Accessibility links

ЖАҢАЛЫҚТАР

Иранда оппозиционерлердің балаларынан жауап алынды

Иран оппозициясы жетекшілері Мир Хусейн Мусави (оң жақта) мен Мехди Карруби.
Иран билігі оппозицияның жетекшілері - бұған дейін президент сайлауына түскен саясаткерлер Мир Хусейн Мусави мен Мехди Каррубидің балаларын қамаудан босатты.

11 ақпанда қауіпсіздік қызметі Мусавидің қыздары Наргез бен Захраның үйлерін тінтіп, оларды тергеуге әкеткен еді. Бұдан соң полиция Каррубидің ұлы Мохаммад Хусейн Каррубидің үйіне де тінту жүргізіп, оны да ұстап әкеткен. Ресми орындар ақпарат құралдарына оппозиционерлердің балаларын "кейбір сұрақтарға түсінік алу үшін" ұстап әкеткенін хабарлаған.

Мусави мен Каррубидің балалары әкелерін үйқамақтан босатуға тырысып жүрген еді.

Екі оппозиционер де 2009 жылы өткен президент сайлауына қатысып, "сайлау бұрмаланды" деп сынаған соң билік оларды 2011 жылдан бері үйқамаққа алған.

11 ақпанда БҰҰ сарапшылары да Тегераннан Мусави мен Каррубиді үйқамақтан босатуды сұрады.

Басқа да жаңалықтар

Израильдің премьер-министріне жемқорлық бойынша айып тағылды

Израильдің премьер-министрі Биньямин Нетаньяху.

Израильдің бас прокуратурасы премьер-министр Биньямин Нетаньяхуға "жемқорлық" бабы бойынша айып тақты. Үкімет жетекшісі жақын арада мәлімдеме жасайды.

Премьер-министрге үш іс бойынша айып тағылатыны ақпан айында белгілі болған. Ол кезде прокурорлар Нетаньяхудың кәсіпкерлерден шамамен 300 мың доллар көлемінде сыйлық қабылдағанын айтқан. Сонымен бірге баспасөзде өзі туралы жағымды жаңалық көп болуы үшін медиабизнес өкілдерінің ұсынысын орындағанын айтқан. Ал Нетаньяху тағылған айыпты жоққа шығарған.

Нетаньяхудың айыпталғаны жайлы хабар Израильдегі саяси дағдарыспен тұспа-тұс келіп тұр. Қыркүйек айында қайта парламент сайлауы өткенмен жаңа үкімет жасақталмады. Коалиция құруға тырысқан Нетаньяхудың сәтсіз талпынысынан кейін Бени Ганц жетекшілік ететін оппозиция өзге партиялармен келіссөз жүргізе бастады. Егер ол келісім жасай алмаса, Израильде үшінші рет қайта сайлау өтпек.

Аудандық сот қарағандылық белсендінің үкіметке түсірген шағымын қарамады

Әлия Садырбаева.

Қарағанды қаласы Қазыбек би аудандық №2 соты белсенді Әлия Садырбаеваның үкіметтің үстінен түсірген шағымын қараудан бас тартты.

"Қарағанды қаласы Қазыбек би аудандық №2 сотының шағымданушы арызы қарауға құқығы жоқ. Шағымданушы жауап беруші орналасқан жердегі сотқа арызлана алады" деп жазылған соттың анықтамасында.

Белсенді сот арқылы пайдалы қазбалардан түскен қаржыны халыққа беруді заңға енгізуді; Ұлттық қорға қанша ақша түскенін, ол қаржының қаншасы халық игілігіне жұмсалғанын жариялауды; үкіметке халықты масыл деп айыптауға тыйым салуды талап еткен. Садырбаева сотқа жазған арызында биліктен "ұлттық компаниялардың қанша қаржысы шетелдегі банктерде жатқаны туралы ақпаратты ашуды" сұраған.

Белсенді өзі тұрып жатқан жердегі сотқа шағымдануға құқығым бар деп санайды. Ол "Нұр-Сұлтанға барып, сол жақтағы сотқа арызданатынын" айтты.

Қыркүйекте Садырбаева Қарағандыда жергілікті белсенділермен Қазақстанның Қытайдағы жобаларына қарсы наразылыққа шыққан. Қарағандылық белсенділер облыстағы вольфрам-молибден кенішінің Қытай инвесторларына "берілгеніне" қарсы болған.

Қазақстандық "Тау-Кен Самұрық" ұлттық компаниясы Қытайдың

Xiamen Tungsten Co.Ltd компаниясымен Қарағанды облысындағы – Жоғарғы Қайрақты және Солтүстік Қатпар кенішін игеру туралы келісімге келген. Қазір жоба бойынша геологиялық-экологиялық және техникалық-экономикалық зерттеу жүріп жатыр. Кен игеру әлі басталған жоқ.

ОСК референдум өткізуді ұсынған топтың өтінішін қарастырмақ

Референдум өткізуді ұсынған азаматтар жиыны. Нұр-Сұлтан, 10 қараша 2019 жыл.

21 қарашада Қазақстан орталық сайлау комиссиясы бастамашыл топтан референдум өткізу туралы өтініш келіп түскенін хабарлады. Бастамашыл топ референдум арқылы "Сайлау туралы" және "Саяси партиялар туралы" заңды өзгертуді көздейді.

ОСК бастамашыл топтан тіркеу туралы өтініш, 62 адам қатысқан референдум ұйымдастыру туралы 10 қарашада өткен жиналыстың хаттамасын қабылдап алғанын мәлімдеді. Комиссияға өтінішті бастамашыл топ өкілдері Нұрлан Ысқалиев, Ақмарал Әбдіхалықова тапсырған.

Орталық сайлау комиссиясы бастамашыл топтың өтінішін "Референдум өткізу" туралы заңға сай қарайтынын хабарлады.

10 қарашада Нұр-Сұлтанда бір топ белсенді жиын өткізіп, "Сайлау туралы" және "Саяси партиялар туралы" заңды өзгерту үшін референдум өткізу мәселесін талқылаған. Ұйымдастырушылар жиынға әр облыстан 500-дей адам келгенін айтқан.

Белсенділер референдумда мына екі мәселені дауысқа салғысы келеді:

  • "Сайлау туралы" заңға өзгеріс енгізу. "Бір мандатты округтер бойынша сайлау жүйесін енгізуге келісесіз бе?"
  • "Саяси партиялар туралы" заңға өзгерту енгізу. "Саяси партияларды тіркеу кезінде оның мүшелірінің санын 40 мың адамнан бір мыңға дейін азайтуға келісесіз бе?"

Нұр-Сұлтандағы жиында белгісіз бір адам "жиналыстың заңдылығына күмән келтіріп", дауласқан еді. Жиынға наразылық білдірген қатысушыны залдан күштеп шығарған.

Видео: Бастамашыл топтың жиыны қалай өтті?

Референдум бастамасы қолдау таба ма?
please wait

No media source currently available

0:00 0:02:35 0:00

"Референдум өткізу туралы" заңға сай, ОСК бастамашыл топтың өтінішін бес күнде қарап, топты және референдумға ұсынылған мәселені тіркейді. Егер ОСК тіркеуден бас тартса, бастамашыл топ он күн ішінде Жоғарғы сотқа шағымдана алады. Ал тіркеген жағдайда бастамашыл топ қол жинауды бастайды. Қол жинау процесі заңға сай өтсе, референдум ұйымдастыру туралы өтініш президенттің қарауына жіберіледі.

Тоқаев оқушыны зорлау оқиғасынан соң Тараз әкімін жұмыстан қуды

Қайрат Досаев (сол жақта) Тараз тұрғындарымен кездесіп отыр. (Сурет Тараз қаласы әкімдігінің сайтынан алынды).

Қазақстан президенті Қасым-Жомарт Тоқаев Тараздағы мектептердің біріндегі дәретханада 12 жастағы қызды зорлау оқиғасынан кейін қала әкімі Қайрат Досаевты қызметінен босатуды бұйырды. Тоқаев Twitter парақшасында Жамбыл облысының әкімі Асқар Мырзахметовке ескерту жасағанын да хабарлады.

Тоқаев твитінде "Досаев жұмысында жүйелі кемшіліктер жіберген" деп те жазды. Артынша Жамбыл облысының әкімдігі Досаевтың жұмыстан босатылғанын, оның орынбасары Бейсенбек Жанбосынов әкім міндетін уақытша атқаратынын хабарлады.

