Accessibility links

Алматы прокуратурасы Қаңтарда екі көзінен айырылған Ермек Әбдірешовтен кешірім сұрады


2022 жылғы Қаңтар оқиғасы кезінде Алматыда оқ тиіп жараланып және азапталып, екі көзінен айырылған Ермек Әбдірешов. Алматы, 1 маусым, 2023 жыл.
2022 жылғы Қаңтар оқиғасы кезінде Алматыда оқ тиіп жараланып және азапталып, екі көзінен айырылған Ермек Әбдірешов. Алматы, 1 маусым, 2023 жыл.

Қаңтар оқиғасы кезінде жараланып әрі азаптауға ұшырап, екі жанарынан айрылған 37 жастағы Ермек Әбдірешовтен Алматы прокуратурасы негізсіз қылмыстық қудалағаны үшін кешірім сұрады. Бұл туралы Азаттыққа құқық қорғаушы Маржан Аспандиярова айтты.

Оның айтуынша, арнайы прокурорлар басқармасының басшысы Қанат Күнғожинов ресми кешірім сұрап, хабарлама жазған.

"Сіздің (Ермек Әбдірешовтің) үстіңізден қозғалған қылмыстық қудалау дәлелденбеуіне байланысты 2022 жылдың 8 қыркүйегінде тоқтатылды. Келтірілген материалдық, моральдық шығынның өтеуін сұрауға құқығыңыз бар. Қылмыстық процесті жүргізген органның атынан сізге келтірілген зиян үшін ресми түрде кешірім сұраймын" делінген прокуратура хабарламасында.

Құқық қорғаушы Аспандиярованың айтуынша, мемлекеттік орган қылмыстық іс тоқтағаннан кейін бес күннен кешіктірмей кешірім сұрауы қажет. Алайда прокуратураның ресми кешірім хаты құқық қорғаушылардың бірнеше рет сұрауынан кейін ғана мамырдың аяғында жеткен.

– Билік кінәсін мойындаса да, кешірім сұрауға асықпады. Ресми кешірім сұрады дегенде қатты қуандым дей алмаймын. Дегенмен де ақиқаттың ашылғаны көңіліңе жағады. Әрине, қанша жерден кешірім сұрап, қанша өтемақы берсе де, көрген азабым мен қазіргі жағдайымның өтеуін бере алмайды, көз жанарымды қайтара алмайды, – деді Ермек Әбдірешов.

Аспандиярова мен Әбдірешов қылмыстық қудалау кесірінен келтірілген моральдық, материалдық шығынды өндіру үшін Астанадағы ауданаралық азаматтық істер жөніндегі сотқа арыз жазған. Іс өндіріске қабылданған.

37 жастағы Ермек Әбдірешов былтыр 5 қаңтарда Алматыдағы дүрбелең кезінде жараланды. Дәрігерлер оң көзін алып тастаған, сол көзі тергеу изоляторында азаптаудан кейін мүлде көрмей қалған. Әбдірешовті тергеу изоляторына ауруханада жатқан жерінен арнайы жасақ күштеп алып кеткен. Оған "жаппай тәртіпсіздікке қатысты" деген айып тағылған. Ол Азаттыққа изоляторда азапталғанын айтты.

Әбдірешов тоғыз ай тергелген. Кінәсі дәлелденбеген соң, іс тоқтатылған.

Құқық қорғаушылардың дерегінше, қаңтарда жазықсыз қамалып, кінәсі дәлелденбеген төрт адамнан прокуратура кешірім сұраған. Тағы төрт адамға сот өтемақы тағайындаған.

Солардың бірі семейлік Фарит Ишмухаметов өтемақы ретінде 20 миллион теңге сұраған. Сот шағымын орынды деп тапқан, бірақ 4 миллион теңге өтемақы тағайындаған.

Өскемен тұрғыны Тілеужан Сайлауұлы да Қаңтар оқиғасы кезінде азапталғаны үшін мемлекет есебінен 1 миллион теңге моральдық өтемақы алды. 20 миллион теңге өтемақы талап еткен Тілеужан Сайлауұлы сот шешіміне келіспейді.

Видео: Прокуратура қаңтаршылардан кешірім сұраған (18 мамыр 2023 жыл).

 Прокуратура қаңтаршылардан кешірім сұраған
please wait

No media source currently available

0:00 0:02:34 0:00

Бейбіт басталып, соңы дүрбелеңге ұласқан Қаңтар оқиғасы кезінде Қазақстанда кемі 238 адам қаза тапты. Бас прокуратураның дерегінше, Қаңтар оқиғасына қатысты 5300 қылмыстық іс қозғалған. Билік Қаңтар оқиғасын халықаралық дәрежеде зерттеу туралы ұсынысты кері қайтарған.

ПІКІРЛЕР

XS
SM
MD
LG