АҚШ ішкі қауіпсіздік министрлігі Өзбекстан, Қазақстан және Қырғызстанның жүзден астам азаматын депортациялауға көмектескені үшін Өзбекстан басшысы Шавкат Мирзияевке алғыс айтты.
30 сәуірде Uzbekistan Airways әуекомпаниясына тиесілі Boeing-787 ұшағы Нью-Йорктен Ташкентке ұшқан. Орталық Азия елдерін депортациялау операциясын өзбек үкіметі толық мойнына алған.
"Өзбекстан президенті Шавкат Мирзиеевке 131 заңсыз иммигрантты өз еліне қайтару үшін рейс жібергені үшін алғыс айтамыз. Өзбекстанмен өзара қауіпсіздігімізді нығайту және заң үстемдігін сақтау мақсатындағы жұмыс жалғасады деп асыға күтеміз"деді АҚШ ішкі қауіпсіздік министрі Кристи Ноем
Ведомство өкілдерінің айтуынша, бұл "екі ел арасындағы қауіпсіздік саласындағы тығыз әріптестікті" айғақтап, "АҚШ одақтастары үшін стандартты" белгілейді.
Fox News хабарлауынша, Қазақстан және Қырғызстан азаматтары Өзбекстанға жеткеннен кейін өз елдеріне қайтарылмақ.
Бұған дейін Өзбекстан сыртқы істер министрлігі осы рейс арқылы жүзден астам адам елдеріне оралатынын айтқан.
"Репатриация процесі гуманитарлық-құқықтық принциптер негізінде ұйымдастырылып, азаматтарды лайықты және қауіпсіз жеткізуді қамтамасыз етуге бағытталған" деді министрлік өкілдері.
Биыл қаңтарда Fox News телеарнасы алдағы уақытта АҚШ-тан сол елде заңсыз жүрген 975 өзбек азаматы депортациялануы мүмкін екенін айтқан еді.
Бұған дейін АҚШ билігі азиялық мигранттарды Панама мен Коста-Рикаға депортациялай бастаған.