мойнына алды. Үндістан теракт ретінде сипаттаған шабуылдан 26 адам қаза болған. Шабуылдаушы үш адамның екеуінде Пәкістан азаматтығы бары айтылды.

Қарулы шабуылдың ертесінде Үндістан билігі Пәкістан азаматтарына берілген барлық визаның күшін жойған. Бұған қоса, Үндістан Пәкістанмен жалғыз шекара өткелін жауып, Үнді өзенінің су ресурсын пайдалану туралы келісімді үзді. Бұл келісім 1960 жылы жасалған және Үндістан мен Пәкістан өзара соғысып жатқанына қарамастан күшінде қалған еді.

Пәкістан билігі бейсенбі күні Үндістан азаматтарының визаларының күшін жойды. Одан бөлек, бейсенбі күні үнді әуе компанияларына әуе кеңістігін жауып, Үндістанмен кез келген сауда қарым-қатынасын тоқтатынын мәлімдеді. Бұған қоса, бірқатар үнді дипломаттары елден шығарылмақ.

• Үнді түбегінде британ билігі аяқталған соң Пәкістан мен Үндістан екіге жарылған 1947 жылдан бері екі мемлекет Кашмир аймағы үшін таласып келеді. Екі ел де оны өз жері деп санайды. Кашмирдің үнділік бөлігіндегі сепаратистік топтар аталған аумақ Пәкістан бақылауында болуы керек деп санайды.

АҚШ барлау басқармасы (ЦРУ) төрағасының орынбасарының 21 жастағы ұлы Майкл Глосс Украинадағы соғыста қаза болды, ол Ресей жағында соғысқан деп жазды "Важные истории".

Ресей қорғаныс министрлігімен келісімшартқа Глосс 2023 жылы күзде қол қойған. Зерттеушілердің сөзінше, ол туралы мәлімет бірыңғай медициналық ақпараттық-сараптамалық жүйеде пайда болған. Оның мекенжайы ретінде Мәскеудің Яблочков көшесіндегі әскери пункт көрсетілген.

Келісімшартқа қол қойғаннан кейін екі аптада Глосс Мәскеу түбіндегі "Авангард" жаттықтыру орталығында әскери дайындықтан өткен. Кейін оны Рязандағы 41450 әскери бөліміне қарасты 137-полкқа ауыстырған. Зерттеушілердің сөзінше, соғысқа Майкл Глосс 2023 жылы желтоқсанда кеткен.

"Егер қателеспесем, оны дайындықтан кейін штурмдық отрядқа жіберді" деді оны жақсы білетін ресейлік. Ол да рязандық 137-полкта әскери қызметте болған.

Глосс телеграм желісіне соңғы рет 2024 жылы 14 наурызда кірген. Екі аптадан соң 137-полк Украинаның Донецк облысындағы украин бекіністеріне шабуылдаған. Некрологқа қарағанда, ол 2024 жылы 4 сәуірде қаза болған. Онда оның неден қайтыс болғаны жазылмаған, тек "әлемді аралап, саяхатқа кеткенге дейін" ол "қысқа әрі жарқын өмір сүрді" деп жазылған.

Глосс чаттардың бірінде әскерге Ресей азаматтығын алу үшін барғанын жазған. Ресей азаматтығы оған өмірлік мақсатына жету үшін – "экологиялық ластану мен сонымен байланысты ауру, өлім-жітіммен күрес үшін" қажет болған.

Майкл Глосс — ЦРУ директорының цифрлық инновациялар жөніндегі орынбасары Джулиан Галлина Глосс пен Ирак соғысының ардагері Ларри Глосстың ұлы. Ларри Глосс АҚШ пен НАТО елдерінің әскеріне қауіпсіз программалық жабдықтау жасаумен айналысады. Майкл еркін өнер College of the Atlantic колледжінде оқып, климат бойынша наразылықтарға және түсікке тыйым салу митингтеріне қатысқан. 2023 жылы ол колледжді аяқтамай әлемді саяхаттауға кеткен. Атап айтқанда, Түркияға барып, жер сілкінісінен кейін үйінділерді тазартуға көмектескен. 2023 жылы тамызда ол чаттардың бірінде Владикавказда екенін жазған.

