Мәскеудегі Мосфильм көшесіндегі бір ғимаратқа дрон түскен, ешкім жапа шекпеген. Бұл туралы 4 мамыр күні қала мэрі Сергей Собянинге сілтеп Interfax агенттігі хабарлады.
Агенттіктің жазуынша, Собянин 3 мамыр күні Мәскеу бағытында ұшқан сегіз украин дроны құлатылғанын мәлімдеген. Ал 2 мамыр күні Мәскеу облысында алты украин дроны жойылған. Салдарынан бір адам қаза тапқан.
3 мамырға қараған түні украин дрондары Ресейдің бірқатар өңіріне, соның ішінде Мәскеу және Ленинград облыстарына шабуылдаған. Кейінірек Украина президенті Владимир Зеленский украин күштері Ресейдің Ленинград облысында орналасқан Приморск портындағы "Қарақұрт" ракеталық кемесіне, күзет қайығына және тасадағы флоттың 2 танкеріне соққы жасағанын мәлімдеді.
Ресей бұл шабуыл туралы мәлімдеме жасай қоймады, ал Зеленский айтқан жайттардың тәуелсіз дереккөз арқылы растау мүмкін болмады. Спутник деректері мен тараған видеолар портта өрт шыққанын көрсеткен.
Жексенбіге қараған түні Ленинград облысында 59 дрон құлатылған. Бұл туралы облыс басшысы Александр Дрозденко мәлімдеді. Жапа шеккендер туралы хабар жоқ. Жергілікті тұрғындар дрон немесе жарылыс дыбысын естігенін айтқан.
Ресей қорғаныс министрлігінің хабарлауынша, 3 мамырға қараған түні Ресейдің 15 аймағында және аннексияланған Қырым түбегінде барлығы 334 украин дроны құлатылған. Бұл деректерді тәуелсіз дереккөз арқылы растау қиын.
Мәскеу облысы Волоколамск округі Чернево ауылында дрон шабуылынан 77 жастағы тұрғын қаза тапқан.
Росавиация Мәскеудегі Шереметьево және Внуково әуежайларына және Санкт-Петербургтегі Пулково әуежайына уақытша шектеу енгізіп, ондаған рейс кешіктірілді не тоқтатылды.
Кейінгі күндері Украина күштері Ресейге шабуылын үдетіп отыр. Соққы көбінесе порттарға жасалып жатыр. 30 сәуірге қараған түні Ресейдің Краснодар өлкесіндегі портты қала Туапсеге бір ай ішіндегі төртінші соққысын жасады. Порттағы мұнай кешенінде өрт шығып, қоршаған мұнай ағылып, қаланы түтін басқан.
Украина шабуылдары Жеңіс күні қарсаңында жасалып отыр. 9 мамыр күні Мәскеудегі Қызыл алаңда әскери парад өтпек. Бірақ бұл жолы онда әскери техника көрсетілмейді, шараның өзі бір сағатқа жетпейді. Ресей президентінің баспасөз хатшысы Дмитрий Песков парад ауқымының тарылуына Украинадан төнген қауіп себеп екенін мәлімдеді. Сәуірдің аяғында Ресей президенті Владимир Путин АҚШ басшысы Дональд Трамппен сөйлесіп, Жеңіс күнін атап өту кезінде атысты тоқтата тұруды ұсынған.
Украина президенті "атысты тоқтату тактикалық алдауға айналмағаны" дұрыс деп мәлімдеді.
"Олар парад бірнеше сағат бойы тыныш өткенін, одан кейін шабуылды қайта бастауды көздеп отыр. Біз атысты тоқтату Ресей Федерациясы тарапынан тактикалық алдауға айналғанын қаламаймыз" деп келтірді Зеленскийдің сөзін "Украинская правда" басылымы.