Алматы облыстық соты 23 қаңтар күні жезқазғандық белсенді Наталья Уласикті үйіне жақын жердегі ауруханада емделуіне рұқсат беріп, бірінші инстанцияда қабылданған сот шешімінің күшін жойды. Бұған дейін Талғар аудандық соты Уласикті Алматы маңындағы Ақтас психиатриялық ауруханасында күштеп емдеу мерзімін тағы да алты айға созу туралы шешім шығарған болатын. Бұл жайында Азаттыққа Наталья Уласиктің адвокаты Жанар Балғабаева хабарлады.
- Біз оның жақындарымен араласып тұруы үшін үйіне жақын мекемеде емделуі керегін және оны қатаң жағдайда ұстайтындай негіз жоқ, оның қауіпті адам емес екенін айттық. Бақытымызға орай, сот өтінішті қанағаттандырды, - дейді адвокат Жанар Балғабаева.
Оның айтуынша, Уласик ауыстырылатын Қарағандыдағы ауруханадағы жағдай Ақтасқа қарағанда жақсырақ және туыстарының да онымен жолығып тұруына ыңғайлы.
Жанар Балғабаева белсендіге Адам құқығы жөніндегі қазақстандық халықаралық бюросы құқықтық жағынан көмектескенін айтты.
63 жастағы Наталья Уласик әлеуметтік желілерде билікті сынайтын жазбалар жариялаған. Жақындары Уласиктің мәжбүрлі түрде емдеу мекемесіне жіберілуіне оның билік туралы айтқандары себеп болды деп біледі.
Оқи отырыңыз: Наталья Уласикті мәжбүрлі түрде емдеу мерзімі ұзартылды
2016 жылдың қазан айында «жала жабу» айыбы бойынша айыпталған азаматтық белсенді Наталья Уласикті Жезқазған қалалық соты сот-медициналық сараптамасы оны ақыл-есі сау емес деп тапқан соң, қылмыстық жауапкершіліктен босатқан. Ол содан бері Ақтастағы науқастар жіті бақылауда болатын арнайы типтегі республикалық психиатриялық ауруханасында жатыр.