Ташкенттегі футбол жарысына Қазақстаннан барған 11 бала ауруханаға түсті

Өзбекстан астанасында халықаралық футбол жарысына Қазақстаннан барған 17 азамат ауруханаға жатқызылды. Оның 11-і бала, алтауы ересек.

Бұқаралық ақпарат құралдарының хабарлауынша, Қарағанды облысынан барған жас футболшылар 31 қазан күні денсаулығы сыр бере бастағанын айтқан. Сырқаттанған ойыншылардың дене қызуы көтеріліп, іші өткен. Ата-аналары қонақүйдегі тамақтан күдіктеніп отыр. Әзірге аурудың себебі анықталмады.

Футболшылардың ата-аналары ауруханадағы жағдайға да шағымданды. Олардың сөзінше, науқастарды алғашында жөндеу жұмыстары жүріп жатқан ауруханаға орналастырған, ал дәрі-дәрмекті науқастардың өзі сатып алуға мәжбүр болған. Олар Қазақстан консулдығына жүгінгеннен кейін ғана балаларды басқа клиникаға ауыстыра бастаған.

Ата-аналар балаларды Қазақстанға ұшақпен қайтаруды сұрайды. Ұзақ жолда жағдайы қиындап кетуі мүмкін дейді олар.

Қазақстанның Өзбекстандағы елшілігі ауруханаға түскен 17 науқас Ташкенттегі №5 жұқпалы аурулар емханасында жатқанын айтады. Елшіліктің мәліметінше, науқастардың жағдайы тұрақты, оларға қажет медициналық көмек көрсетіліп жатыр.

Өзбекстанның балалар құқығы жөніндегі уәкілінің айтуынша, Ташкент қаласы Чиланзар ауданының прокуратурасы осы жағдай бойынша қылмыстық іс қозғаған.

​
XS
SM
MD
LG