Accessibility links

Алматы облысында лайлы сел тасқыны жүріп өтті.


Маусымның 8-інде болған нөсер жаңбыр мен бұршақтың салдарынан Алматы облысы Райымбек ауданындағы Жаңа Текес елді мекенінде лайлы сел тасқыны жүріп өткен.

Бұл туралы дүйсенбі күні ҚР төтенше жағдайлар жөніндегі агенттігінің баспасөз қызметінен хабарланды. Таратылған ақпаратқа қарағанда, сел тасқынының биіктігі 1,5-2 метрге жеткен. Ондағы 64 үйдің жартысынан астамы сел салдарынан зардап шегіп, үйлердің шатырлары мен терезелері қираған, сылақтары құлаған.

Ауыл көшелері мен үйлердің аулаларын бір метрлік лай тұнбалары басып қалса, Текес – Сарыбастау жолының 1 шақырымдай бөлігі толық істен шығыпты. Бес инженерлік құрылым бұзылып, Кеген-Нарынқол күре жолының біраз бөлігін су шайып кеткен.Сондай- ақ осындағы орта мектеп ғимараты да қатты зардап шеккен көрінеді. “Сейдін” атты жанар-жағармай құю стансасында 3 цистерна құлап, оның біріндегі 3 тоннадай бензин төгілген. Орын алған сел салдарынан сонымен қатар 15 ірі қара мал, 50-ден астам қой-ешкі өлген, адам шығыны жоқ. Агенттіктің хабарлауынша, апат аймағында алда жөндеу-қалпына келтіру жұмыстары жүргізілетін болады, ал қазір онда арнайы комиссия келтірілген зиянның көлемін анықтау үстінде.

AzattyqTV

XS
SM
MD
LG