Жапонияда өтіп жатқан Азия ойындарында семсерлесуден Қазақстан шпага құрамасы командалық жарыста алтын медаль алды. Кирилл Проходов, Вадим Шарлаимов, Руслан Құрбанов, Ерлік Сертай бастаған құрама финалда Оңтүстік Кореяны жеңді. Финалдың ортасында Қазақстан тоғыз ұпай қалып тұрған еді. Кейін есепті теңестірді. Алтын тағдыры «алтын уколда» шешіліп, Проходов қарсыласына қылышты бірінші тигізіп үлгерді.
Осылайша Қазақстан шпагадан командалық жарыста Азиада чемпионы атанды. Бұл құрама биыл әлем чемпионатында командалық жарыстың финалында Украинаны жеңіп, алтын медаль алған еді. Құраманы былтырдан бері украиналық маман Александр Горбачук жаттықтырады.
Азия ойындарында шпага жарысында қола медальды Жапония мен Гонконг құрамасы алды.
Осылайша Қазақстан Азия ойындарында ресми тоғызыншы алтынын иеленді. Қазір Қазақстан 9 алтын, 9 күміс, 21 қола медальмен жалпы есепте Қытай, Жапония, Оңтүстік Корея, Өзбекстаннан кейін бесінші орында келеді.
