ЕҚЫҰ ның қазіргі төрағасы Қазақстанның Ақтөбе қаласында болған жанкештілік жарылысты айыптап, оны террорлық акт деп атады. Бас прокуратура бұл оқиғаны террорлық акт емес дегенімен, қазақстандық сарапшылардың кейбірі лаңкестік әрекет деп бағалайды. Прокуратура сейсенбі күні сондай-ақ «Нұрбанктің» жоғалып кеткен топ-менеджерлерінің мәйіттері табылды деп хабарлады. Мамырдың 17-сі күні «Закон и правосудие» басылымының бұрынғы бас редакторы Тоқберген Әбиев түрмеде үш жыл жазасын өтеген соң бостандыққа шықты. Бір аптадан бері наразылық акциясын өткізіп жатқан Қаражамбас мұнайшылары аштық акциясын бастады деп хабарлайды осы аймақтағы тілшіміз. Жезқазғанда санаулы тәуелсіз басылымдардың біріне жабылу қаупі төніп тұр.