Accessibility links

Сенат отырысында Ресейден заңсыз әкелінген астықты Қазақстан өнімі ретінде сату схемасы айтылды


Көрнекі сурет.
Көрнекі сурет.

Сенатта Ресейден Қазақстанға "жалған құжаттармен" заңсыз түрде бидай әкелініп жатқаны айтылды. Бұл туралы "ҚазАқпарат" агенттігі хабарлады.

Ақпаратқа сәйкес, сенат депутаты Андрей Лукин "жалған құжатпен салық төлемей-ақ, заңсыз тасымалдаудың тұрақты жолдары бар" екенін айтқан. Оның себебі ретінде депутат "Ресейден әкелінетін астық өнімдерін пайдалануды есепке алатын әрі оны бақылайтын жүйе жоқ" деп көрсеткен.

Сенатордың айтуынша, екі елдің кәсіпкерлері ресейлік астықты Қазақстан астығы түрінде экспорттап, құн салығы бойынша жеңілдік алу схемасын қолданады. Оның сөзінше, айлакер салық төлеушілер жазасыз қалып, бюджетке салық та түспейді.

Депутаттық сауалында сенатор "Ресейге қатысты енгізілген санкцияларды ескерсек, көрші елдің жалған импорты мен кері экспорт саны бірнеше есе артуы мүмкін" деген.

Лукиннің мәліметінше, 2019-2022 жылдары Қазақстанға құны 207 млрд теңге болатын 3,4 миллион тонна астық импортталған. 2019 және 2020 жылдары Ресейден Қазақстанға бидай әкелгенде импорт үшін бюджетке құн салығы төленбегенінен Қазақстаннан үшінші елдерге экспорт көлемі шамадан тыс артқан.

Депутаттың айтуынша, 2019 жылдан бастап қазірге дейін Солтүстік Қазақстан облысына Ресейден 450 мың тоннадан астам бидай әкелінген. Олар Қазақстанның ауыл шаруашылығы тауарын өндірушілерінің ілеспе құжаттары бойынша өткен.

Ол құжат рәсімдеуінен кейін өнім Өзбекстанға, Ауғанстанға және Тәжікстанға қазақстандық тауар ретінде экспортталғанын айтады. Депутаттың сөзінше, Ресейден Қазақстанға әкелінген тауардан төленбеген қосымша құн салығы түріндегі мемлекетке келген алдын ала шығын көлемі 660 млн теңгеден асқан.

XS
SM
MD
LG