Ресей президенті Владимир Путин мен Израиль премьер-министрі Биньямин Нетаньяху Газа секторында ұрыс қимылдары жалғасып жатқан уақытта, жексенбі күні телефонмен сөйлесті. Екеуі 50 минуттай әңгімелескен, қоңырауға қай жақ бастамашы болғаны белгісіз. Times of Israel басылымының жазуынша, Нетаньяху Путинмен сөйлесу үшін министрлер кабинетінің отырысынан шығып кеткен.
Нетаньяху баспасөз қызметінің хабарынша, Израиль премьер-министрі "БҰҰ-дағы Ресей өкілінің Израильге қарсы ұстанымына наразылық білдірген" және "Ресей мен Иран ынтымақтастығын қатаң сынаған". Нетаньяху "ХАМАС секілді радикалды террор топ шабуыл жасаса, кез келген мемлекет Израиль секілді әрекет етер еді" деген.
Сонымен қатар, Нетаньяху Путинге Ресей және Израиль азаматтығы бар адамды бостандыққа шығаруға күш салғанына разылық білдірген және ХАМАС ұстап отырған кепілдерді босатуға септесу үшін Путиннен Қызыл Крестке қысым көрсетуді сұраған.
Кремльдің хабарлауынша, әңгімеде "Газа секторындағы апат пен гуманитарлық жағдай сөз болған". Путин "терроризмнің кез келген көрінісін айыптайтынын" білдірген, бірақ "террористерге қарсы әрекет бейбіт адамдарға зиянын тигізбеуі керек" деген. Бұл хабарға қарағанда, Ресей "бейбіт адамдарға тиген зардапды азайту және жанжалды тоқтату мәселесіне атсалысуға дайын екенін айтқан".
Бұған дейін Путин БАӘ мен Сауд Арабиясына барып, Мәскеуде Иран президентін қабылдаған. Президент Ибраһим Раиси Путинмен кездесуде Израильді "Газа секторында геноцид жасап жатыр" деп айыптаған, ал Путин қарсылық білдірмеген.
- ХАМАС 7 қазанда Израильге шабуыл жасаған. Шабуыл барысында 1200-ден аса адам өліп, 200-ден астам адамды ХАМАС кепілге алған, олардың бір бөлігі босатылған. Оған жауап ретінде Израиль ХАМАС бақылауындағы Газаға шабуыл бастаған. ХАМАС-тың бақылауындағы Газа секторындағы денсаулық сақтау министрлігінің ақпаратынша, Израиль шабуылынан Газа секторында 18 мыңға жуық адам қаза тапқан.
ПІКІРЛЕР