Ресей Украина аумағына басып кіргелі бері осы күнге дейін кемінде 105 мыңға жуық ресейлік әскери қызметкер қаза болған. Бұл жөнінде BBC-дің Орыс қызметі мен Медиазонаның еріктілермен бірігіп жүргізген зерттеуінде айтылады.

Зерттеушілер ашық дереккөздер мен әлеуметтік желідегі жазбалар, ресми некрологтар мен биліктің хабарламаларына сүйене отырып, соғыста қаза болған 104 763 ресейлік әскери қызметкердің аты-жөнін анықтаған. Бес мыңға жуығы – офицерлер. Адам шығыны бұдан да көп болуы ықтимал.

11 сәуірден бері BBC-дің Орыс қызметі мен Медиазона жариялаған қаза болғандардың саны 2800-ге ұлғайған.

Бұған дейін қаралған және қазір қаралып жатқан мұрагерлік істердің саны және соңғы үш жылдағы ерлер арасындағы артық өлім-жітім туралы деректерге негізделген есептеулерге сүйенген "Медиазона" Ресей армиясының Украинадағы соғыстағы шығыны қазір кемінде 165 мың адам деп түйіндейді.

Әдеттегідей еріктілер арасында адам шығыны (шамамен 26 мың адам немесе қаза болғандардың жалпы санының төрттен бірі) көп. Екінші орында түрме тұтқындары (16,5 мың немесе қаза болғандардың шамамен 16 пайыз) тұр. Үшінші орында – мобилизацияланғандар (12 мың немесе 11,5%)

"Медиазона" өткен аптада Ресей президенті Владимир Путиннің бір тәуліктен астам уақытқа созылған "пасхалық бітім" жариялағанын еске салды. Украина сәйкесінше атысты тоқтататынын айтқан. Бірақ көп ұзамай тараптар бір-бірін атысты тоқтату туралы режимді бұзды деп айыптаған. Некрологтардың кешігіп жариялануына байланысты зерттеушілер әзірге бітім кезіндегі қаза болғандар санын анықтай алмады.

Ресей президенті Владимира Путин мен АҚШ президентінің арнайы уәкілі Стив Уиткоффтың кездесуі кезінде Мәскеу мен Киев арасында тіке келіссөзді қалпына келтіру мәселесі сөз болды. Ресей президентінің көмекшісі Юрий Ушаков журналистерге осылай деп мәлімдеді.

Ушаковтың сөзінше, Кремльдегі кездесу шамамен үш сағатқа созылған және келіссөз АҚШ пен Ресейді "тек Украина ғана емес", сонымен бірге "өзге де халықаралық мәселе бойынша ұстанымдарын жақындатуға мүмкіндік берген".

Ушаковтың сөзінше, Мәскеу мен Вашингтон арасындағы диалог одан әрі қарай түрлі деңгейде жалғасын таппақ.

Америка жағы Путин мен Уиткофф келіссөзіне түсініктеме бермеді.

Соңғы 2.5 ай ішінде Уиткофф Ресейге осымен төртінші рет барып отыр. Ол Мәскеуге екі рет - 11 ақпан және 13 наурызда барған, 11 сәуірде Санкт-Петербургте болды.

АҚШ президенті Дональд Трамп бұған дейін оның әкімшілігі атысты тезірек аяқтап, Мәскеу мен Киевпен келіссөз жүргізіп жатқанын хабарлаған.

