Ресейдің БҰҰ-дағы өкілі Василий Небензя БҰҰ Қауіпсіздік кеңесі отырысында атысты тоқтату режимі кезінде Батыс елдері - Украинаны қару-жарақпен қамтамасыз етуді, ал Украина мобилизацияны доғаруы керек деп мәлімдеді.
Небензяның сөзінше, Киевпен тараптардың талаптары жазылған меморандуммен бөлісу үшін Мәскеу дүйсенбі күні Стамбұлда келіссөздің екінші кезеңін өткізуге дайын. Дегенмен ол сөз арасында "қанша қажет болса, сонша соғысамыз" деді.
АҚШ-тың БҰҰ Қауіпсіздік кеңесіндегі өкілі "Ресей бейбітшілікке мүдделі емес және оның орнына әскери жеңіске қол жеткізуге ұмтылып жатыр" деген кеңестің өзге мүшелерінің алаңдаушылығымен келісетінін жеткізді.
Бұған дейін Украина президенті кеңсесінің жетекшісі Андрей Ермак Киев делегациясы Стамбұлдағы келіссөздің екінші кезеңіне дайын деп мәімдеген еді. Бірақ Киев Мәскеуден соғысты бейбіт түрде реттеу шарттары жазылған меморандумды әлі күтіп отыр деген. Ермактың сөзінше, Киев конструктивті диалогқа мүдделі және оны құжатсыз жүзеге асыру мүмкін емес. Украина осыған дейін өзінің меморандумын Ресей жағына бергенін айтқан.
Ресейдің ресми тұлғалары "меморандум дайын" екенін және жуырда Украина жағына берілетінін айтқан.
Ресей сыртқы істер министрлігінің ресми өкілі Мария Захарованың айтуынша, ресейлік делегация Стамбұлға тек меморандум жобасын ғана емес, сонымен бірге атысты тоқтату бойынша өзге де ұсыныстарды апармақ. Бірақ жай-жапсарын айтпады.
Кремльдің баспасөз хатшысы Дмитрий Песков жұма күні журналистерге Стамбұлдағы келіссөзге дейін екі жақтың да атысты тоқтату шарттары құпия сақталатынын жеткізді.
- Ресей мен Украина делегацияларының алғашқы келіссөзі биыл 16 мамырда Стамбұлда өткен. Соның нәтижесінде екі жақ "1000-ға 1000" форматы аясында тұтқын алмасты. Тұтқын алмасу 23-25 мамырда өтті. Бұған қоса, екі жақ атысты тоқтату шарттарын әзірледі.
- Кейін Украина бейбітшілік шарттары жазылған меморандумды АҚШ пен Ресейге тапсырғанын хабарлаған.