Human Rights Watch халықаралық құқық қорғау ұйымы Қытай билігі елдің солтүстігіндегі мешіттерді жауып я бұзып жатыр деп мәлімдеді. Ұйым осы арқылы Пекин әртүрлі ұлттар мен діни топтар тұратын аймақтарда "қытайландыру" саясатын жүргізіп жатыр дейді.
HRW мәліметінше, кейінгі жылдары Нинься-Хуэй және Гансу провинцияларында көптеген мешіттер жабылып, ғимараттары басқа мақсатқа пайдалануға берілген я бұзылған. HRW ұйымының Қытай бойынша сарапшысы Майя Вонг "бұл – діни наным-сенім бостандығын бұзу және елдегі мұсылмандарды жүйелі түрде шеттету" деп мәлімдеді.
Әртүрлі ұлттар тұратын аймақтарды "қытайландыру" саясатын Қытай басшысы Си Цзиньпин 2016 жылы жариялаған. 2018 жылы Қытайдың компариясы мешіттерді қысқарту резолюциясын қабылдаған. Бұл қарарға сай, мешіттердің саны қысқартылып, жаңа мешіттер тұрғызуға тыйым салынған.
HRW дерегінше, резолюция қабылданғалы мұсылмандар көп тұратын Шыңжаң өлкесінде мешіттердің үштен екісі, Нинься-Хуэй провинциясында үштен бірі жабылған. Ал әлі ашық тұрған мешіттердің мұнаралары мен күмбездерін алып, дәрет алатын, намаз оқитын жерлерді жапқан. Ұйым Қытай елдегі мешіттерге камера орнатқанын да айтады.
Қытайда 20 млн мұсылман тұрады.
- Құқық қорғау ұйымдары Шыңжаңдағы мұсылмандарға қысым жасап жатқанын бұған дейін айтқан. БҰҰ есебінше, Қытай Шыңжаңда бір миллиондай ұйғыр, қазақ және басқа да мұсылманды "қайта тәрбиелеу лагерьлеріне" жапқан. Лагерьге қамалуға хиджаб кию, сақал қою, араб және түрік тілін оқу, арақсыз той өткізу, некені мұсылманша қию, балаларға мұсылманша ат қою себеп болған.
- Қытайдың тек мұсылман дініне емес, сондай-ақ христиан дініне де қысым жасап жатқаны, шіркеулерден крестерді алып, шіркеу қызметкерлерін қудалайтыныайтылған.
ПІКІРЛЕР