Қайрат Досаев Тараз қаласының әкімі болып биыл сәуірде тағайындалған.

Қараша айының ортасында Таразда ер адам мектептердің бірінде ауладағы дәретханаға сабақ кезінде сұранып шыққан 7-сынып оқушысын зорлаған. Бұл оқиғадан кейін мектептің бірнеше қызметкері жұмыстан қуылған. Полиция 38 жастағы ер адамның ұсталғанын, оның бұрын сотталғанын хабарлады.

Дәрігерлер Қызылордада көлік қаққан екі адамның жағдайын ауыр деп бағалайды

Көрнекі сурет.

Дәрігерлер Қызылордада аялдамада тұрғанда көлік қаққан екі адамның жағдайы өте ауыр екенін айтады. Қызылорда облыстық денсаулық сақтау басқармасы жетекшісінің орынбасары Олжас Ысқақовтың сөзінше, ауруханаға түскен екі адам "политравма және травматикалық шок" алған. Олар қазір ессіз күйде жатыр. Жағдайлары өте ауыр. Олардың бірі - 10 жаста.

"Ол қазір облыстық балалар ауруханасында жатыр. Барлық қажетті процедуралар жүргізілді. Реанимация бөлімінде жатыр. Жағдайы өте ауыр" деді Олжас Ысқақов. Оның айтуынша, 1988 жылғы екінші пациент қалалық ауруханада жатыр.

21 қарашада таңертең Қызыордада Назарбаев даңғылында "Тойота Камри" мен "Мерседес Бенц" көлігі соқтығысып, "Тойота" жүргізушісі "көлігін басқара алмай, автобус аялдамасында тұрған адамдарды соққан". Үш адам сол жерде қайтыс болған. Екі адам ауруханаға жеткізілген.

Полиция апат орнынан жүргізушіні ұстап, уақытша қамау изоляторына қамаған. Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы" бабы (345-бап) бойынша қылмыстық іс қозғаған. Сараптама тағайындалған.

Еуропа одағы статистика қызметінің дерегінше, Қазақстан жол апаты көп болатын әлемдегі бес елдің қатарына енеді. Жол ережесін сақтамау және жол сапасы – көлік апаттарының негізгі себебі.

Жемқорлыққа қарсы іс-қимыл агенттігі "Мәнізоров ісі" туралы айтты

Бағдат Мәнізоров.

Жемқорлыққа қарсы іс-қимыл агенттігінің өкілі Данияр Бекайдаров Алматы облысы әкімінің орынбасары "Бағдат Мәнізоровтың ісін" тоқтатқан бас прокуратураның келтірген дәлелдерін зерттеп жатқанын айтты. Оның айтуынша, "істі тоқтату" туралы шешімді бас прокурордың орынбасары қабылдаған.

"Егер бұл істің жай-жапсарына тоқталсақ, Мәнізоровқа қатысты қылмыстық іс екі азаматтың шағымы негізінде қозғалды. Олар Мәнізоровтың жемқорлық әрекетіне шағымданды. Бас прокуратура шешімінің логикасына сүйенсек, қазір біз бұл лауазымды тұлғаларды Мәнізоровқа қарсы жалған куәлік бергені үшін жауапқа тартуымыз керек. Қазір бас прокуратураның келтірген дәлелдерін зерттеп жатырмыз. Оны қарап болғаннан кейін [шешімге] протест жасау мәселесі қарастырылады" деді ол.

Қазан айының басында сыбайлас жемқорлыққа қарсы іс-қимыл агенттігі Алматы облысы әкімінің орынбасары Бағдат Мәнізоровтің "Алаяқтық" бабы бойынша (Қылмыстық кодекстің 190-бап, 4-бөлім 2-тармағы) күдікке ілінгенін, тергеу жүріп жатқанын хабарлаған. 28 қазанда Мәнізоровқа тағылған айыптың алынғаны белгілі болды.

Бас прокуратура "қылмыс құрамы жоқ болғандықтан" Мәнізоровтың ісі тоқтатылғанын хабарлады. Кейінірек жемқорлыққа қарсы іс-қимыл агенттігі бас прокуратура шешімімен келіспейтінін мәлімдеп, шағым түсірген. Бірақ бас прокуратура шағымды қанағаттандырмады. Өткен аптада жергілікті БАҚ-қа сұхбат берген шенеунік өзіне жала жапқанын айтты.

Ал жемқорлыққа қарсы іс-қимыл агенттігінің төрағасы Алик Шпекбаев Tengrinews агенттігіне берген сұхбатында ешқандай "тапсырыс" болмағанын жеткізді.

Бұған дейін жергілікті БАҚ интернетте Бағдат Мәнізоровтің "күмәнді әрекеті" жайлы видео тарағанын да жазды. Адвокаты Алмас Демесінов видеоның монтаждалғанын айтып, Мәнізоровтің "жемқорлыққа" еш қатысы жоғын жеткізген.

57 жастағы Бағдат Мәнізоров Алматы облысы әкімінің орынбасары қызметіне биыл 10 шілдеде тағайындалған. Одан бұрын Алматы қалалық мемлекеттік сәулет-құрылыс бақылау басқармасын екі жыл басқарды. 2008-2017 жылдары Алматы қаласы Алатау ауданының әкімі болды. Жергілікті БАҚ-тың болжауынша, оған тағылған айып сәулет-құрылыс бақылау басқармасын басқарған кездегі қызметімен байланысты болуы мүмкін.

"Заңсыз бүйрек алмастырды" деп күдікке ілінген шымкенттік дәрігер екі айға қамалды

Шымкенттегі №1 қалалық клиникалық ауруханасы.

"Заңсыз бүйрек алмастырды" деп күдікке ілінген Шымкенттегі №1 қалалық клиникалық ауруханасының бас дәрігері Абылай Донбай екі айға қамалды. Бұл туралы 21 қараша күні Азаттыққа Нұр-Сұлтан қалалық сотының өкілі Ботагөз Баянова айтты.

Ботагөз Баянованың айтуынша, 20 қарашада Нұр-Сұлтан қаласының мамандандырылған ауданаралық тергеу соты күдікті Абылай Донбайды екі ай мерзімге қамау туралы қаулы шығарған. Қаулы әзірге заңды күшіне енбеген.

19 қарашада ішкі істер министрлігі Абылай Донбайдың үстінен Қылмыстық кодекстің "Трансұлттық қылмыстық топ жұмысына араласу" және "Адам мүшелерін заңсыз саудалау" бабы бойынша қылмыстық іс қозғалғанын хабарлаған. Ведомство Абылай Донбайдың бүйрек алмастыру операцияларын қомақты қаржыға заңсыз жасағанын мәлімдеген.

Шымкент қалалық денсаулық сақтау басқармасы баспасөз қызметінің дерегінше, Абылай Донбай 2019 жылдың наурыз айында Шымкенттегі №1 қалалық клиникалық ауруханасының бас дәрігері қызметіне тағайындалған.

Басқарма дерегінше, Шымкентте 2013 жылдан бері дәрігерлер бүйрек алмастыру операциясын жасай басталған. 2014 жылдан бастап қазірге дейін 106 бүйрек алмастырылған. Қазіргі уақытта төрт науқас туыстарының бүйрегін трансплантациялауға дайындалып жатыр. Бірақ Шымкент қалалық қоғамдық денсаулық сақтау департаменті органдар мен тіндерді трансплантациялауға санаулы дәрігерге ғана рұқсат берген.

Оқи отырыңыз: Шымкентте дәрігер "заңсыз бүйрек алмастырды" деген күдікке ілінді

Қазақстан заңына сай, қазақстандықтардың шетелдіктерге орган беруіне тыйым салынған. Қазақстан азаматы тек қазақстандықтарға орган бере алады.

Reuters: Швейцария Храпуновқа тағылған айыпты алып тастады

Виктор Храпунов.

Швейцария "жүздеген миллион доллар жымқырды" деп айыпталған Алматының бұрынғы әкімі Виктор Храпуновқа тағылған айыпты алып тастады. Бұл ақпаратты Женева прокуратурасына сүйенген Reuters агенттігі хабарлады.

Қылмыстық істі тоқтату туралы сот қаулысы тараптарға 14 қарашада берілген. Оған қатысты 25 қарашаға дейін шағым түсірілуі мүмкін.

