Омбы соты Ресей басшысы Владимир Путинді Адольф Гитлермен салыстыратын мемдерге тыйым салды. Сот сондай сурет жарияланған оннан астам парақшаға шектеу қойды деп жазды "Вёрстка" басылымы.
Кей жағдайда Путиннің суретіне Гитлердің мұрты мен кекілін жапсырып қойған өңделген суреттерге тыйым салынған. Тағы бір жағдайда сот "Путлер капут" деген жазуы бар суретті шектеген.
Суреттердің көбі наразылық акциялары кезінде түсірілген және ондағы жазу наразылардың қолындағы плакатта тұр. Мысалы, сот "Путлер, қорғасын бергенге дейін у ішіп ал" ("Путлер, выпей яду, пока не угостили свинцом") деген жазуы бар әйел көрінетін блогер Илия Варламовтың суретіне тыйым салған.
Бұған қоса, сот Стихи.ру сайтында жарияланған Путиннің басына тапанша тақаған суретке де шектеу қойды. Онда "Ресейді масқарадан қалай құтқару керек" ("Как спасти Россию от позора") деген жазу бар.
Суреттерге тыйым салуды Омбы прокуратурасының қызметкерлері талап еткен. Олардың пікірінше, суреттер "мемлекет пен қоғамның мүддесіне теріс әсер етіп, белгісіз топтарды террористік әрекетке, қылмысқа итермелейді".