Ауғанстандағы НАТО күштері 21 бейбіт тұрғынды қырғанын әзірше мойындамады

КАБУЛ: Ауғанстанның оңтүстігіндегі Гильменд облысының әкімі халықаралық НАТО күштерін бейбіт халықты қырды деп айыптады. Әкімнің сөзіне қарағанда, сәрсенбіге қараған түні НАТО-ның соғыс ұшақтары Сангин ауданындағы ауылдың күл-талқанын шығарып, нәтижесінде ауылдың 21 тұрғыны, оның ішінде балалар мен аналары құрбан болды. НАТО күштерінің басшылығы, әзірше, әлгі ауданда шынында да соғыс операциясының болғанын және оның барысында 1 жауынгерінің қаза болғанын ғана хабарлап отыр. Ауған үкіметі соңғы 2 аптаның ішінде НАТО әскерінің соққысынан 90-ға жуық адамның қырылғанын есептеді.