Ақпарат бойынша, бұл іс Қазақстан билігінің Швейцария билігіне құқықтық көмек көрсету туралы сұрауы негізінде қозғалған. Құжатта Виктор Храпуновтың 90-жылдардың соңы 2000-жылдардың басында Алматы әкімі болып тұрған кезде "қызметтік өкілетін пайдаланып бюджет қаржысын жымқырғаны" жайлы айтылған. 2013 жылдан бері жалғасып келе жатқан істе Храпуновтан бөлек оның отбасы мүшелері және тағы бір олигархтың аты аталады. Reuters "танымал олигархтың" атын айтпайды.

Виктор Храпуновтың өзі Facebook желісінде Швейцарияның Tages Anzeiger басылымына сілтеме жасап, сот шешімінің 12 қарашада шыққанын жазды.

2018 жылы қазан айында Алматының қылмыстық істер жөніндегі мамандандандырылған ауданаралық соты Виктор Храпуновты "жемқорлық" және "ақша жымқыру" баптары бойынша кінәлі деп тауып, сырттай 17 жылға соттаған. Сот оның мүліктерін кәмпескелеуді тапсырған. Оның әйелі Лейла Храпунова да сол кезде сырттай 14 жылға сотталды. Сот материалдары бойынша, олардың "қылмыстық әрекеттерінің кесірінен мемлекетке 250 миллион доллар көлемінде шығын келген".

Оқи отырыңыз: Виктор Храпунов сырттай 17 жылға сотталды

Виктор Храпуновтың өзі тағылған айыптарды мойындамаған. 2007 жылы отбасымен бірге Қазақстаннан кеткен Храпунов қазір Швейцарияда тұрып жатыр.

Reuters агенттігі Храпунов туралы жаңалықтың соңында Швейцария президенті Ули Маурердің жұма, 22 қарашада Қазақстанға сапары басталатынын, тараптар екі мемлекет арасындағы қарым-қатынас пен әріптестік жайын талқылайтынын жазған.

Путиннің қызына тиесілі қор 488 миллион рубль табыс тапты

Катерина Тихонованың диссертациясын қорғап жатқан сәті.

Ресей президенті Владимир Путиннің кіші қызы Катерина Тихонова құрған "Ұлттық зияткерлік даму" қоры 2018 жылы 488 миллион рубль табыс тапқан. Қор бұрын-соңды осыншалықты көлемде табыс тауып көрмеген. "Открытые медиа" басылымының қорға қатысты зерттеуінде осындай дерек айтылады.

Тихонова қоры жас ғалымдарға қолдау көрсетіп, бизнес саласында ғылыми зерттеулер жүргізумен айналысады. Бұған қоса, Мәскеу мемлекеттік университеті маңындағы аумақта құрылыс нысандарын салуы мүмкін. Басылымның жазуынша, "Роснефть" компаниясы оған ірі көлемде тапсырыс береді. Құрамында "Ұлттық зияткерлік даму" қоры бар "Иннопрактика" ұйымына мемлекеттік мұнай компаниясынан 659 миллион рубль көлемінде тапсырыс түскен.

"Открытые медиа" басылымының жазуынша, 2019 жылы тапсырыс берушінің "белсенділігі" азайып, "Иннопрактика" ірі тапсырыстардан қағыла жаздаған. Бірақ жыл соңына қарай "Росатом" оны "құтқарып қалып", ғылыми жұмыстарға тапсырыс берген. Оған қарайтын "Атомэнергопром" қазан және қараша айларында құны 120 миллион рубль болатын екі жобаға тапсырыс берген. Жақында қор зерттеу жүргізу мақсатында құны 65 миллион рубль болатын келісім-шартқа қол қойған. Екі ретте де Тихонова қоры байқауға жалғыз өзі қатысқан.

Мәскеу мемлекеттік университеті проректорының орынбасары Катерина Тихонова мамыр айында диссертациясын қорғаған. 2015 жылы қараша айында Reuters агенттігі оның президент Владимир Путиннің қызы екенін хабарлады. Осыдан кейін халықаралық БАҚ бұл тезисті дәлелдейтін бірқатар зерттеулер жариялады. АҚШ-тың қаржы министрлігі оны Путиннің қызы деп атайды. Кремль мен Путин бұған қатысты түсініктеме бермеді. Кремль ақпаратты растамады не жоққа шығармады.

Белсенді Дулат Ағаділді қамаудан босатпады

Белсенді Дулат Ағаділ (ортада). 15 қараша 2019 жыл.

"Полицияға бағынбады" деп айыпталып, 10 күнге қамалған белсенді Дулат Ағаділді уақытша қамау орнынан босатпады. 21 қарашада түс кезінде Ақмола облысы Ақмол кентіндегі уақытша қамау орнының алдына оны қарсы алу үшін барған туыстары, белсенділер, достары Ағаділді көре алмады. Белсенді Ербол Есхожиннің Азаттыққа айтуынша, түскі 12.30 шамасында изолятор қызметкері шығып, "сот қаулысына сәйкес Ағаділдің тағы бес күн қамау орнында отыратынын" айтқан.

"Изолятордан бір қызметкер шықты. Осындай сот қаулысы бар, тағы бес күн осында болады деді. Біз адвокатымен сөйлестік. Ол да растады. Сот қаулысына сәйкес, ол тағы бес күн отырады деп бәрін түсіндіріп берді" деді Ербол Есхожин.

Белсендінің адвокатының айтуынша, бұған дейін Ағаділдің үстінен сот отырыстарының бірінде "сотқа құрмет көрсетпегені үшін" әкімшілік іс қозғалып, 8 қарашада оны бес күнге қамау туралы қаулы шыққан. 18 қарашада Көкшетау соты бұл іс бойынша апелляциялық шағымды қарап, өзгеріссіз қалдырған. Бес күндік жазасын өтеуі үшін бүгін сол үшін оны қамауда қалдырған. Ағаділді 25-26 қарашада босатуы мүмкін.

42 жастағы Дулат Ағаділ азаматтық құқықтар мен саяси бостандықтардың сақталуын талап етіп жүрген белсенді ретінде танымал. Ол билікке наразылық акцияларына қатысқаны үшін бұған дейін бірнеше рет әкімшілік қамауда болған. Соңғы рет қарашаның 4-і күні Ақмол кентінде "сотқа апармақ болған полицияның заңды талабына бағынбаған" деген айып тағылып, сот шешімімен 10 тәулікке қамалған.

13 қарашада Дулат Ағаділдің тергеу изолятордан "қашып кеткені" туралы ақпарат шыққан. Ішкі істер министрлігі оның "өз бетімен изолятордан шығып кеткенін" айтса, жақтастары ресми орындардың дерегіне күмән келтіріп, Ағаділ отырған изоляторға да барып, түсініктеме беруді талап еткен. 14 қарашада Ағаділ Нұр-Сұлтандағы бас прокуратураға өзі кезіккен "заңсыздықтарға" шағымдану үшін барған кезде полиция сол жерден ұстап әкетті. Сол жерде жақтастарымен сөйлесіп үлгерген Ағаділ "заңсыздық пен қудалау қашуға мәжбүр етті" деп айтқан.

Оқи отырыңыз: Жазықсыз қудалау мен заңсыздық қашуға мәжбүр қылды

15 қарашада полиция "қамау орнынан өз еркімен кеткені үшін" Ағаділді Әкімшілік кодекстің 669-бабы бойынша ("Сот шешiмiн орындамау") жауапқа тартып, Целиноград аудандық соты 14 қарашада босап шығуы тиіс болған Ағаділге тағы алты күн қосып берген.

"Олеся Кексельдің ісіне" қатысты қарама-қайшы ақпарат тарады

Қазақстанның ішкі істер министрлігінің ғимараты. Көрнекі сурет.

Арнайы прокурорлар қызметінің бұрынғы жетекшісі Оксана Кексельдің ісіне қатысты қарама-қайшы ақпарат тарады. Әуелі бұрынғы бас прокурор, қазіргі сенат депутаты Қайрат Қожамжаров 21 қарашада Олеся Кексельдің үстінен қозғалған қылмыстық істің тоқтағанын айтты.

"[Кексельдің] өтініші осыдан екі ай бұрын түскен. Сенбі күні оған "қылмыс құрамы" жоқ болғандықтан іс тоқтады деп хабарлаған. Дау болғаннан кейін бәлкім, істі қайта қарастыратын шығар. Мен мұны Кексельдің өзінен естідім. Тергеуші оған хабарласып, қылмыс құрамы жоқ болғандықтан іс тоқтады деп айтқан" деді Қожамжаров журналистерге.

Бірақ сәлден соң Tengrinews сайты ішкі істер министрлігінің бұл ақпаратты растамағанын хабарлады.

