Ресейлік оппозиционер Алексей Навальный Мәскеудегі Борисов зиратына жерленді. Бұл туралы оның жақтасы Иван Жданов хабарлады.
Навальныймен қоштасу рәсімі Мәскеудің Марьино ауданындағы "Утоли моя печали" шіркеуінде өткен. Шіркеуге тек саясаткердің әке-шешесі мен туыстарын ғана кіргізді деп хабарлады қаралы шара өтіп жатқан жерден ақпарат таратқандар. Ал бұл уақытта шіркеу сыртында мыңдаған адам кезекте тұрды. Телеграм-арналардың жазуынша, кезектің ұзындығы 700 метрден 1,5 км-ге дейін жеткен.
Навальныйдың командасы жариялаған видеода храм төңірегіне жиналған жұрттың "Навальный!" деп қосыла айғайлап жатқаны естіледі. ВВС сайтының жазуынша, жиналғандар "Путинсіз Ресей!", "Соғыс тоқтасын", "Ресей еркін болады" деп те ұрандаған.
Алексей Навальныйды ақтық сапарға шығарып салуға келген адамдар екі километрге созылған кезекте тұрды. Жұрт "Марьино" метро стансасынан шіркеу мен зиратқа дейін жүріп барған жолдың екі қапталына күш құрылымдары темір шарбақ қойып тастады. Осындай шарбақтар Братеев көпіріндегі тротуарлардың бойына да қойылды. Күш құрылымдары өкілдері Мәскеу өзенінің екі жағасында өткен-кеткен адамдардың құжаты мен жеке заттарын тексерді.
Оппозиционердің жесірі Юлия Навальная марқұм күйеуімен қоштасу сөзін жариялап, "бақытқа толы 26 жыл" сыйлағаны үшін алғыс айтты.
"Леша, 26 жыл мені шексіз бақытты еткенің үшін рақмет. Иә, тіпті кейінгі үш жылдағы бақыт үшін де. Махаббатың үшін, үнемі қолдап келгенің үшін, тіпті түрмеде отырсаң да көңілімді көтергенің үшін, үнемі мені ойлағаның үшін. Сенсіз қалай өмір сүрерімді білмеймін, бірақ сен сонау көктен мен үшін қуанып, мені мақтан тұтатындай болуға тырысамын. Қолымнан келе ме, жоқ па, білмеймін, алайда тырысамын", – деп жазды Юлия Навальная.
Алексей Навальныйды жерлеу аяқталғаннан кейін адамдарды зиратқа өткізбей қойды деп жазды серіктері.
"Соғыс жойылсын", "Кешірмейміз". Алексей Навальныйдың ақтық сапары
Ресей билігі 16 ақпанда Ямал-Ненец автономды округі Харп елдімекеніндегі "Полярный волк" деп аталатын тәртібі қатаң түрмеде жазасын өтеп жатқан Алексей Навальный қайтыс болғанын хабарлаған. Сараптама саясаткер "өз ажалынан көз жұмды" деген қорытынды жасады. Навальный қаза табарынан бірнеше күн бұрын 27-рет айып изоляторына жіберілген. Саясаткердің жақтастары "билік оны өлтірді" деп санайды. Алексей Навальныйдың жесірі Юлия күйеуінің ісін жалғастыратынын мәлімдеді.
Навальныйдың сүйегін анасы Людмила Навальная тек 24 ақпанда алған. Оған дейін билік түрмеде қазаға ұшыраған оппозиционерді анасына бермей келген еді. Людмила Навальная өзіне тергеу комитеті ұлын құпия түрде жерлеу туралы шарт қойғанын айтқан. Осыдан соң Навальныйдың анасы "мәйітті қорлау" бабы бойынша іс қозғауды талап еткен.
ПІКІРЛЕР