Өзбекстан билігі ресейлік олигарх Әлішер Османов ел экономикасына инвестиция салып жатқанын алға тартып, Еуроодақтан оны санкцияға ілінген азаматтар тізімінен алып тастауын сұраған. Бұл жөнінде Financial Times басылымы жазды.
Газет дереккөзінің айтуынша, жуырда өзбек үкіметі Еуроодақ өкілдерімен кездескен кезде аталған мәселені қозғаған.
FT мәліметінше, Ташкент сонымен бірге оның қарындасы Гүлбахар Исмаиловаға салынған санкцияларды да алып тастауды сұраған. Бұдан бөлек 600 млн доллар тұратын "Дилбар" суперяхтасын бұғаттан шығаруды өтінген.
Financial Times Өзбекстан СІМ-ге араша түсуінің себебін сұрап, хат жолдаған. Министрлік "Өзбекстан үкіметінің әрекетіне пікір білдіре алмайтынын, бірақ бұл санкциялар бизнесменге елге инвестиция жасауға кедергісін келтіріп жатыр" деп жауап берген.
Әлішер Османов Ресейдегі ең бай адамдардың бірі. Forbes оның байлығын 11,5 миллиард долларға бағалаған. Ақпан айының соңында Ресей Украинаға басып кіргеннен кейін, ресейлік шенеунік, бақуатты адамдармен бірге Батыс және АҚШ-тың санкциясына іліккен.
Оны санкциядан алып тастау жөнінде Венгрия билігі де өтініш түсірген.
ОҚИ ОТЫРЫҢЫЗ
WSJ: Әлішер Османов Батыстағы инвестициясын офшорда жасырып, санкцияларды айналып өткенНеміс полициясы ресейлік миллиардер Әлішер Османовтың Германиядағы үйлерін тінттіИталияда Путинге тиесілі деп айтылатын яхта тұтқындалды