"ІІМ Олеся Кексельдің ісі тоқтады деген ақпаратты растамайды. Тергеу амалдары жалғасып жатыр" деді тергеу департаментінің дерегіне сүйенген ІІМ баспасөз қызметі.

Олеся Кексель мен бас прокуратураның тергеу тобының мүшесі Бауыржан Ғаббасовқа қатысты сотқа дейінгі тергеу амалдары басталғанын ең алғаш болып "Время" газеті хабарлаған. Басылымның жазуынша, істің қозғалуына кәсіпкер Набиевтің шағымы түрткі болған. Ішкі істер министрі Ерлан Тұрғымбаев бұған дейін бас прокуратураға бір азаматтың шағым түсіргенін, онда аталған азаматтардың тергеу амалдарында заңға қайшы әдістерді қолданғаны туралы шағымданғанын айтқан.

Қайрат Қожамжаровтың айтуынша, Кексельге қатысты тексеру жұмыстары бұрынғы энергетика вице-министрі Анатолий Шкарупа ісімен байланысты.

"Кезінде Шкарупаға қатысты қаржы жымқыру фактісі бойынша қарсы куәлік бергенмін. Бірақ біз бұл куәліктердің шұғыл-іздестіру шарасы нәтижесінде дәлелденгенін айта кетуіміз керек. Менің ойымша, бұл қорғау тарабының бір тактикасы" деді ол 21 қарашада.

Олеся Кексель бұрынғы премьер-министр Серік Ахметов, бұрынғы ұлттық экономика министрі Қуандық Бишімбаев, бұрынғы денсаулық сақтау министрі Жақсылық Досқалиевтің ісі сияқты Қазақстандағы ірі даулы істер бойынша тергеу тобына жетекшілік еткен. Ол мамыр айында арнайы прокурорлар қызметінің жетекшісі қызметінен босатылған.

Бас прокуратураға келген бір топ адам "заңсыз сот шешіміне" шағымданды

Бас прокуратараға шағымданып келген топ. Нұр-Сұлтан, 21 қараша 2019 жыл.

21 қарашада таңертең Нұр-Сұлтанда бір топ адам бас прокуратураға келіп, "заңсыз сот шешіміне" шағымданды. Олардың әрқайсысы әртүрлі мәселемен келген. Солардың бірі Нұр-Сұлтан тұрғыны Совет Байсұлтанов несие алу үшін кепілге қойылған үйінің "заңсыз сатылып кеткенін" айтып, мүлігін қайтарып беруді талап етіп келгенін айтты.

Бас прокуратураға шағымданып келген адамдар арасында азаматтық белсенді Санавар Закирова да болды. Ол наразылардың бас прокуратура "заңсыздықты" шешпесе, "әділдікке қол жеткізу үшін" БҰҰ-на шағымдануға да даяр екенін айтты.

- Бірінікі - азаматтық іс, бірінікі - әкімішілік іс, бірінікі - қылмыстық іс. Бірі үй, көлік, баласының заңсыз сотталуына байланысты келіп отыр. Бәрі заңсыз сот шешімімен келіспейді. Қазақстанда заңның орындалуын қадағалайтын басты орын бұл прокуратура деп айтады. Бас прокурор әлі күнге дейін ешкімді қабылдаған жоқ. Бүгін бірінші рет қана қабылдап жатыр. Егер бас прокурор қайта қараудан бас тартса, БҰҰ-ның адам құқығы комитетіне амалмыз жазамыз, - деді Санавар Закирова.

Оның айтуынша, бас прокуратура оларды 8.30-нан бастап қабылдай бастаған. Қанша адам ішке кіріп кеткені белгісіз.

Азаттық тілшісі прокуратураның наразыларды ғимараттың екі жағынан қабылдап жатқанын көрді. Тілшілердің ішке кіруіне рұқсат берген жоқ.

Түскі сағат 12.30 шамасында қабылдауда болған адамдардың алғашқы легі шыға бастады. Бас прокурор Ғизат Нұрдәулетов қабылдауында болған Нұр-Сұлтан тұрғыны Азаттыққа "ол сот шешімінің қайта қаралуына қол ұшын беремін деді, енді күтеміз" деді. Алайда Санавар Закированың айтуынша, қабылдауға жазылған жүзге жуық адамның 16-ына ғана бас прокурормен кездесуге мүмкіндік берген. Ал қалған 80-нен астам адамды бас прорурордың орынбасары немесе өзге қызметкерлерге жазып қойған.

"Мені басқа адамға жазып қойғандықтан мен кіруден бас тарттым, бас прокурордың өзімен кездестіруді талап етемін" деді Санавар Закирова.

Қазақстанда тұрғындар "заңсыз сот шешіміне" жиі шағымданады. "Әділ сотқа қолы жетпеген" кейбір тұрғындар қарсылық ретінде өзін өртеген.

World Justice Project халықаралық ұйымының құқық үстемдігі бойынша әлемдік рейтингісінде Қазақстан 2019 жылы алдыңғы жылмен салыстырғанда бір орынға төмендеп, 65-орын алды. 2010 жылдан бері жылда жарияланып отыратын рейтингіні әзірлеген кезде мемлекеттегі құқықтық ортаны қамтамасыз ететін – билік институттары өкілеттіктерін шектеу, жемқорлықтың жоқтығы, тәртіп және қауіпсіздік, негізгі құқықтардың сақталуы, билік институттарының ашықтығы, заңдардың орындалуы, азаматтық сот, қылмыстық сот көрсеткіштері өлшемге алынады.

Ресейде "Мәскеу ісі" бойынша айыпталған алты адам "саяси тұтқын" атанды

"Мәскеу ісі" бойынша айыпталған белсенді Павел Новиков.

"Мемориал" құқық қорғау орталығы "Мәскеу ісі" бойынша айыпталған алты адам: Андрей Баршай, Владимир Емельянов, Егор Лесных, Максим Мартинцов, Александр Мыльников және Павел Новиковты "саяси тұтқын" деп таныды.

Олардың бәрі қазан айында ұсталған, оларға 27 шілде күнгі наразылық кезінде "билік өкіліне бағынбады" деген айып тағылған. Қазір тергеу изоляторында қамауда отыр.

Олардың саяси себеппен қудаланып отырғанын айтқан "Мемориал" құқық қорғау тобы наразылық кезіндегі видеожазбаға сүйенеді. Құқық қорғаушылардың айтуынша, полиция наразыларға күш қолданған кезде олар бейбіт тұрғындарды арашалауға тырысқан. Бірақ күштік құрылым өкілдерінің ешқайсысы жараланбаған. Ал тергеу орындары осы видеоны "олардың кінәсін дәлелдейтін айғақ" деп санайды.

27 шілде күнгі жаппай наразылықтан кейін пайда болған "Мәскеу ісін" құқық қорғаушылар "наразыларды қорқыту үшін" қозғалған "саяси астары бар қылмыстық іс" деп санайды.

Қыркүйек айында "Мемориал" құқық қорғау тобы "Мәскеу ісі" бойынша айыпталған тоғыз адамды "саяси тұтқын" деп таныған. Бұлар: Данил Беглец, Айдар Губайдулин, Егор Жуков, Кирилл Жуков, Евгений Коваленко, Алексей Миняйло, Иван Подкопаев, Самариддин Раджабов және Сергей Фомин. Олардың кейбірі сотталды, кейбірі - тергеліп жатыр. Бұған дейін Алексей Миняйлоға тағылған айып алынып тасталған.

Зеленский "норман төрттігі" саммитінде талқыланатын төрт маңызды мәселені айтты

Украина президенті Владимир Зеленский (ортада).

"Норман төрттігі" саммитінде төрт мемлекет басшысы Украина шығысында атысты тоқтату, тұтқындардың оралуы, Донбастағы сайлау және Ресеймен шекарадағы аймақты бақылауға алу мәселесін талқылайды. Бұл ақпаратты 20 қарашада Украина президенті Владимир Зеленский айтты.

Оның айтуынша, ең маңызды әрі күрделі мәселе - Киевтің бақылауында емес аймақта сайлау өткізу, өйткені оның "көп компоненттері бар".

"Бұл - Украинаның уақытша басып алынған аймағында емес, Украина аймағында жергілікті сайлау өткізу мүмкіндігі. Бұл ең маңызды мәселе" деді ол.

Украинаның шекара қызметінің дерегінше, Ресеймен шекарадағы 409 шақырым жерді Киев бақылап отырған жоқ. Зеленский Донбаста қазіргідей "уақытша" тыныштық емес, нағыз бейбітшілік орнауы қажеттігін айтты.

