Accessibility links

Шымкенттік белсенділерге 21 мамырда митингке рұқсат бермеді


Шымкенттік белсенді Ибраһим Әлсерке. Шымкент, 3 мамыр 2016 жыл.

Шымкенттік белсенді Ибраһим Әлсерке. Шымкент, 3 мамыр 2016 жыл.

Шымкенттік белсенділерге 21 мамыр күні «Қазақстан жерін сатуға және шетелдіктерге 25 жылға жалға беруге қарсы» митинг өткізуге рұқсат бермеді деп хабарлайды Азаттыққа белсенді Ибраһим Әлсерке.

Белсендінің сөзінше, бүгін Шымкент қаласының әкімдігінен 21 мамыр күні митинг өткізуге жазылған өтінішіне жауап хат келген.

- Хатта біз сұраған Абай саябағындағы Даңқ мемориалының алаңшасында "Тәуелсіздіктің 25 жылдығына орай шара өткізу жоспарланғандықтан рұқсат бере алмайтыны" жазылған, - дейді белсенді. Ол сонымен бірге хатта митинг өткізудің тәртібі де ескертілгенін де айтады.

- Хатта белсенділермен қала әкімінің кездескені, жер заңына мораторий енгізілгені, қоғамдық комиссия құрылғаны қоса хабарланған. Егер митинг өткізген жағдайда заң бойынша жауапқа тартылатыны ескертілген, - дейді Ибраһим Әлсерке.

Ибраһим Әлсерке ендігі кезекте әкімдіктің үстінен сотқа шағым түсіретіндерін, митинг өткізу туралы өтініштерінде сұралған жер берілмеген жағдайда Ордабасы алаңына жиналатындарын әкімдікке алдын-ала ескерткендіктен 21 мамыр күні митингке шығатындарын мәлімдеді.

Белсенділер 3 мамырда 21 мамыр күні «Қазақстан жерін сатуға және шет мемлекеттердің азаматтарына, азаматтығы жоқ адамдарға 25 жылға жалға беруге болмайтындығы туралы халықтың наразылығын жеткізу мақсатында» митинг өткізуге қала әкімі Ғабидолла Әбдірахымовтың атына өтініш тапсырған еді.

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

XS
SM
MD
LG