Алматы қаласында орналасқан Орталық мемлекеттік кино-фотоқұжаттар мен дыбыс жазбалары архиві қазақ халқының совет кезінен танымал өнер қайраткерлерінің аудиотаспаларын аудиокітапқа айналдыруды бастаған. Бұл туралы бүгін, 18 мамырда мекеме ұйымдастырған конференцияда архив қызметкері Еңлік Толықбаева айтты.
Оның сөзінше, Орталық мемлекеттік кино-фотоқұжаттар мен дыбыс жазбалары архивінде республиканың белгілі қоғам қайраткерлерінің, мәдениет және өнер адамдарының дауысы жазылған көптеген аудиотаспа мәдениет мұрасы ретінде сақтаулы тұр. Халыққа тарату, қоғам игілігіне айналдыру мақсатымен архив оларды интернет арқылы тыңдай алатындай етіп аудиокітапқа айналдыруға тырысып отыр.
– Мұндай құнды аудиотаспалар елеусіз қалмауы керек. Жақында "Қазақ халық ертегілері" деген аудиокітап шығардық, тағы екі бөлімі әзірленіп жатыр. Мәселен, ертегілерді Қазақ ССР-інің халық әртістері Қасым Жәкібаев, Райымбек Сейтметов, Торғын Тасыбекова секілді тағы да басқа белгілі өнер адамдары оқыған. Әрине, қазіргі кезде аудиокітаппен ешкімді таңғалдыру мүмкін емес. Бірақ бұл – еліміздің мәдени мұрасы. Көркем мәтінді оқу жауапкершілігі қандай екенін осы аудиолардан тыңдауға болады, сонысымен де құнды, – дейді ол.
"Қазақ халық ертегілері" Орталық мемлекеттік кино-фотоқұжаттар мен дыбыс жазбалары архивінің YouTube-арнасында жарияланған.
Орталық мемлекеттік кино-фотоқұжаттар мен дыбыс жазбалары архивінің құрылғанына биыл 80 жыл толған. 1943 жылы 27 қаңтарда Қазақ ССР халық комиссарлар кеңесінің қаулысымен құрылған архивте бір ғасырға жуық уақыт аралығындағы сирек кездесетін аудио-видеоматериалдар мен фотосуреттер жинақталған.
Қарай отырыңыз: Киіз үйде конференция түрінде өткен айтыс
ПІКІРЛЕР