Ішкі істер министрі Ержан Сәденов Алматыда әл Фараби даңғылы бойындағы жолда үш адамның қазасына себеп болған көлік апаты туралы жазба жариялады.
Шенеуніктің жазбасындағы негізгі тұстар:
- Апат кезінде алкогольдік масаң күйде болған ZEEKR автокөлігінің жүргізуші сот шешімімен қамауға алынды.
- Қызметте жіберілген кемшіліктер үшін Алматы қалалық полиция департаменті бастығының орынбасары, сондай-ақ әкімшілік полиция және қоғамдық қауіпсіздік басқармаларының басшылары қызметтерінен босатылды.
- Қалаға басқа өңірлерден полиция жасақтары жіберілді.
- Алғашқы күндердің өзінде 4,8 мыңнан астам жол жүру ережесі анықталған. Оның ішінде мас күйінде көлік басқару, қарсы жолаққа шығу, жалған нөмір қолдану және жүргізу құқығынсыз көлік басқару фактілері бар. 2 мыңнан астам көлік айыппұл тұрағына қойылды.
Министр “ешкім де мәртебесіне, лауазымына және байланыстарына қарамастан, жауапкершіліктен жалтара алмайды” деп сендіруге тырысты.
21 наурызда таңғы сағат 3.30 шамасында әл Фараби даңғылымен жылдамдығын шекті шамадан асырған Zeekr көлігі жолдың қарсы бетіне шығып кетіп, Mercedes көлігімен соқтығысқан. Апат салдарынан Mercedes жүргізушісі мен оның екі жолаушысы сол жерде мерт болған. Mercedes-те 20, 22 жастағы қыз бала мен 29 жастағы жүргізуші болған. Бұған дейін бірқатар БАҚ Zeekr көлігінде болған адамның кім екені туралы да жазған.
Осы аптада осы жол апаты туралы сыни пост жазған блогер, заңгер Әділетхан Молдаханның да ұсталғаны белгілі болды. Заңгер түнгі қалада автокөлікпен жарыс ұйымдастыруға құқық қорғау органдары қызметкерлерінің қатысы болуы мүмкін деп мәлімдеген. 31 наурызда Алматы қаласының тергеу соты блогер әрі заңгер Әділетхан Молдаханды 10 күнге қамады. Алматы полициясының хабарлауында ол "көрінеу жалған ақпарат тарату" бабы бойынша күдікке ілінген.