"Екінші мәселе, бұл - "уақытша" атыстың тоқтауы, "жалған" татуласу. Бұл уақытша нәрсе. Екі-үш күн тынышталады да, сосын атыс қайта басталады, одан кейін бір күрделі жағдай болып, адамдарымыздан айрыламыз. Сондықтан нағыз татуласу, атыстың шын тоқтағаны керек" деді Зеленский.

"Норман төрттігі" саммиті 9 желтоқсанда Парижде өтеді. Соңғы рет мұндай формат бойынша кездесу 2016 жылы қазан айында Берлинде өткен.

Ресей мен Украина арасы 2014 жылы Ресей Қырым түбегін аннексиялап, Украинаның шығысындағы сепаратистерге қолдау көрсеткеннен кейін ушыққан. 2014 жылдың сәуір айынан бері қарулы қақтығыс кезінде 13 мыңнан астам адам көз жұмған.

Өткен аптада Қазақстанның бірінші президенті Нұрсұлтан Назарбаев Владимир Зеленский мен Владимир Путин арасында Нұр-Сұлтан қаласында келіссөз өткізуді ұсынған болатын. Киев пен Мәскеу бұл ұсынысты қабылдамады.

"Норман төрттігі" саммиті - Украинаның шығысындағы жанжалды реттеу үшін 2014 жылдан бері жұмыс істеп келе жатқан Украина, Ресей, Франция және Германия жетекшілері мен сыртқы істер министрлігінің кездесу форматы.

Бас прокуратура "Зорлау" қылмысы бойынша тараптардың келісімге келуіне тыйым салмақ

Бас прокурордың орынбасары Марат Ахметжанов.

20 қарашада бас прокурордың орынбасары Марат Ахметжанов Қазақстанда "зорлау" қылмысы бойынша тараптардың келісімге келуіне тыйым салынатынын айтты. Оның айтуынша, "Қылмыстық және қылмыстық процестік заңнамаға өзгертулер мен толықтырулар енгізу туралы" заң жобасында зорлау қылмысына жазаны күшейту қарастырылған, бала зорлағандарды 20 жылға немесе өмір бойы бас бостандығынан айыру жазасы көзделген.

"Зорлау қылмысы ауырлығы орташа қылмыстан ауыр қылмыс санатына көшеді. Яғни, бұл жерде татуласуға болмайды. Ал балаларға қарсы жасалған осындай қылмыс үшін жаза тіпті қатал болмақ. Бұл аса ауыр қылмыстар санатына жатады. 14 жасқа толмағандарға қарсы жыныстық сипаттағы қылмыс үшін 20 жылға бас бостандығынан айыру немесе өмір бойғы бас бостандығынан айыру жазасы ұсынылып отыр" деді Марат Ахметжанов.

Жақында Таразда болған "оқушыны зорлау" оқиғасының айдалада емес, мектеп ауласындағы дәретханада сабақ уақытында болғанын еске салған депутат Инна Унжакова Қазақстанда 2300 оқушының дәретханасы жоқ мектептерде оқып жатқанын айтты. Ол сәйкесінше осыншама оқушыға сондай қауіп төніп тұрғанын айтып, дәретханаларды мектеп ішінен салу, оқушылардың қауіпсіздігін қамтамасыз ету мәселесін көтерді.

"Қылмыс ауладағы дәретханада болған. Ата-аналардың қысымымен облыстық білім басқармасы мектеп директорының тәрбие ісі жөніндегі орынбасарын, сабақ кезінде оқушыны жіберген мұғалімді, вахтерды дереу жұмыстан шығарды. Алайда мұны шенеуніктердің "кінәліні тауып жазалау" деген сияқты әдеттегі әрекеті деп бағалауға болады. Балалардың қорғансыздығы көп жағдайда білім мекемелеріне педофилдерді жолатпауға міндетті қызметкерлердің кәсіби біліксіздігі және немқұрайлығына тіреледі" деді Инна Унжакова.

Жергілікті БАҚ-тың жазуынша, қараша айының ортасында Тараздағы мектептердің бірінде ауладағы дәретханаға сабақ кезінде сұранып шыққан жетінші сынып оқушысын ер адам зорлаған. Бұл оқиғадан кейін мектептің бірнеше қызметкері жұмыстан шығарылған. Полиция 38 жастағы ер адамның ұсталғанын, оның ұзақ жылға сотталуы мүмкін екенін хабарлады.

Қыркүйек айында президент Қасым-Жомарт Тоқаев зорлау мен тұрмыстық әлімжеттік жасағандарға жазаны қатайту қажет екенін айтқан. Осыдан соң прокуратура арнайы заң жобасын әзірледі.

Жобада бұған дейін орта дәрежедегі қылмыс саналатын "зорлау" бабы ауыр қылмыстар санатына қосу көзделген. Бірақ кейбір сарапшылар жазаны күшейтумен мәселе шешілмейді деп санайды.

Видео: Зорлау қылмысына жаза қатайту мәселені шеше ме?​ (Қыркүйек, 2019 жыл).

Зорлау қылмысына жаза қатайту мәселені шеше ме?
please wait

No media source currently available

0:00 0:02:15 0:00

СІМ Гонконгте қазақстандық студенттің ұсталғанын хабарлады

Гонконгтегі наразылық. Тамыз айы, 2019 жыл.

18 қарашада Гонконгтегі наразылық кезінде полиция баптистер университетінің 1-курс студенті қазақстандық Абилькаир Нукпиді ұстаған. Бұл туралы Сыртқы істер министрлігі хабарлады.

Министрліктің дерегінше, "Гонконгтегі Қазақстан консулы студентке барып қайтқан, жағдайы жақсы. Полиция ұстаған кезде оң қолының саусақтарын аздап жаралап алған. Ешқандай шағымы жоқ".

СІМ 20 қарашада студенттің ісі бойынша алғашқы тыңдау өткенін, Гонконгтегі Қазақстан елшілігі студентке адвокат іздеп жатқанын хабарлады.

Сәрсенбі күні Oyan, Qazaqstan белсендісі Әсем Жәпішева әлеуметтік желідегі парақшаларында Гонконгте Әбілқайыр Нұқпиев есімді (СІМ мәлімдемеінде - Абилькаир Нукпи) 19 жастағы қазақ студентінің ұсталғанын жазған. Bloomberg тілшісі Аарон Мак Николас Twitter желісіндегі постына сүйенген Жәпішеваның жазуынша, студенттің қолында жанғыш зат бар бөтелке болған. 16 қарашада Гонконгтегі баптистер университетіне бекінген наразыларды ұстау үшін полиция кампусқа шабуыл жасаған кезде қазақстандық студентті де ұстап, оның оң қолы жараланған.

Журналист Аарон Мак Николастың жазуынша, Қазақстан елшілігінің араласуына қарамастан Гонконг соты студентті "кепілмен босатудан бас тартып, сот тыңдауын қаңтар айына белгілеген".

18 қарашада Қазақстанның СІМ Гонконгтегі наразылыққа байланысты 118 студенттің елге келгенін хабарлаған. Министрлік 48 студенттің жақын күндері Қазақстанға оралатынын айтқан.

Соңғы бес айдан бері жалғасып жатқан наразылық шарасында Гонконг жұрты биліктен демократияға бастар нақты қадамдар талап етеді. Наразылар Қытайдың Гонконгтің ішкі ісіне араласқанына да наразы.

"Көлігінен иттің басы табылған" белсендінің қауіпсіздігіне алаңдаған топ полицияға келді

Шымкентте бір топ адам белсенді Нұржан Мұхаммедовке жасалған "қоқан-лоқыны" ашық әрі әділ тергеуді талап етті. 20 қараша 2019 жыл.

20 қарашада түстен кейін 20-ға жуық адам Шымкент қалалық полиция департаментіне барып, белсенді Нұржан Мұхаммедовке "қоқан-лоқы" жасаған адамдарды тауып, жауапкершілікке тартуды талап етті. 19 қарашада белсенді Нұржан Мұхаммедов белгісіз біреулердің көлігінің терезесін шағып, иттің басын тастап кеткенін айтып, мұны "азаматтық белсенділігімен" байланыстырған еді.

