Шымкент қалалық полиция департаменті қаладағы жоғары оқу орындарының бірінде болған студенттер жанжалына байланысты түсініктеме берді деп хабарлайды ҚазТАГ агенттігі.
"Полиция қызметкерлері Шымкенттегі бір жоғары оқу орнының екі студенті арасындағы дау-дамай фактісін тексерді. Жанжалдың тұрмыстық сипатта болғаны анықталды. Іс сотқа дейінгі тергеп-тексерудің бірыңғай реестрінде Қылмыстық кодекстің 293-бап 2-тармақ 1-пункті бойынша ("Бұзақылық") тіркелді" делінген полиция хабарламасында. Полиция бұдан басқа ақпарат жарияламады.
Бұған дейін "жергілікті және Өзбекстаннан келген студенттер арасында жанжал болғаны" туралы ақпарат тараған.
Your browser doesn’t support HTML5
Студенттер арасындағы жанжалдың анық-қанығы
Әлеуметтік желіде тараған видеода Өзбекстаннан келген 1-курс студенттері оқу басталғалы бері жергілікті студенттерден қысым көріп келе жатқанын айтып, Өзбекстан елшілігінен көмек сұраған. Кейбір студенттердің Азаттыққа айтуынша, осы оқиғадан соң бір студент ауруханаға түскен. Біреуінің мұрны сынған. Университет басшылығы төбелестен соң полицияның 24 студентті алып кеткенін хабарлады.
Бұған дейін Қазақстандағы Өзбекстан елшілігі және бас консулдықтың жағдайды бақылауға алғаны хабарланған. УзТАГ агенттігінің жазуынша, министрліктің тапсырмасымен бас консулдық өкілдері Шымкентке барып, аймақ және университет басшылығы, өзбек студенттерімен кездесіп, мәселені талқылаған.