Қырғызстанның бұрынғы Бас прокуроры Ә.Бекназаров оппозиция жағына өтті

БІШКЕК. Бүгін Қырғызстанның бұрынғы Бас прокуроры Ә.Бекназаров өзінің сыбайластық жемқорлыққа қарсы күресіп келгенін, бірақ ақыр аяғында жемқорлықтың өзін жеңгенін мәлімдеді. Қырғыз президенті Қ.Бәкиев оны Бас прокурор лауазымынан кеше босатты. Ә.Бекназаров - экс-президент А.Ақаевтың тұсындағы бұрынғы премьер-министр Н.Танаев, А.Ақаевтың өз ұлы Айдар сынды тұлғаларға қарсы қылмыстық істер қозғап, тергеу жүргізе бастаған-ды. Ол - А.Ақаевты биліктен құлатқан төңкерісте жетекші рөл атқарды. Ә.Бекназаров президентке қарсы оппозицияға қосылатынын мәлімдеді. Бас прокурорлыққа президент әкімшілігінің қызметкері Бұсырманқұл Табылдиев тағайындалды.