Полиция басшысына арнап жазылған үндеуде Мұхаммедов пен оның оның отбасының қауіпсіздігін қамтамасыз ету, 1 желтоқсанға дейін оқиғаны ұйымдастырғандарды тауып, жауапқа тарту, сот процесін ашық өткізу, кінәлілер табылмаған жағдайда полиция басшыларын отставкаға жіберу сияқты талаптар жазылған. Оған отыз шақты адам қол қойған. Олар бұған қоса, оқиғаны бұзақылық емес, экстремизм бабы бойынша зерттеуді талап етті.

Видео: Белсенді біреулердің көлігіне иттің басын тастап кеткенін айтады (19 қараша 2019 жыл).

Белсенді көлігінен иттің басын тауып алғанын айтады
please wait

No media source currently available

0:00 0:02:41 0:00

Наразы топтың алдына полиция өкілі шығып, оларды ішке кіріп, мәселені талқылауға шақырды. Полиция ғимаратының алдына жиналғандардың бір бөлігі сыртта қалып, бір бөлігі ішке кірді. Әуел баста полиция Азаттық тілшісінің ішке кіруіне қарсы болғанмен жұрт талап еткен соң рұқсат берді.

Оларды іште Шымкент қалалық полиция департаментінің басшысы Ералы Жұмаханбетов қабылдады. Ол оқиға бойынша тергеу амалдары жүріп жатқанын айтып, наразы топтың пікірін ескеруге уәде берді. Ал белсенділер 1 желтоқсанда тағы келетінін ескертіп, үйлеріне тарасты.

19 қарашада Нұржан Мұхаммедов "иттің басын тастаған" белгісіз біреулердің көлік есігінің сыртына балағат сөздер жазып кеткенін де айтқан. Белсендінің айтуынша, олар көліктің екі дөңгелегін жарып кеткен. Полиция "Бұзақылық" бабы бойынша іс қозғаған.

Нұржан Мұхаммедов бұған дейін Шымкентте билікке қарсы және "Қытайдың Қазақстандағы зауыттарына қарсы" бірнеше рет наразылыққа шыққан (Қыркүйектің басында бірнеше қалада Қытайдың Қазақстандағы 55 жобасына қарсы наразылық шаралары өткен. Кейін билік осы шараға қатысқан ондаған белсендіні әкімшілік жауапқа тартып, бірнеше күнге қамаған). Сот Мұхаммедовті "бейбіт митинг өткізу ережесін бұзды" деп 10 және 5 тәулікке қамаған. Шымкент тұрғыны 2018 жылы шілде айында отбасымен бірге қала әкімдігіне барып, "полицияның қудалауынан шаршағанын" айтып, өзін-өзі өртемек болған. Оны әкімдік қызметкерлері құтқарып қалған еді.

Қытай NYT жариялаған Шыңжаң жайлы құпия құжаттарды "фейк" деп атады

Шыңжаңдағы "қайта саяси тәрбиелеу лагерьлерінің" бірі. 2018 жыл.

Қытай билігі америкалық New York Times газеті жариялаған Шыңжаңдағы "қайта саяси тәрбиелеу" лагерьлеріне қатысты 400 беттен құралған құпия құжаттарды “жалған” деп атап, мұны Пекинге қарсы "сыртқы күштер" ұйымдастырып отыр деп мәлімдеді.

New York Times газетінде 16 қарашада жарық көрген құжаттарда Қытай басшысы Си Цзиньпиннің Шыңжаңдағы түркітілдес ұлттарды қудалау туралы бұйрықтары, шенеуніктерге арналған нұсқаулықтар бар. Құжаттар арасында отбасы мен туыстары лагерьлерге қамалған, өздері шетелде оқитын студенттерге шенеуніктердің не деп жауап беру керегі де көрсетілген. Нұсқаулық бойынша, "Отбасым қайда?" деген студентке шенеунік "Олар үкімет құрған оқу орталығында" деп жауап беруі керек.

Қытайдың мемлекеттік ақпарат ақпарат құралдарына сілтеме жасаған Reuters-дің жазуынша, 18 қарашада Шыңжаң үкіметі басылымда жарық көрген ақпаратты “жалған” деп атап, мұны Қытайдың “өз ішінде және шетелдегі жаулары” ұйымдастырды деп айтқан. Алайда Шыңжаң үкіметі нақты кімнің "ұйымдастырғанын" ашып айтпаған.

Дәл сол күні Шыңжаң үкіметіне дейін бұл мәселеге қатысты Қытайдың сыртқы істер министрі пікірін білдірген. Ол құжаттың түпнұсқалығына қатысты ешқандай күмән айтпаған, Қытай билігінің "терроризммен күрес" бағдарламасы сәтті жүзеге асты және оның тәжірибесін "өзге елдер қолдана алады" деп қысқа қайырған.

Басылымдағы дерекке сәйкес, 2016 жылы Шыңжаң-Ұйғыр автономиялық өлкесінің басшысы болып Чэнь Цюаньго тағайындалғаннан кейін аймақта "ішкі лагерьлердің" саны күрт ұлғайған. Қытай әлі күнге дейін нақты қанша адамды ұстағанын айтпады.

2017 жылдың көктемінен бастап Қытайдың Шыңжаң аймағында аз ұлттарға, соның ішінде этникалық қазақтарды "саяси лагерьге" қамай бастағаны туралы хабар тараған. Өткен жылы БҰҰ Қытайдың Шыңжаңда миллионға жуық этникалық ұйғыр мен өзге де түркітілдес ұлт өкілдерін "саяси тәрбие лагерьлерде" ұстап отырғанын мәлімдеген. Бастапқыда мұндай ақпаратты терістеген Пекин кейін оны "экстремизмге қарсы шара" деп түсіндірген және саяси лагерьлерді "тіл үйреніп, кәсіпке баулитын" орталықтар деп атаған.

Қазан айының соңында 23 мемлекет (арасында АҚШ пен Еуропа елдері де бар) ортақ мәлімдеме жасап, Пекинді Шыңжаңдағы ұйғырлар мен өзге де мұсылман топтарды қудалауды тоқтатуға шақырған.

Бас прокуратура жемқорлыққа қарсы агенттіктің Мәнізоровқа қатысты шағымын кері қайтарды

Қазақстанның бас прокурорының орынбасары Марат Ахметжанов.

Бас прокуратура Алматы облысы әкімінің орынбасары Бағдат Мәнізоровқа қатысты істі қайта қолға алу туралы жемқорлыққа қарсы іс-қимыл агенттігінің шағымын қанағаттандырмады. Бұл ақпаратты 20 қарашада журналистерге бас прокурордың орынбасары Марат Ахметжанов хабарлады.

Қазан айының соңында жемқорлыққа қарсы іс-қимыл агенттігі Бағдат Мәнізоров ісін жабу туралы бас прокуратура шешімімен келіспейтінін мәлімдеген.

"Біреудің ұстанымы ештеңені білдірмейді, процедура бар. Заң бар...Қылмыс құрамы немесе қылмыс оқиғасы жоқ болса, іске нүкте қойылады. Немесе өзіміз айтып өткендей, бұл дәлелдер қылмыстық жолмен алынса [іс жабылады]. Мен жай-жапсарын білмеймін, тек болған фактілерді айтып отырмын: прокуратура қылмыстық істі тоқтатты, жемқорлыққа қарсы іс-қимыл агенттігі оған шағым түсірді, олардың шағымы қанағаттандырылмады" деді Марат Ахметжанов.

Қазан айының басында сыбайлас жемқорлыққа қарсы іс-қимыл агенттігі Алматы облысы әкімінің орынбасары Бағдат Мәнізоровтің "Алаяқтық" бабы бойынша (Қылмыстық кодекстің 190-бап, 4-бөлім 2-тармағы) күдікке ілінгенін, тергеу жүріп жатқанын хабарлаған. Жемқорлыққа қарсы іс-қимыл агенттігі істің жай-жапсарын айтқан жоқ. 28 қазанда Мәнізоровқа тағылған айыптың алынғаны белгілі болды. Алматы облысының әкімдігі 30 қазанда журналистерге Бағдат Мәнізоровтің жұмысқа шыққанын, қызметтік міндетіне кіріскенін хабарлады. Өткен аптада жергілікті БАҚ-қа сұхбат берген шенеунік өзіне жала жапқанын айтты.

Ал жемқорлыққа қарсы іс-қимыл агенттігінің төрағасы Алик Шпекбаев Tengrinews агенттігіне берген сұхбатында ешқандай "тапсырыс" болмағанын айтты.

