Ауғанстан ішкі істер министрлігі Кабул халықаралық әуежайына шабуыл жасалғанын хабарлады. 17 шілде күні таңертең әуежай маңынан жарылыстар мен атыстар естілді. Әуежай терминалынан қошқыл түтін шығып жатыр. Биліктің хабарлауынша, әуежайдағы салынып жатқан ғимаратты басып алған қарулы топ автоматтар мен гранатометтерден атқылаған. Ауғанстан қауіпсіздік күштері әуежай аумағын қоршауға алған. Құрбан болғандар туралы ақпарат түскен жоқ. Кабул әуежайының қасында НАТО әскери базасы орналасқан. Осының қарсаңында Ауғанстанның шығысындағы Пактика провинциясында базардағы террорлық жарылыстан ондаған адам мерт болған еді.