Accessibility links

НТС кеңсесіне сот орындаушылары келді


НТС телеарнасына сот орындалушылары келген сәт. Бішкек, 19 желтоқсан 2017 жыл

Қырғызстандық НТС телеарнасына сот орындаушылары келіп, компания мүлкін бұғаттау туралы сот ұйғарымын таныстырды. Бұл телеарна саясаткер, президенттікке кандидат болған, Жогорку Кенеш депутаты Омурбек Бабановқа тиесілі деп сипатталады.

Сейсенбіде Бішкектегі НТС телеарнасының ғимаратына сот орындаушылары келді. Олар журналистерді телеарнаның мүлкін бұғаттау туралы сот ұйғарымымен таныстырған. Бұл туралы бүгін НТС қызметкерлері әлеуметтік желі арқылы хабарлады.

Желіде тараған видеолардың бірінде телеарна қызметкері Каныбек Асанкарыуулы сот орындаушылары әкелген сот ұйғарымын оқып тұр.

- Міне, үшінші бөлім: істі қарап, сот шешімі шыққанға дейін жауапкерге жылжымалы мүлікті, телерадиотаратуға арналған телекоммуникациялық құрылғыларды пайдалануға тыйым салынсын, - деп оқиды телеарна қызметкері.

Ал журналист Азиат Жекшеев "жергілікті уақытпен 17:00 шамасында өздерін милиция қызметкерлеріміз, сот орындаушыларымыз деп таныстырған бірнеше адам келіп, сот ұйғарымын көрсетті" дейді.

Ешқандай құрылғыны сыртқа шығартпай жатыр [сот орындаушылары -ред.]. Біздің тілшілер сырттағы түсірілімдерге шыға алмай қалды.

- Олар ғимаратты және кеңседегі мүлікті тізімдеуге келгендерін айтып, эфирді тоқтатуымызды сұрады. Біз басшыны күттік. Ол заңгермен бірге келген болуы керек. Қазір бұл жағдайды анықтап жатыр. Ешқандай құрылғыны сыртқа шығартпай жатыр [сот орындаушылары -ред.]. Біздің тілшілер сырттағы түсірілімдерге шыға алмай қалды, - дейді журналист.

НТС телеарнасының ғимаратына барған Азаттықтың Қырғыз қызметінің тілшілері кеңсеге кіре алмаған. Журналистерді милиция өткізбеген.

Бұл оқиға туралы Қырғызстанның Бас прокуратурасы да, ІІМ де, МҰҚК да Азаттыққа еш ақпараты жоқ екенін хабарлады. Жоғарғы сот телеарнаны жабу туралы сот өкімі қашан, қандай инстанцияда шыққанын анықтап жатқандарын айтқан.

НТС телеарнасының үстінен сотқа шағым түсірген "Grexton Capital LTD" компаниясының өкілі Елена Дзимидович жағдайды төмендегідей түсіндіруге тырысқан.

Көре отырыңыз: НТС телеарнасын сотқа беруші "өкіл" не дейді?

НТС телеарнасы "Республика" партиясының жетекшісі, Жогорку Кенеш депутаты Омурбек Бабановқа тиесілі екені белгілі. Телеарна заңды түрде ОсОО болып тіркелген.

Қырғызстанда өткен соңғы президенттік сайлауда социал-демократиялық партия жетекшісі, қазіргі президент Сооронбай Жээнбековтен жеңілген соң Бабанов "Республика - Ата-жұрт" партиясының жетекшілігінен кететінін мәлімдеген. НТС эфирінен өзінің Қырғызстанда емес екенін, шетелде емделіп жатқанын айтқан. Бірақ қай елде екенін хабарламаған. Бабанов сайлау алдында Қазақстан президенті Нұрсұлтан Назарбаевпен кездескен соң Қырғызстанның бұрынғы президенті Алмазбек Атамбаевтың сынына ұшыраған еді.

Бұған дейін, биыл қарашаның бірінде НТС компаниясының құрамына кіретін "Санжыра" радиосы хабар таратуды тоқтатқан. Қарашаның 4-інде Қырғызстанның Бас прокуратурасы "ұлтаралық араздық қоздырды" деген айыппен Бабановтың үстінен қылмыстық іс қозғаған.

Желтоқсанның 19-ында НТС телеарнасының ғимаратына келіп, журналистердің сауалдарына жауап берген кейбір парламент депутаттары телеарнаны жабу әрекетін "саяси тапсырыс" деп атап, сот жүйесінің биліктен тәуелсіздігіне күмән келтірді.

Көре отырыңыз: НТС телеарнасындағы депутаттар мен заңгерлер мәслихаты

​Мақала Азаттықтың Қырғыз қызметінің репортажы негізінде әзірленді.

Пікіріңіз

Оқырман пікірлері

XS
SM
MD
LG