Қазақ әдебиеті мен мәдениеті ауыр қазаға душар болып, туған жердің топырағын бір бассам деген арманына жете алмай, Қытай жерінде жазушы Қажығұмар Шабданұлы ақсақалдың өмірден өткені туралы суыт хабар жетті. Тунис пен Египеттегі наразылық толқулары басқа да елдерде етек ала бастады, Тегеранда осы шерулерге қолдау білдіріп көшеге шыққандар арасында бір адамның қаза тапқаны жөнінде хабарлар тараған болатын. Аймақтағы сейсенбі күнгі ахуалды да барлап көреміз. Қазақстандықтар Қажығұмар Шабданұлын 2009 жылы Қазақстанда басылып шыққан Қылмыс романы арқылы ғана біледі десек болады. Қытайдағы қазақ қаламгерін жақсы білген, Шабданұлының еңбектерінің қазақстандық оқырманға жетуіне де өзіндік үлесін қосқан жазушы Қабдеш Жұмаділов Азаттықтың әуе толқынында абыз жазушының ғибратты ғұмыры мен еңбектері жайында қабырғасы қайыса отырып әңгімеледі.