Ресей сыртқы істер министрі Сергей Лавров CBS арнасына берген сұхбатында Мәскеу келісімге дайын деп мәлімдеген, бірақ кейбір пунктілер "нақты реттеуді" талап етеді деп айтқан, бірақ жай-жапсарын айтпаған. Ақпарат құралдарының жазуынша, Украинаға Қырым мен аннексияланған төрт аймақтан бас тарту және НАТО-ға мүшеліктен қол үзу сияқты талап қойған Ресей қазіргі майдан сызығында соғысты тоқтатуға келісуі мүмкін.

Ал Украина президенті Владимир Зеленский өткен аптада Лондондағы кездесуден кейін соғысты аяқтау бойынша жаңа құжат әзірленіп, ол Трампқа берілгендігін айтты. Зеленскийдің сөзінше, бейбіт келісім әсіресе территориялық тұтастық мәселесінде Украина Конституциясына қайшы болмауы керек.

Бұған дейін Трамп Қырымды Ресей жері деп танудан үзілді-кесілді бас тартқан Зеленскийді бейбітшілік келіссөзіне кедергі келтірді деп айыптаған. АҚШ соғысты реттеу бойынша жоспарының жай-жапсарын айтқан жоқ, алайда CNN мәліметінше, Еуроодақ өкілдері Украинаны территориясының біраз бөлігін Ресейге беруге мәжбүрлеуі мүмкін екендігіне алаңдап отыр.

Мәскеу түбіндегі Балашиха қаласында 25 сәуір таңертең көлік жарылды. Бұл жөнінде Baza және өзге де телеграм-арналары хабарлады. Кемінде бір адам қаза болғаны белгілі. Телеграм-арналардың жазуынша, Ресей қарулы күштерінің генералы Ярослав Москалик опат болған.

Ресей тергеу комитеті генерал Москаликтің қазасын растады. Ведомство хабарламасында ол Ресей қарулы күштерінің бас жедел басқармасы төрағасының орынбасары болғаны жазылған. Оның генерал-лейтенант атағы болған.

Комитет өкілдері Балашихадағы көліктің жарылуына қатысты қылмыстық іс қозғалғанын хабарлады. Тергеу мәліметінше, құрылғының қуаттылығы тротил эквивалентімен алғанда 300 грамнан астам жарылғыш зат болған. Адам өлтіру бабы бойынша қылмыстық іс қозғалған. Әдетте мұндай істерді терактіге балайды.

Көліктің жарылған сәті видеоға түсіп қалған.

Дереккөзге сүйенген Baza көліктің жанынан бір ер адам өтіп жатқан кезде жарылыс болғанын жазды. Ол қаза болған.

Генерал Москаликтің аты-жөні 2021 жылы ТАСС агенттігінің хабарламаларында аталған.

Журналист Олег Кашиннің айтуынша, 2015 жылы Москалик Ресей мен Украина арасында норман форматындағы келіссөздерге қатысқан. Ол 2019 жылы Владимир Зеленский қатысқан осы форматтағы ең соңғы келіссөзге де қатысқан. Москалик сонымен бірге 2018 жылы Сирияның сол кездегі президенті Башар Асадпен келіссөздерге де араласқан. Оның Украинадағы соғысқа қатысқаны-қатыспағаны белгісіз.

ЧТД телеграм-арнасының жазуынша, генерал Москалик ресми түрде Мәскеуде тіркелгенмен жарылыс болған Балашихадағы Нестеров гүлзарында тұрған.

Кей ақпаратқа қарағанда, көлік ішінде тағы бір адам болған, ол да қаза болған. Бұл ақпарат әзірге расталмады.

2024 жылы желтоқсанда Мәскеуде өз үйінің подъезінде жарылыстың салдарынан Ресей қарулы күштерінің радиация, химия және биологиялық қорғау әскерінің бастығы генерал Игорь Кириллов мерт болған еді. Украина арнайы қызметіндегі дереккөздер сол кезде бұл олардың операциясы екенін мәлімдеген. Украина жағы генерал Москаликтің ықтимал қазасына қатысты түсініктеме берген жоқ.