Accessibility links

Оппозициялық саясаткер Серікболсын Әбділдин өмірден озды


Мемлекет қайраткері, саясаткер, ғалым Серікболсын Әбділдин.

Қазақстанның мемлекет және қоғам қайраткері, Қазақстан Жоғарғы кеңесінің бұрынғы төрағасы, оппозициялық саясаткер, ғалым Серікболсын Әбділдин 82 жасында Алматыда қайтыс болды. Бұл туралы ақпаратты Facebook әлеуметтік желісіндегі парақшасында тәуелсіз журналист Ермұрат Бапи хабарлады.

"Қазақстан демократиялық қозғалысының пайғамбары Серікболсын аға (Әбділдин) өмірден өтті деген суық хабар келді. Билікке иілмей өткен қайсар, қайтпас адам еді" деп жазды Бапи.

Туыстарының Азаттық тілшісіне хабарлауынша, Серікболсын Әбділдин 31 желтоқсан күні сағат 23:00-тен өте Алматы ауруханасында қайтыс болған.

Серікболсын Әбділдин 1937 жылы 25 қарашада бұрынғы Семей облысы Ақсуат ауданы Қызылкесік ауылында дүниеге келген. Алматыдағы ауылшаруашылығы институтын бітіргеннен кейін еңбек жолын агроном болып бастаған ол кейін ғылыми қызметке ауысқан. 1967 жылдан бастап көп уақыт Қазақ ССР жоспарлау комитетінде жұмыс істеді, ауыл шаруашылығы министрлігінде басшы қызметтер атқарды, Қазақ ССР министрлер кеңесінің Мәскеудегі өкілі болды.

1990 жылы Қазақ ССР Жоғарғы Кеңесінің депутаты болып сайланған Серікболсын Әбділдин кейін Жоғарғы Кеңес төрағасының орынбасары, ал 1991 жылдың қазанынан 1993 жылы Жоғарғы Кеңес таратылғанға дейін оның төрағасы болды. 1991 жылы 16 желтоқсанда қабылданған "Қазақстанның тәуелсіздігі туралы декларацияға" Жоғарғы Кеңес төрағасы Серікболсын Әбділдин қол қойған.

Қазақстанның саяси тарихын зерттеушілердің жазуынша, Әбділдин Жоғарғы Кеңесті басқарған кезде Қазақстан парламенттік-президенттік республика болған. Биліктен кеткен соң Қазақстан коммунистік партиясы төрағасы болып сайланған Әбділдин оппозициялық саясаткер ретінде танылды. Ол Қазақстанның бірінші президенті Нұрсұлтан Назарбаев басқаратын авторитарлы билік жүйесін ымырасыз сынаушылардың бірі болды. 1999 жылы 10 қаңтарда кезектен тыс өткен президент сайлауына қатысты. Ресми қорытынды бойынша, сайлаушылардың 13 пайызы қолдау білдірген оппозициялық саясаткер екінші орын алды, бірақ Әбділдин "сайлау нәтижесі бұрмаланды" деп мәлімдеді.

1999 жылы күзде өткен парламент сайлауында Мәжіліс депутаты болып сайланған Серікболсын Әбділдин үкіметтің әлеуметтік-экономикалық саясатын сынап, атышулы "Қазақгейт" жанжалына қатысы бар жоғары лауазымды шенеуніктердің жемқорлығын әшкерелеуге атсалысты. Ол парламентте елде азаматтардың негізгі құқықтары мен бостандықтары бұзылып жатқанын мәлімдеп, билікті демократиялық реформа жасауға шақырды. 2003 жылы парламент үкіметтің талабы бойынша қабылдаған "Жер туралы" даулы заңға қарсы дауыс берді.

Қазақстан коммунистік партиясын 14 жылға жуық басқарған Серікболсын Әбділдин "бір лауазым, бір орынтаққа мәңгілік тырмысып отыруға болмайтынын" көрсеткісі келгенін айтып 2010 жылы орнын босатқаннан кейін ғылыми және оқытушылық қызметпен айналысты. 2015 жылы билік оппозициялық партияны түрлі себептермен жапты.

Серікболсын Әбділдинмен қоштасу рәсімі 3 қаңтар күні таңертеңгі сағат 10:00-да Алматыдағы Жамбыл атындағы филармонияда өтеді.

ПІКІРЛЕР

AzattyqTV

"Халыққа 42 500 теңгеден гөрі вирус қауіпті екенін түсіндіру керек"
please wait

No media source currently available

0:00 0:05:07 0:00
XS
SM
MD
LG