Бұған дейін жергілікті БАҚ интернетте Бағдат Мәнізоровтің "күмәнді әрекеті" жайлы видео тарағанын да жазды. Адвокаты Алмас Демесінов видеоның монтаждалғанын айтып, Мәнізоровтің "жемқорлыққа" еш қатысы жоғын жеткізген.

57 жастағы Бағдат Мәнізоров Алматы облысы әкімінің орынбасары қызметіне биыл 10 шілдеде тағайындалған. Одан бұрын Алматы қалалық мемлекеттік сәулет-құрылыс бақылау басқармасын екі жыл басқарды. 2008-2017 жылдары Алматы қаласы Алатау ауданының әкімі болды. Жергілікті БАҚ-тың болжауынша, оған тағылған айып сәулет-құрылыс бақылау басқармасын басқарған кездегі қызметімен байланысты болуы мүмкін.

Tengrinews агенттігі бұл іске қатысты дау жалғасып жатқан тұста Мәнізоровтің облыс әкімі қызметіне ұмтылғаны туралы сыбысты жоққа шығарғанын жазды. Алматы облысының әкімі Амандық Баталов егер Мәнізоровқа тағылған айып расталса, отставкаға кетуге дайын екенін мәлімдеген.

"Открытые медиа": Кабаеваның отбасы қымбат үйлерде тұрады

Алина Кабаеваның мемлекеттік дума депутаты болып жүрген кезі. 2009 жыл.

Ресейдің ұлттық медиа тобының директорлар кеңесінің жетекшісі, бұрынғы гимнаст Алина Кабаеваның отбасы бір миллиард 250 миллион рубль тұратын қымбат үйлерде тұрады. "Открытые медиа" қорының зерттеу мақаласында осындай дерек айтылады. Кабаева және оның туыстарының атына алты пәтер, екі үй және төрт облыста 70 сотық жер телімі тіркелген.

2018 жылы шілде айында Алина Кабаева Рублево-Успенский шоссесінен жер сатып алып, алғаш рет өз атына тіркеген. Росреестр дерегінше, "Успенское" демалыс үйі орналасқан елді мекендегі 45 сотық жер соған тиесілі. Мұнда 2013 жылдан бері Кабаеваның апасы Анна Зацепелина тұрады. Оның 45 сотық жері немересінің жер телімімен жалғасып жатыр. Басылымның жазуынша, Успенское елді мекеніндегі Кабаева отбасына тиесілі мүліктің құны 655 миллион рубльді құрайды.

"Собеседник" дерегінше, Олимпиада чемпионының анасы Любовь Кабаева ауданы 334 шаршы метр болатын екі қабат саяжайды жалдап тұрады. "Открытые медиа" жазуынша, ол 2010 жылы Сочидің Адлер ауданы Эсто-Садок елді мекенінен 49 жылға жалға жер алған. Саяжай мен жер телімдерін жалға алғаны үшін үшін Любовь Кабаева және өзі сияқты тағы 11 адам (арасында "Газпром" жетекшілері де бар) 101 мың рубль төлейді (күніне 278 рубль). Ал саяжайға жақын орналасқан қонақ үйдегі бір бөлмеге қонып шығу үшін бір адам күніне 6800 рубль төлеуі тиіс. Сочи шенеуніктері жалға алу құнын нарық бағасына жеткізуді жоспарлаған, бірақ жалға алушылар сот арқылы жеңіп алған.

Эсто-Садок елді мекеніне жақын жерде премьер-министр Дмитрий Медведевтің резиденциясы бар. Мұндай ақпарат Жемқорлықпен күрес қорының "Он вам не Димон" атты зерттеуінде айтылады. Зерттеу дерегінше, Ресей премьер-министрімен Алина Кабаева көп жылдан бері араласып тұрады.

Бұдан бөлек, Алина Кабаеваның әжесі Анна Зацепилина және әпкесі Лейсан Кабаева Мәскеу мен Санкт-Петербургтен шамамен 740 миллион рубль тұратын төрт пәтер сатып алған. "Дождь" телеарнасының жазуынша, олар жылжымайтын мүлікті президент Владимир Путин айналасындағы адамдардан сатып алған.

Алина Кабаева 2013 жылы мемлекеттік дума депутаты болып жүрген кезде табыс декларациясын жариялаған. Онда Кабаева табыс көлемін 11 миллион рубль деп көрсеткен. 2011 жылы төменгі палатаға сайланбай тұрған кезде оның жинақ қорында 124 миллион рубль қаражат болған. Қазір Алина Кабаева басқаратын ұлтық медиа тобы жыл сайын есеп бермейді, сол себепті Кабаеваның табысын есептеу мүмкін емес.

2008 жылы "Московский корреспондент" басылымы Ресей президенті Владимир Путин әйелімен ажырасып, Алина Кабаеваға үйленеді деп жазған. Бұл мақала жариялана салысымен газеттің жұмысы тоқтап, кейіннен жабылды. Кейбір сайттар он жыл ішінде Путин мен Кабаеваның ортақ үш баласы дүниеге келді деп жазады. Бірақ тараптардың ешқайсысы ақпаратты растамады.

Ақтөбеде тағы да оқушылар төбелесті, бір адам жараланды

Көрнекі сурет.

Ақтөбе облысы Мұғалжар ауданының орталығы Қандыағаш қаласында пышақ жарақатын алған мектеп оқушысының жағдайы жақсарып келеді. Бұл туралы Азаттыққа Мұғалжар аудандық ауруханасы бас дәрігерінің орынбасары Балтабек Құсайынов айтты.

Дәрігердің сөзінше, екі санынан жараланған мектеп оқушысы аудандық ауруханаға 18 қарашаға қараған түні түскен.

- Жабық бас-ми жарақатын алған, миы шайқалып, үшкір заттан екі саны жарақаттанған оқушының қазіргі жағдайы тұрақты. Жарақатын таңып, тиісті емін жасап жатырмыз. Пациент 2004 жылы туған, - дейді Балтабек Құсайынов.

Ақтөбе облыстық полиция департаментінің мәліметінше, қарашаның 16-17 күндері Қандыағаш қаласында мектеп оқушылары төбелескен. «Бұзақылық» бабы бойынша қылмыстық іс қозғалды. Тергеу амалдары жүріп жатыр. Өзге ештеңе айта алмаймыз» деді Ақтөбе облыстық полиция департаментінің баспасөз қызметі.

Мұғалжар аудандық білім бөлімі басшысының міндетін атқарушы Ерік Бұқарбаевтың сөзінше, оқушылар 16 қараша күні жанжалдасып, ертесінде тағы да төбелесті жалғастырған. Ерік Бұқарбаев «топтасып төбелесушілердің жалпы саны 15 шақты болғанын» айтады.

- Істің мән-жайын полиция тексеріп жатыр. Біздегі мәлімет бойынша Қандыағаш қаласындағы №1, №2 орта білім беретін мектептер мен жергілікті колледж оқушылары өзара сөзге келіп қалған. Пышақ жарақатын алған оқушы ауруханаға бірден бармаған. Жарақаты жанына батып, жағдайы ауырлай бастағасын ғана 18 қарашаға қараған түні дәрігерлер көмегіне жүгінген, - дейді Ерік Бұқарбаев.

Бұған дейін жергілікті БАҚ Ақтөбеде кәмелетке толмағандар арасында қылмыс көбейгенін хабарлаған. 10 қарашада Ақтөбеде 20-ға тарта оқушы төбелесіп, бір адам қаза тапқан. Полиция "Бұзақылық" және "Адам өлтіру" баптары бойынша қылмыстық іс қозғады, бір студент қамауға алынды.

Қырғызстанның жоғарғы соты Асылбекуллының үкімін өзгеріссіз қалдырды

Дамирбек Асылбекуулы.

Қырғызстанның жоғарғы соты Қазақстанда он жылға сотталып, экстрадицияланған қырғыз парламентінің бұрынғы депутаты Дамирбек Асылбекуулына шыққан үкімді өзгеріссіз қалдырды. Бұл ақпаратты Қырғызстанның жоғарғы сотының баспасөз қызметіне сүйенген Азаттықтың Қырғыз қызметі хабарлады.

"Шекарадан контрабанда тауарын өткізбек болды" және "трансұлттық ұйымдасқан қылмыстық топқа қатысты" деп айыпталған Асылбекуулы мен тағы да 11 адамның үстінен жүрген сот ісі биыл сәуірде өтіп, оларды үш жылдан 14 жылға бас бостандығынан айырған. 5 қарашада Алматы қаласының аппелациялық соты үкімді өзгертпеді.

