Қазақстандағы McDonald’s франшизасының операторы елдегі мейрамханаларының жұмысын уақытша тоқтататынын мәлімдеді.
"Қазақстандағы McDonald’s (ТОО Food Solutions KZ) жергілікті тасымалдау шектелгендіктен 18 қарашадан бастап барлық мейрамханаларының жұмысын тоқтатады. Компания жұмысын жалғастыруға барынша күш салады. Мейрамханалардың ашылу мерзімі кейін хабарланады" деп жазылған компанияның Инстаграмдағы парақшасында.
Шілде айында аталған мейрамханалар желісі "техникалық ақауға байланысты" уақытша жабылған еді.
Food Solutions KZ мәліметінше, Қазақстанда 24 McDonald’s мейрамханасы бар. Олар Алматы, Астана, Атырау, Ақтөбе, Қостанай және Қарағандыда орналасқан. Компанияларда шамамен 2 мың адам жұмыс істейді.
Компанияның баспасөз қызметінің хабарламасында осы уақыт бойы Food Solutions KZ үш миллиард теңгеден астам салық төлегені және 2016 жылдан бері қайырымдылыққа 80 миллионнан астам қаражат бөлгені жазылған.
McDonald’s франшизасын 2014 жылы қазақстандық кәсіпкер, экс-президент Нұрсұлтан Назарбаевтың қызы Дариға Назарбаевтың бұрынғы құдасы Қайрат Боранбаев алған. Ақпарат құралдары Боранбаевты Қазақстан мен Беларусьтегі франшизалардың иесі деп атаған. Боранбаев биыл наурызда "квазисектордан ірі көлемде қаражат жымқырды" деген күдікпен ұсталған.
Кәсіпкер ұсталғаннан кейін көп ұзамай Алматыдағы паркингті басқаратын оған қарайтын екі компания Алматы әкімдігіне қайтарылған. Сәуір айында онымен байланысты Қарағанды дәрі-дәрмек кешені коронавирусқа қарсы ресейлік вакцина шығаруды тоқтатқан.
