Үндістанның жеті азаматы бейнеүндеу таратып, Украинада Ресей әскері жағында соғысуға мәжбүрлеп жатқанын мәлімдеді.
Видеоны NDTV үндістандық басылымның журналисі Ума Судхир X желісінде жариялады.
Жеті азаматтың айтуынша, олар Ресейге 2023 жылы желтоқсанның аяғында турист ретінде барған. Содан кейін бір туристік агенттігі оларға Беларусьқа да баруды ұсынған. Үндістандық азаматтар келіскен.
«Ол жаққа бару үшін виза керектігін біз білмедік. Беларусьқа келген уақытта агент бізден ақы сұрап, сосын кетіп қалды» дейді үндеу авторларының бірі.
Беларусьқа келген туристерді милиция ұстаған. Сосын оларды Ресей билігіне тапсырған. Мұнда оларға орыс тіліндегі құжатқа қол қоюға мәжбүрлеген.
Содан кейін, News 18 үнді басылымының мәліметінше, Үндістан азаматтары 15 күн бойы әскери дайындықтан өткен, сосын «соғыс жүріп жатқан жерге» жеткізілген. NDTV мәліметінше, соғыстан бас тартқан жағдайда оларды 10 жылға соттаймыз деп қорқытқан.
2024 жылғы ақпанда Үндістан билігі Ресей армиясына түсіп қалған жиырма шақты азаматты елге қайтаруға тырысып жатқанын мәлімдеген. The Moscow Times газетінің жазуынша, олар Ресейге турист ретінде емес, жұмысшы ретінде келуі мүмкін. Басылым мәліметінше, Үндістанның бірнеше азаматына қоқыс жинаушы жұмысын ұсынған, бірақ оларды бірден әскери дайындық орталығына жіберген.
ПІКІРЛЕР