Оның жаза мерзімі 2018 жылдың 15 ақпанынан бастап есептеледі. Сот қаулысына қайта шағым түсіруге болмайды.

18 қарашада Дамирбек Асылбекуулы Қырғызстанға экстрадицияланды. Кейбір БАҚ онымен бірге тағы екі қырғыз азаматының Қырғызстанға экстрадицияланғанын хабарлады. Қырғызстанның ресми орындары бұл ақпаратты растамады.

Оқи отырыңыз: Қазақстанда ұсталған Қырғызстан депутаты кім еді?

Швеция Джулиан Ассанждың үстінен қозғалған қылмыстық істі тоқтатты

Джулиан Ассанж.

Швеция прокуратурасы "зорлау" бабы бойынша айыпталған Уикиликс (WikiLeaks) жобасының негізін қалаушы Джулиан Ассанждың үстінен қозғалған қылмыстық істі тоқтатты.

Прокуратура өкілінің айтуынша, Ассанждың кінәлі екенін дәлелдейтін айғақ жеткіліксіз болғандықтан іс сотқа жіберілмеген. Алайда прокуратура бұл шешімді апелляцияға беруге болатынын айтты.

Швеция 2010 жылы Ассанжға "зорлау" бабы бойынша айып таққан. Уикиликс жобасының авторы тағылған айыпты жоққа шығарған. Швеция Ұлыбританиядан Ассанжды экстрадициялауды талап етіп, ақырында Уикиликс жетекшісі Лондондағы Эквадор елшілігін паналауға мәжбүр болған. Эквадор билігі оған саяси баспана берді.

Елшілік ғимаратында жеті жылға жуық уақыт тұрған Ассанж биыл көктемде саяси тұтқын мәрбесінен айрылып, британ полициясының қолына түсті. Ол қазір Ұлыбританияда кепілдік шартын бұзғаны үшін түрмеде жазасын өтеп жатыр. Ол сонымен бірге өзін АҚШ-қа экстрадициялау бойынша сот шешімін күтіп отыр.

"Құпия ақпараттарды жариялаумен" танымал болған Уикиликс жобасының авторы Джулиан Ассанжға АҚШ-та 17 айып тағылған. Олардың арасында "тыңшылық" бабы да бар. Заңгерлер оған 175 жыл жаза берілуі мүмкін деп болжайды.

АҚШ демократтарының серверінен ұрланған құжаттарды жариялау ісінде де Ассанждың аты аталады. Бұған дейін АҚШ-тың арнайы прокуроры Роберт Мюллер осы іс бойынша Ресейдің әскери барлау қызметін айыптаған.

Мамыр айының соңында БҰҰ-ның қысыммен күрес жөніндегі өкілі Нильс Мельцер Ассанждың түрмеде психологиялық қысым көріп отырғанын мәлімдеген. Мельцердің айтуынша, Уикиликс жетекшісінің айналадағы адамдардан қатты қауіптенетіні байқалған.

Ассанжды Эквадор елшілігінен шығарып, британ полициясы ұстағаннан кейін Швеция оның үстінен қозғалған қылмыстық істі қайта қолға алған. Алайда швед соты Лондоннан оны экстрадициялауды сұрамады.

Шымкентте жүргізушілер жұмысқа шығудан бас тартты

Шымкенттегі жүргізушілер ереуілі. 20 қараша 2019 жыл.

20 қарашада таңертең Shymkent Bus автопаркінің 50-ге жуық жүргізушісі жұмысқа шығудан бас тартты. Бес бағыт бойынша жүретін автобус жүргізушілері мен кондукторлары жалақыны уақытында беруді және жалақыны өсіруді талап етті. Жұмысшылардың айтуынша, олар қазан айындағы жалақысын алмаған. Бұл ақпаратты оқиға орнында жүрген Азаттық тілшісі хабарлады.

- 24 сағат осындамыз. Көлік жуу бар, касса өткізу бар. Таңғы сағат төртте тұрамыз. Бір күн жоспар өткізбей көрші, жұмысқа шығармайды. Біздің қадіріміз қайда? Айлығымыз қайда? Біздің бала-шағамыз жоқ па? Оларды қалай асыраймыз? - дейді кондукторлардың бірі.

Видео: "53 мыңға бала-шағамызды қалай асыраймыз?" (20 қараша 2019 жыл).

Шымкенттік автобус жүргізушілердің наразылығы
please wait

No media source currently available

0:00 0:01:56 0:00

Жұмысшылардың айтуынша, жұмыс беруші әуел баста 180 мың теңге жалақы беруге уәде берген. Бірақ "қазір 60 мың теңгенің өзін жөнді ала ала алмай отырмыз" дейді.

- 179 сағат жұмыс істедім. 16 ауысым. Оған 59 666 теңге шыққан. Зейнетақыға 5 666 теңге ұстады. Табыс салығын ұстады. Сонда 53 мың теңге таза қолымызға алдық. Оған қалай күн көреміз? - дейді жүргізуші Сәкен Айтуаров.

Наразы жұмысшылардың алдына компанияның бас директоры шығып, "жағдайды түсіндіруге" тырысты. Ол жалақыны кешіктіріп жатқанын растап, компанияның жағдайы күрделі екенін айтты.

- Маршруттардың 70 пайызы өзін-өзі өтемейді. Мұны жұмысшылардың бәрі біледі. Бұлардың айлықтарына жетпейді. Бірақ соған қарамастан кешіктіріп беріп жатырмыз, - деді Shymkent Bus автопаркінің директоры Елікбай Тоқбергенов.

Жұмысшылар ереуілін полиция бақылап тұр. Shymkent Bus автопаркінің жұмысшылары тамыз айында да жалақыны уақытында ала алмағанын айтып, наразылық білдірген.

Shymkent Bus автопаркінде жалпы 480 жұмысшы бар. Компания Шымкент қаласында 12 бағыт бойынша жолаушыларды тасиды.

Shymkent Bus компаниясы биыл 19 маусымда жұмысын бастаған. Компанияны ашқан Шымкенттің экс-әкімі Ғабидолла Әбдірахымов қалаға 300 жаңа автобус келгенін хабарлаған.

"Импичмент ісі" бойынша төрт куәгер жауап берді

Дипломат Дженифер Уильямс және АҚШ-тың ұлттық қауіпсіздік кеңесінің Еуропа істері жөніндегі директоры, Украина бойынша маман Александр Виндман. 19 қараша 2019 жыл.

Сейсенбі, 19 қарашада АҚШ конгресі өкілдер палатасының барлау жөніндегі комитеттің ашық тыңдауында АҚШ-тың ұлттық қауіпсіздік кеңесінің Еуропа істері жөніндегі директоры, Украина бойынша маман, подполковник Александр Виндман жауап берді. Ол 25 шілдеде АҚШ президенті Дональд Трамп Украина президенті Владимир Зеленскиймен телефон арқылы сөйлескен кезде бөлмеде болған.

Трамптың оппоненттері АҚШ президенті Украина басшысынан саяси қарсыласы Хантер Байденнің ұлына қарсы тергеуді қайта қолға алуды өтінді деп санайды.

Президенттің айтқандарынан күдіктенген Виндман оны бас прокурорға баяндаған. Оның сөзінше, "АҚШ президенті шетел үкіметінен АҚШ азаматы мен саяси қарсыласының әрекетін тергеуді сұрай алмайды".

Виндманның айтуынша, Украинаның бас прокуроры Юрий Луценко және Нью-Йорктің бұрынғы мэрі және Трамптың жеке адвокаты Руди Джулиани "АҚШ-тың Украинаға қатысты саясатына нұқсан келтіретін жалған ақпарат таратқан".

Сейсенбі күні подполковниктен бөлек, дипломат Дженифер Уильямс те жауап берді. Ол вице-президент Майк Пенстің көмекшесі болған және Трамптың Зеленскиймен әңгімесінің куәсі болған. Уильямс екі президенттің әңгімесі "ерекше" болғанын айтып, онда "АҚШ-тың ішкі мәселелері" айтылды деді.

Трамп Александр Виндман мен Дженифер Уильямсты Twitter желісінде сынады. Ақ үйде журналистер сұрақтарына жауап берген Трамп Виндманды мүлде танымайтынын айтты.

Сейсенбі күні конгресс тыңдауында тағы екі куәгер: АҚШ-тың Украина бойынша бұрынғы арнайы өкілі Курт Волкер және Ақ үй қызметкері Тим Моррисон жауап беруі тиіс болған.

Тағы

XS
SM
MD
LG