Қазақстан президенті Қасым-Жомарт Тоқаев Нұр-Сұлтанда төтенше жағдай жариялады. ТЖ режимі 5 қаңтар сағат 16.00-ден бастап, 19 қаңтар жарым түнге дейін күшінде болады. Қалада түнгі сағат 11 мен таңғы 7 аралығында коменданттық сағат енгізіледі.
Қала коменданты болып Нұр-Сұлтан қалалық полиция департаментінің төрағасы Ержан Сәденов тағайындалды.
Төтенше жағдай режимі кезінде қалада қоғамдық тәртіп күшейіп, астанаға кіріп-шығу шектеледі. Бұған қоса, митинг, шеру, қоғамдық шара өткізуге тыйым салынады.
Нұр-Сұлтан – наразылыққа байланысты Қазақстанда төтенше жағдай жарияланған төртінші өңір. Бұған дейін Алматы қаласы мен облысында, Маңғыстау облысында төтенше жағдай жарияланған.
2 қаңтарда Жаңаөзенде газ бағасына байланысты басталған наразылық бірнеше күн ішінде Қазақстанның барлық-дерлік өңіріне жайылған. Бастапқыда газдың бағасын арзандатуды талап еткен наразылар кейін саяси талаптар айта бастады. Олардың арасында Нұрсұлтан Назарбаевтың биліктен толық кетуі, "саяси тұтқындарды" босату сияқты талаптар бар.
5 қаңтарда Алматыда бірнеше мың адам Республика алаңында әкімдікті басып алып, ғимарат өртенді. Полиция наразыларды тарату үшін көзден жас ағызатын газ шашты. Резеңке оқ атты. Нақты қанша адамның жарақаттанғаны белгісіз.