Британдық ВВС медиакорпорациясының екі топ-менеджері – бас директор Тим Дэйви мен жаңалықтар қызметінің жетекшісі Дебора Тернесс – АҚШ президенті Дональд Трамптың сөзін бұрмалауға қатысты айыптаулардан кейін қызметтен кетті.
Тим Дэйви ұжымға жолдаған хатында корпорация жұмысында "бірқатар қателік жіберілгенін" мойындап, ол үшін толық жауапкершілікті мойнына алатынын мәлімдеді. Ол әсіресе жаңалықтар бөлімі жайлы "пікірталастарды" атап өтті.
Дебора Тернесс Трамптың сөзін өңдеуге қатысты бағдарлама төңірегіндегі ұзаққа созылған дау шегіне жетіп, "BBC беделіне нұқсан келтіре бастағанын" айтты.
"Президент Трамп туралы бағдарлама төңірегінде болып жатқан пікірталас BBC-ге, өзім шын жүректен жақсы көретін ұйымға нұқсан келтіретін деңгейге жетті. Иә, қателіктер жіберілгені рас, бірақ BBC News бейтарап болмады деген айыптаулар орынсыз. Ал қателіктерге жауапкершілікті мен мойыныма аламын", – деген Тернесс.
Бұл дауға былтыр BBC арнасында эфирге шыққан "Трамп: Екінші мүмкіндік пе?" атты бір сағаттық бағдарлама себеп болған. Онда Трамптың 2021 жылғы 6 қаңтарда — Вашингтондағы Конгресс ғимаратында болған тәртіпсіздіктер қарсаңында — сөйлеген сөзі өңделіп берілген. Бағдарлама көрерменге Трамп тәртіпсіздікке тікелей шақырғандай әсер қалдырған.
Нақтысында Трамп сол күні: "Біз Капитолийге барып, өзіміздің батыл сенаторлар мен конгрессмендерімізді жігерлендіреміз", — деп мәлімдеген. Алайда бағдарламада оның сөзіне кейінірек айтқан: "Біз Капитолийге барамыз... сіздермен бірге мен де барамын. Және біз күресетін боламыз. Бар күшімізбен шайқасамыз" деген сөзі қосылып берілген.
BBC кейін түсіндірме жариялап, Трамптың сөйлеген сөзінің арасы 50 минуттен асатын екі бөлігі монтаж кезінде өңделгенін айтты. Медиакорпорация бағдарламаны тәуелсіз продакшн-компания жасаған деп мәлімдеді.
Президент Трамп BBC топ-менеджерлерінің қызметтен кетуін оң шешім деп қабылдап, оларды "сыбайласқан журналистер" деп атады.
"Тим Дэйви бастаған BBC-дің жетекшілері қызметтен кетіп жатыр, өйткені олар менің 6 қаңтардағы таңғажайып сөзімді бұрмалаған. Әшкере болды", – деді АҚШ президенті.
BBC-дегі қызметінен кетіп жатқан журналистер ешқандай сыбайластық жоғын айтады. Тим Дэйви BBC-дің бас директоры қызметіне 2020 жылғы қыркүйек айында тағайындалған. Оған дейін жеті жыл бойы корпорацияның коммерциялық бөлімшесі — BBC Studios-ты басқарған. Ол BBC-де жиынтығы 20 жыл қызмет істеген. Дебора Тернесс BBC News бөлімін 2022 жылдан бері басқарып келген.