2026 жылы Ресейдегі ең ауқатты адамдар соғыс кезіндегі «өтеусіз жарна» ретінде Ресей бюджетіне 471 миллиард рубль немесе 5,6 миллиард доллардан астам қаражат аударды. Бұл сома үкіметтің барлық шығынының 1%-дан астамын өтейді. Reuters есептеуінше, ірі бизнестің ақшасынсыз Ресейдің бюджет тапшылығы қазіргі уақытта ЖІӨ-нің 3,4%-ын құрайтын еді. Қазір бұл көрсеткіш ЖІӨ-нің 3,2%-ын немесе 7,3 триллион рубльді құрап отыр
Жарна мәселесі наурыз айында Ресей президенті Владимир Путин мен ресейлік кәсіпкерлер арасындағы жабық кездесуде талқыланды, олардың көпшілігі Батыс санкциясына ілінген. The Bell жазуынша, Путинге жарна идеясын «Роснефть» басшысы ұсынған. Басылымның мәліметінше, олигарх және сенат депутаты Сулейман Керімов бірден 100 миллиард рубль бөлуге уәде берді, кем дегенде тағы бір танымал бизнесмен де идеяны қолдаған. The Financial Times хабарлауынша, бизнесмен Олег Дерипаска да қайырымдылық жасауға келіскен. Қыркүйек айында Путин сол кездесуден кейін олигархтар бюджетке «жүздеген миллиард» рубль аударғанын мәлімдеді.
Алайда Кремль Путин кәсіпкерлерден қаржы құюды сұрағанын жоққа шығарады. Кремльдің баспасөз хатшысы Дмитрий Песковтың айтуынша, қатысушылардың бірі «өте үлкен сома» құюды ұсынған, – көптеген ауқатты ресейліктер 1990 жылдары мемлекетпен байланыстарының арқасында байығанын атап өткен және Путин бастаманы қолдаған.
Бюджеттік құжаттарда «ерікті қайырымдылық» деп сипатталған қаражат корпорациялардың артық пайда салығынан түсетін кірісінен асып түсті, оны негізінен металлургиялық компаниялар мен тыңайтқыш өндірушілер төледі деп атап өтті Reuters.