Израиль сайлауында "Кадима" центристік партиясы жеңді

Израиль бас министрі қызметін атқарушы Ехуд Олмерт парламенттік сайлауда "Кадима" центристік партиясы жеңді деп мәлімдеді. Бұл партияны қатты науқастанарының алдында бас министр Ариель Шарон құрған болатын. "Кадима" партиясы парламенттегі 120 мандаттың ішінен шамамен 32 мандат алса үкімет коалициясын құруға құқылы болмақ. Ехуд Олмерт Батыс Жағалаудан кейбір еврей қоныстарын шығарып, есесіне Палестина мен Израиль арасында түпкілікті шекараны белгілеу керек деді кеше Иерусалим қаласында сөйлеген салтанатты сөзінде.