Accessibility links

Украина блоктан тыс статусын жойды


Украина Жоғарғы радасының депутаттары (Көрнекі сурет)
Украина Жоғарғы радасының депутаттары (Көрнекі сурет)

23 желтоқсан күні Украина парламенті елдің блоктан тыс статусын жоюды жақтап дауыс берді.

Депутаттар алдында сөйлеген Украина сыртқы істер министрі Павел Климкин елдің НАТО-ға қатысты осыған дейін ұстанып келген бейтарап статусы Киевтің Еуропаға жақындау ниетіне қайшы екенін айтты.

Ал заңды таныстырған бұрынғы премьер-министр Юлия Тимошенко бұл құжатты "Украинаны Батыс өркениетіне жалғайтын маңызды заң" деп сипаттады. Блоктан тыс статусты жоятын бұл заңнан соң Украина НАТО-ға бірден мүше бола қоя алмайды. Бұл процесс бірнеше жылға созылуы мүмкін. Бірақ Брюссельдегі НАТО өкілі «ұйымның есігі Украинаға ашық екенін» айтты.

Украинаның қандай да бір әскери-саяси одаққа кірмейтіні, оның ішінде НАТО-ға кіруден бас тартуы туралы заңды Жоғарғы Рада бұрынғы президент Виктор Януковичтің тұсында, 2010 жылдың шілде айында қабылдаған.

Бұл шешім НАТО-ның шығысқа жылжуын өз қауіпсіздігіне қатер деп білетін Ресейге ұнамады. Мәскеу Украина парламентінің бұл шешімін "достыққа жат" деп сипаттады. Украина Ресейді елдің шығысындағы сепаратистерді қаруландырып, қолдап отыр деп айыптап келеді.

XS
SM
MD
LG