АҚШ Украинаға 250 млн доллар көлемінде әскери көмек беретінін мәлімдеді. Бұл Америка қорғаныс министрлігінің әскери қорынан Киевке бөлінетін 54-көмек пакеті.
Пакетте әуе қорғанысына қажет қосымша құралдар, артиллериялық оқ-дәрі, танктерді жоятын құралдар және өзге де жабдықтар бар. Бұлар Украинаға Ресей басқыншылығына төтеп беруге көмектеседі, деп жазылған Пентагон хабарламасында.
Жаңа көмек пакетінде:
- NASAMS зениттік ракета жүйесіне арналған қосымша оқ-дәрі;
- Stinger зениттік ракеталары;
- Әуе қорғаныс жүйесінің компоненттері;
- HIMARS-қа қажет қосымша оқ-дәрі;
- 155-105 мм калибрлі артиллериялық снарядтар;
- Танктерге қарсы Javelin және AT-4 жүйелері;
- 15 миллионнан астам оқ-дәрі бар.
23 желтоқсанда АҚШ президенті Джо Байден 2024 жылы ұлттық қорғаныс жүйесіне 886 млрд доллар бөлу жөнінде заңға қол қойған. Өзге жайттармен қатар заң Үнді-Тынық мұхиты аймағында Қытайды тежеуге - 11,5 млрд доллар, сонымен бірге Ресей басқыншылығымен күресіп жатқан Украинаға 800 млн доллар бөлуді қарастырады.
Байден қазан айында конгрестен мақұлдауын өтінген 106 млрд долларлық бюджет траншы қабылданбады. Бұл пакетте Украинаға – 61 млрд доллар, Израильге 14 млрд доллар көлемінде әскери көмек қарастырылған. Құжатты қолдамайтын республикашылдар шекарадағы қауіпсіздікті күшейту қажеттігін айтып отыр.
