Соғыс басталғалы Украинада 12 200-ден астам Ресей азаматы қаза болған, оның 800-і – мобилизациямен шақыртылғандар. Бұл туралы "Медиазона" басылымымен бірге өлгендер тізімін жасап жатқан BBC телеарнасы хабарлады.
Журналистер тізімді құрастырған кезде Ресей медиасы, жергілікті билік пен тұрғындар мәліметі сияқты ашық ақпарат көзі растаған деректерді пайдаланатынын айтты.
Өлгендердің басым бөлігі – Краснодар, Свердловск, Челябинск облыстарынан және Дағыстан мен Бурятиядан. Олар негізінен атқыштар, әскери десант және еріктілер батальонынан екені анықталған.
BBC жыл аяғында Украинада "Вагнер" жеке әскери компаниясының жалдамалы әскері қатарында болған 450-ден астам сотталушы мерт болғанын анықтаған. Саны артып жатқандықтан, мұндай адамдарға қатысты статистика бөлек жасалып жатыр.
Мониторинг авторлары тізімдегі есімдер Ресейде жерленгендердің 40-60 пайызы ғана болуы мүмкін екенін айтады. Журналистер елдегі 60-тан астам елді-мекендегі зираттарды зерттегеннен кейін осындай тұжырымға келген. Сөйтіп Украинаға басып кіргелі бері Ресей 24 мыңнан астам азаматынан айырылған болуы мүмкін деген қорытынды жасалып отыр.
ПІКІРЛЕР