Йемен билігінің мәлімдеуінше, шииттік хути қарулы жасақтары Санадағы президент резиденциясын атқылап, ғимараттың ішіне кірген. Ақпарат министрі Надия әл-Саккаф Twitter-де шиит жасақтарының шабуылы қаңтардың 20-сы күні түстен кейін басталғанын хабарлады. Кейбір ақпараттар бойынша, президент Абд-Раббу Мансур Хади резиденцияда отыр.
Санада қаңтардың 19-ынан бері қарулы қақтығыс жүріп жатыр. Билік шабуылды "мемлекеттік төңкеріс жасау әрекеті" деп бағалады.
Йеменнің әскери басшылығы көтерілісшілер президент резиденциясындағы қару-жарақ қоймасына жеткенін айтады.
Йеменнің солтүстігіне бекінген хути жасақтары былтыр қыркүйекте Сананы бақылауға алған.
