Accessibility links

Маңғыстау жұрты Амалды тойлап жатыр


Отпантаудағы мерекелік сахна. Маңғыстау облысы, 14 наурыз 2015 жыл.

Қазақстанның батыс аймағында бүгін, наурыздың 14-і - Амал мерекесін тойлау басталды. Жергілікті халық дәстүр бойынша наурыз мейрамын тойлауды осы күні бастап кетеді.

Маңғыстау жұрты жылдағыдай биыл да облыс орталығы Ақтау қаласынан жүз шақырымдай жерде орналасқан «Отпантау» мәдени-ұлттық кешеніне жиналды. Отпантау басында таңертеңнен басталған мәдени көпшілік шараларды тамашалауға бірнеше мың адам жиналған. Бүгінгі мерекеге Маңғыстаумен бірге көршілес Атырау облысынан, Астанадан арнайы келгендер бар.

Мерекелік бағдарлама бойынша, бүгін мұнда көкпар тарту, бәйге жарысы, балуан күресі тәрізді ұлттық ойындар өткізіледі.

Биыл Отпантаудың етегіне кірпіштен киіз үй формасында бірнеше ғимарат салынған. Мұндағы мерекелік шаралар жұма күні басталған – мәдени ұжымдар концерт қойып, «Қасиетім – Қарашаңырақ» поэзия кеші өтті. Жұма күні кешке Отпантау басында «Бірлік оты» жағылды.

Отпантау басындағы Амалды тойлаудан соң да Көрісу мерекесі наурыз айы бойы жалғаса береді. Тұрғындар бір-бірінің үйін аралап, құшақтасып көрісіп, амандық-саулық тілеп, келген жаңа жылмен құттықтайды. Өткеннен қалған өкпе-реніші барлар бір-бірінен кешірім сұрап, оны ұмытуға тырысады.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

XS
SM
MD
LG