Қаңтардың 24 і күні Конституциялық кеңес «Қазақстан республикасы Конституциясына өзгертулер мен толықтырулар енгізу туралы» президентке жолданған заң жобасына қатысты қоғамдық ұйым өкілдерінің пікірін тыңдады. Жиынға атқарушы билік және үкіметтік емес ұйым өкілдерімен қатар сарапшылар қатысты. Тараптардың пікірін тыңдап шыққан Конституциялық кеңес мүшелері қорытынды тұжырым жасау үшін ақылдастар бөлмесіне кетті. Дегенмен, шешімді қашан жариялайтындарын нақты айтпады. Өзбекстан президенті Ислам Кәрімовтың Еуропаға сапарына наразылық танытушылар Брюсселде акция өткізді. Халықаралық құқыққорғаушы Хьюман Райтс Уотч қаңтардың 24-і күні әлемдегі адам құқығының жағдайы туралы жыл сайынғы кезекті баяндамасын жариялады. Баяндамада Қазақстанның 2010 жылы ЕҚЫҰ-ның төрағасы болғанына қарамастан елдегі адам құқығы саласында заңбұзушылықтардың көп болғаны турасында айтылады.