Батыс ақпарат агенттіктері АҚШ-тың шығыс жағалауында қалың жауған қар салдарынан кемінде 18 адам құрбан болғаны, көпшілігі қарлы боранда жол-көлік оқиғасына түсіп, қазаға ұшырағаны туралы хабарлады. Америкалық CNN телеарнасы мерт болғандар саны он төрт адам дейді.
Ауа райының бұзылуына байланысты АҚШ-тың он бір штатында төтенше жағдай жарияланған. Вашингтон, Нью-Йорк және Филадельфиямен көлік қатынасы бұзылған. Ондаған мың тұрғын үй электр қуатынсыз қалған.
Вашингтонда жауған қардың қалыңдығы 60 сантиметрге жеткен. Қала метросы дүйсенбіге дейін жұмысын тоқтатқан. Сенбі күні Нью-Йоркке де қалың қар түскен.
Теңізде тұрған қатты желден Нью-Джерси мен Делавэрде біраз жерді су басқан.
Синоптиктер ауа райы жексенбіде қайта орныға бастайды деген болжам айтып отыр.