Мәскеуде соғысқа аттанған ер адамдардың әйелдері пикет өткізді

Мәскеуде Украинадағы соғысқа аттанған ер адамдардың әйелдері күйеулерін қайтаруды талап етіп, пикетке шықты.

"Осторожно, новости" басылымының жазуынша, соғысқа әкетілген ер адамдардың туыстары жеке акция өткізбеген. Олар коммунистік партияның (КПРФ) рұқсат етілмеген акциясы кезінде "Соғысқа алынғандар үйлеріне қайтсын!" ("Мобилизованным пора домой"), "Мерзімсіз мобилизацияға жол жоқ" ("Нет бессрочной мобилизации") деген жазуы бар плакаттар ұстап тұрған. Бірнеше минуттан соң полицейлер оларды қоршап алған, алайда ешкімді ұстамаған.

Нәтижесінде митингіге қатысушылар жазбаша талаптарын коммунистік партиядан мемлекеттік думаға сайланған депутаттарға тапсырған. Олар талаптарына бір айдан кейін жауап беретіндіктерін айтқан.

"Полиция келіп, басты ұйымдастырушыны шақырып, бізді басқа жаққа алып кетті. Бізге Зюганов келді, Мавзолейге гүл қою рәсімі кезінде тілегімізді айтамыз деп келістік", - деді акцияға қатысушының бірі.

Соғысқа аттанғандардың әйелдері әлеуметтік желі арқылы жиі үндеу жасап, күйеуін қайтаруды талап етіп жатады.

Ресейде былтыр күзде Украинадағы соғыста жауынгер жетпей жатқаны туралы хабар тараған шақта мобилизация жарияланған. Ресми мәлімет бойынша, шамамен 300 мың адам әскерге алынған.

Кейбір бөлімшелер қандай да бір дайындықсыз украин әскерінің қарымта шабуылын қайтаруға бірден жіберілген. Мобилизацияланғандардың кейбірінің туысы соғыста жүрген жақындарына азық-түлік, әскери киім жетіспей жатқандығын, соғысқа баулымайтынын айтқан. Журналист-зерттеушілердің мәліметінше, мобилизацияланғандар арасында адам шығыны жоғары.

Бұған дейін бірқатар ақпарат құралдары Ресей билігі тағы мобилизация жариялауы мүмкін деп мәлімдеген. Бұл ресми түрде терістелді. Билік бірінші мобилизация болғатынын да жоққа шығарған еді.