Польша Ресейдің Калининград облысымен шекарасына электронды шарбақ орната бастады. Бұл жөнінде ішкі істер және әкімшілік министрі Мариуш Каминьский хабарлады.
"Беларусьпен шекарадағыдай соңғы үлгідегі қоршау орнатылады: күндіз де, түнде де жұмыс істеп тұратын камералар, қозғалысты анықтайтын құрылғылар. Ресеймен шекарада болып жатқан барлық жайтты толық бақылап отырамыз" деді министр.
199 шақырымға созылатын Ресей-Польша шекарасына 3 мың камера орнатылады. 30 қыркүйекке қарай құрылысы аяқталады. Жоба құны – 373 млн злото (81 млн еуро).
- Бұған дейін поляк әскері Ресеймен шекараға 3 мың тікенек бағана әкеліп, танкіге қарсы тосқауылдар орнатқан.
- Былтыр қазанда Польша Беларусь шекарасына дуал орнатып болған. Оған 1,6 млрд злото (шамамен 330 млн еуро) жұмсалған. Мұндай шешім Беларусь арқылы ЕО-ға заңсыз өтуге талпынған мигранттардың күрт көбеюіне байланысты қабылданған.
